31 isi se taumasaraha ma namanamarina, ia matena se ribaribaei, ia Ierusalema eai abo i hearo.
32 Na Petero, ma ana sasaguyao, matadi se enoeno: isi se siliata ena namanamari se ita, eo taudi labui wa maenayao se totoro, edi namanamari hinage se ita.
33 Taudi labui wa Iesu bena se laugabaei. Petero i ribalau Iesu arinai, i ene, “Tanuagagu e, i lolo inai mo ta mia: apa haiona ta abidi: esau enam, eo esau Mose enana, eo esau Elia enana:” na i ribariba gaibu.
34 Ma ribaribana eada esau i laoma i poitawaidi: isi se lulau eada wa boeana eai se matausi.
35 Na arina esau eada boeana eai i laoma, i ene, “Natuyogoyogoigu ede teina: ia au ataiei.”
36 Arina wa i lautom, Iesu se ita iabom ie mia. Isi se monomonouei, nei asubenadi eai ne ginauri se itadi wa nige tau esau se heriba.
37 Maraietom, oea tupina eai wa se letamao, tatao gamagaridi ia se laubagibagiei.
38 Tau esau, boeadi eai, i eogalau, i ene, “Tanuagagu e, ea awanorim ta, u italau natugu tau arinai, paana natueseesegagu mo.
39 Earua gama wa i toai, eo ma esega i eabayaba; eo tauna i abigogoi awana i gosagosapuro, eo i heamamna, i abigabaei, abo hinage i laubodauio.
40 Em heaheatayao ea awanoridi bena se aiduiei; isi nige abina se ata.”
41 Iesu ia arinana i heuio, i ene, “Omi isi ta nige emi sunuma, eo ma awaeagaramiu, huia lohaloha eau maemiu, eo ea taubigaimiu wa? Hage natum wa u woeaima.”
42 Ia i laoma, ma launa, na demoni gama wa i helubiei, eo i abigogoi, Iesu earua biibiina wa i ribamataei, gama wa abo i hemauri, ia abo i moseuio tamana arinai.
43 Isi gamagaridi Eaubada ena gigibori lailai se noonooei. Ginauri gamagamagari Iesu i ginauridi wa, isi gamagaridi ma noonoodi, ie ribalau ena heaheata aridi eai, i ene,
44 “Teina ribadi ta taba se ludobi beamiu gudadi eai: paana Tau Natuna abo se moselaei tatao nimadi eai.”
45 Ena riba wa nige se nuatui, riba wa se ribayamui arinai nige se ita: riba wa hinage bena se oimuriei se matausi.
46 Haiawayagara esau ie tubu isi boeadi eai, si ene eai aridi eai abo i sae ariri.
47 Iesu edi nuatu i nuatulobai, merumeru gagirina ie abi, ia gegesina eai i hebawa.
48 Ie ribalau aridi eai, i ene, “Tau esau eo esau merumeru ta i oiami debagu eai ia i oiamigu hinage: tau esau eo esau i oiamigu tauhetamariguma hinage i oiami: paana ia gamagarimiu arimiu eai i gagiri konekone, ia abo i sae ariri ede.”
49 Ioane ia arinana i heuio, i ene, “Tanuagagu e, tau esau aie ita demoni i aiduiedi oa debam eai; ia ai ribanuahi paana ia nige i hemuriwataida.”
50 Iesu i ribalau ia arinai, i ene, “Ia tabu au ribanuahi: paana ede ia nige i hetataguduguduida ita enada meta.”
51 Huiana i hanahanauma ia bena se abiisiniuioi, ia nuana esega mo bena i sae Ierusalema eai.
52 Ena tauwasa matana eai i hetamaridi: isi se lau abo se lulage Samaria tataodi edi eanua esau, ena abamia bena se abi nonohai.
53 Isi ia nige se oiami, paana ia nuana esega mo bena i sae Ierusalema eai.
54 Ena heaheata Iamesi eo Ioane teina se ita, si ene, “Guiau e, em nuatu saha, oeagi alaalasina abo ta lauhesom galewa eai i dobima tatao wa se alasiohi doha hinage Elia ena laulau wa?”
55 Ia abo i torobui, taudi labui i ribasuuidi, i ene, “Emi nuatu aniona nige au nuatui.
56 Paana Tau Natuna nige i laoma tatao bena i unuidi, na bena i hemauridi mo.” Isi abo se lau eanua esau.
57 Dobila eai ma laudi, tau esau i ribalau ia arinai, i ene, “Guiau e, em abalau gamagamagari eai abo ea hemuriwataim.”
58 Iesu i ribalau ia arinai, i ene, “Alope edi guda, eo malagaibu manudi edi noi; Tau Natuna uruna nige ena abaaiunuaena.”
59 I ribalau tau esau arinai, i ene, “U hemuriwataigu.” Ia mo i ene, “Guiau e, sora ea lau tamagu ea toretoretau baguna.”
60 Iesu i ribalau ia arinai, i ene, “Taumatemate enadi taumatemate abo se toretoretau: na oa mo u lau Eaubada ena basileia ribana u lauguguiaei.”
61 Tau esau hinage i ene, “Guiau e, eau abo ea hemuriwataim; sora ea lau baguna egu numa tataodi ea lauaioniedi.”
62 Iesu i ribalau ia arinai, i ene, “Tau esau nimana i torelaei tano abagiagiarina gigina eai, eo taba i sinibui, Eaubada ena basileia taba nige i abi.”
