Luka 1:28-69

²⁸Mələk onun yanına gəlib dedi: «Salam, ey lütfə nail olmuş qız! Rəbb səninlədir».

²⁹Məryəm bu sözlərdən tam lərzəyə gəldi və ürəyində bu salamın nə demək olduğu barədə düşünməyə başladı.

³⁰Mələk ona dedi: «Qorxma, Məryəm, çünki sən Allahın lütfünə nail oldun.

³¹Sən hamilə olub bir Oğul doğacaqsan. Onun adını İsa qoy.

³²O, böyük olacaq və Haqq-Taalanın Oğlu adlanacaq. Rəbb Allah Ona atası Davudun taxtını verəcək.

³³O, Yaqub nəslinin üzərində əbədi olaraq Padşah olacaq və Onun Padşahlığının sonu olmayacaq».

³⁴Məryəm mələyə dedi: «Bu necə olacaq? Mən heç kişi üzü görməmişəm».

³⁵Mələk cavabında ona dedi: «Müqəddəs Ruh sənin üzərinə enəcək, Haqq-Taalanın qüdrəti üstünə kölgə salacaq. Buna görə də doğulacaq müqəddəs Övlad Allahın Oğlu adlanacaq.

³⁶Bax qohumun Elizavetin də yaşlı vaxtında bətninə oğlan uşağı düşüb. Onu sonsuz adlandırırdılar, amma o artıq altı aydır ki, hamilədir.

³⁷Çünki Allah üçün mümkün olmayan şey yoxdur».

³⁸Onda Məryəm dedi: «Mən Rəbbin quluyam, qoy mənə sənin dediyin kimi olsun». Mələk onu tərk edib getdi.

³⁹O vaxt Məryəm tələsik qalxıb Yəhudanın dağlıq bölgəsindəki bir şəhərə yollandı.

⁴⁰O, Zəkəriyyənin evinə girib Elizaveti salamladı.

⁴¹Elizavet Məryəmin salamını eşidəndə bətnindəki körpə tərpəndi. Elizavet də Müqəddəs Ruhla dolub

⁴²uca səslə çığırdı: «Sən qadınlar arasında xeyir-dualısan, sənin bətninin bəhrəsi də xeyir-dualıdır!

⁴³Bu necə oldu ki, Rəbbimin anası yanıma gəlib?

⁴⁴Bax sənin salamının səsi qulağıma çatanda bətnimdəki körpə sevinclə tərpəndi.

⁴⁵Rəbbin ona dediyi sözlərin yerinə yetəcəyinə inanan qadın nə bəxtiyardır!»

⁴⁶Məryəm isə dedi:

⁴⁷«Qəlbim Rəbbi ucaldır, Ruhum Xilaskarım Allaha görə şadlanır,

⁴⁸Çünki O Öz qulunun yazıq halını gördü. Bundan sonra bütün nəsillər məni bəxtiyar sayacaq,

⁴⁹Çünki Qadir Olan mənim üçün böyük işlər etdi, Onun adı müqəddəsdir!

⁵⁰Onun mərhəməti də nəsildən-nəslə Ondan qorxanlara göstərilər.

⁵¹O, qolu ilə qüdrətli işlər gördü, Ürəklərində qürurla düşünənləri pərən-pərən saldı.

⁵²Hökmdarları taxtlarından endirdi, Məzlumları yüksəltdi.

⁵³Acları nemətlərlə doydurdu, Varlıları isə əliboş yola saldı.

⁵⁴Rəbb qulu İsrailin imdadına çatdı, Ata-babalarımıza vəd etdiyi kimi İbrahimə və onun nəslinə əbədilik Mərhəmət göstərməyi yada saldı».

⁵⁶Məryəm Elizavetin yanında üç aya yaxın qalıb evinə qayıtdı.

⁵⁷Elizavetin doğmaq vaxtı çatdı. O, bir oğlan doğdu.

⁵⁸Onun qohum-qonşuları Rəbbin ona böyük mərhəmət göstərdiyini eşidəndə onunla birgə sevindilər.

⁵⁹Səkkizinci gün körpəni sünnət etməyə gəldilər. Ona atası Zəkəriyyənin adını qoymaq istədilər.

⁶⁰Körpənin anası isə dedi: «Yox, onun adı Yəhya olacaq».

⁶¹Ona dedilər: «Axı qohumların arasında belə adı olan bir kəs yoxdur».

⁶²Körpənin atasından körpəyə nə ad qoyulmasını işarə ilə soruşdular.

⁶³O, bir yazı lövhəciyi istəyib yazdı: «Onun adı Yəhyadır». Hamı heyrətə gəldi.

⁶⁴Həmin o anda Zəkəriyyənin dili açıldı. O, Allaha alqış etməyə başladı.

⁶⁵Qonşuların hamısı qorxuya düşdü. Bütün bu hadisələr haqqında Yəhudeyanın dağlıq bölgəsinin hər yerində danışırdılar.

⁶⁶Bu barədə eşidən hər bir kəs fikrə gedib deyərdi: «Bu körpə böyüyüb nə olacaq?» Çünki Rəbbin əli onun üzərində idi.

⁶⁷Körpənin atası Zəkəriyyə Müqəddəs Ruhla dolub belə peyğəmbərlik etdi:

⁶⁸«Alqış olsun İsrailin Allahı Rəbbə! Çünki Öz xalqına nəzər salıb onları satın aldı.

⁶⁹O, qulu Davudun nəslindən Bizə qüdrətli Xilaskar yetirdi.