LUCAS 1:28-69

²⁸Huan Gabriel calajqui campa María itztoya huan quiilhui: ―Xipaqui ta cati Toteco mitzcualita. Toteco itztoc mohuaya huan achi más mitztiochijtoc que sequinoc sihuame.

²⁹Pero quema María quiitac nopa ilhuicac ejquet, san quitachili huan quitetzaitac huan moilhui taya quiijtosnequi para quej nopa quitajpalo.

³⁰Huan nopa ilhuicac ejquet quiilhui: ―Amo ximomajmati María. Toteco mitztapejpenijtoc para mitztiochihuas tahuel miyac.

³¹Nimantzi ticonehue tielis huan teipa tijtacatiltis se oquichpil huan tijtocaxtalis Jesús.

³²Yaya elis hueyi iixpa Toteco. Huan masehualme quiixmatise para Icone Toteco Dios Cati Más Quipiya Tanahuatili. Huan Toteco quichihuas ma mosehuis huan tanahuatis campa tanahuatiyaya ihuejcapan tata David.

³³Huan quipiyas tequiticayot ica israelitame para nochipa huan amo quema tamis itanahuatilis.

³⁴Huajca María quitatzintoquili nopa ilhuicac ejquet: ―¿Quenicatza niconehue nielis, huan amo quema niitztoya ihuaya se tacat?

³⁵Huan nopa ilhuicac ejquet quinanquili: ―Itonal Toteco hualas ipan ta, huan ichicahualis Toteco Dios Cati Más Quipiya Tanahuatili mitzixtzacuas huan ticonehue tielis. Huan yeca mocone elis nelía tatzejtzeloltic, huan masehualme quiixmatise para Icone Toteco.

³⁶Huan momachicni Elisabet nojquiya quipiyas icone masque ya nanatzi. Huan masque masehualme quiijtohuaj amo hueli conepiya, ama ya quipixtoc icone ipan itacayo chicuase metzti.

³⁷Amo onca yon se tamanti cati Toteco amo hueli quichihuas. Yaya nochi hueli.

³⁸Huajca María quiijto: ―Na niiaxca Toteco. Nica niitztoc para nijchihuas nochi cati nechnahuatis ma nijchihua. Ma nochi mochihua quej techilhuijtoc. Huajca ica ya ni, quistejqui nopa ilhuicac ejquet.

³⁹Teipa María mocualtali huan moisihuilti yajqui se altepet ipan estado Judea campa onca miyac tepeme,

⁴⁰campa ichaj Zacarías. Huan calaquito huan quitajpalo Elisabet.

⁴¹Huan quema Elisabet quicajqui para María quinojnotzqui, icone Elisabet mojmolini iijtico. Huan Itonal Toteco quitemiti Elisabet,

⁴²huan chicahuac Elisabet quiilhui María: ―Ipan nochi sihuame achi más Toteco mitztiochijtoc ta, huan nojquiya quitiochijtoc mocone.

⁴³Nelía se hueyi tatepanitacayot para na, pampa ta tiinana nohueyiTeco techpaxaloco.

⁴⁴Quema technojnotzqui, nimantzi nocone mojmolini ica paquilisti noijtico.

⁴⁵Toteco mitztiochijtoc pampa tijneltocac para temachti quichihuas cati quiijtojtoc.

⁴⁶Huan María quiijto: “Tahuel nijhueyichihua Tohueyiteco ipan noyolo.

⁴⁷Quena, nipaqui miyac ipan Toteco Dios, yaya cati notemaquixtijca.

⁴⁸Pampa masque san niitequipanojca, huan san niteicneltzi, yaya nechelnamijqui, huan ama masehualme cati tacajtiyase para nochipa quiijtose para Toteco nechtiochijtoc.

⁴⁹Quena, Toteco Cati Quipiya Nochi Chicahualisti nechchihuilijtoc huejhueyi tamanti. Tahuel tatzejtzeloltic ya.

⁵⁰Toteco quintasojta nochi masehualme cati quitepanitaj ama, huan nochi cati teipa tacajtiyase huan quitepanitase.

⁵¹Quena, quichijtoc huejhueyi tamanti ica ihueyi chicahualis. Quintzontamiltijtoc cati mohueyimatiyayaj ipan iniyolo.

⁵²Toteco quinquixtilijtoc inintequiticayo tacame cati tanahuatiyayaj, huan quinhueyitalijtoc masehualme cati moechcapanohuaj iixpa.

⁵³Miyac tatiochihualisti Toteco quinmacatoc masehualme cati mayanayayaj, pampa quinixhuiti. Huan masehualme cati quipixque miyac tomi quinmajcajqui san inimax.

⁵⁴Miyac techpalehuijtoc tiisraelitame pampa tiitequipanojcahua. Techtasojtatoc huan amo techelcajtoc.

⁵⁵Quitencahuili Abraham, tohuejcapan tata, para quitasojtasquía ya inihuaya iteipan ixhuihua para nochipa, huan yeca techtasojtatoc tojuanti.” Quej nopa quiijto María.

⁵⁶Huan María mocajqui ihuaya Elisabet nechca eyi metzti, huan teipa mocuetqui ichaj.

⁵⁷Teipa ajsic tonali para Elisabet conepiyas, huan quitacatilti se oquichpil.

⁵⁸Huan nochi icalnechcahua huan ihuicalhua quicajque quenicatza Toteco tahuel quitasojtatoya Elisabet huan quimacatoya icone, huan huajca nochi paquiyayaj ihuaya.

⁵⁹Huan quema nopa piloquichpiltzi quipixqui chicueyi tonati, nochi hualajque para quipiltequilise nopa machiyot cati itoca circuncisión ipan ipiltacayo quej momajtoyaj quichihuaj. Huan nochi quinequiyayaj quitocaxtise Zacarías quej itata.

⁶⁰Pero inana quiijto: ―Amo tijtocaxtise Zacarías, tijtocaxtise Juan.

⁶¹Huan quiilhuijque: ―¿Para ten? Yon se amotata amo quipixqui itoca Juan.

⁶²Huan quimanextilijque itata para quimatise taya itoca quinequiyaya quitalilis.

⁶³Huan Zacarías quintajtani ma quihualiquilica cati ipan tajcuilos. Huan Zacarías quiijcuilo: “Itoca elis Juan.” Huan nochi inihuampoyohua san quitachilijque huan quitetzaitaque.

⁶⁴Huan nimantzi pejqui quiolinía inenepil Zacarías, huan pejqui camanalti huan quipaquilismaca Toteco.

⁶⁵Huan inincalnechcahua quiitaque ten panoc, huan nochi tahuel momajmatijque. Huan teipa nochi masehualme cati itztoyaj campa hueli campa tepeyo nepa ipan estado Judea mocamanalhuiyayaj se ica seyoc cati panoc.

⁶⁶Huan nochi cati quicajque cati panoc moilhuiyayaj: “¿Taya elis ni piloquichpiltzi quema moscaltis?” Quej nopa quiijtohuayayaj pampa quiitayayaj para Toteco nelía quitalijtoya imax ipan nopa oquichpil para quitiochihuas.

⁶⁷Huan nimantzi Itonal Toteco quitemiti Zacarías, itata nopa pilconetzi, huan yaya pejqui quiijtohua ni camanali cati Toteco quimacac. Quiijto:

⁶⁸“Ma tijhueyichihuaca Toteco Dios ten tiisraelitame, pampa hualajtoc techmaquixtis tiimasehualhua.

⁶⁹Techtitanilía se Temaquixtijquet cati quipiya hueyi chicahualisti. Yaya elis se iteipan ixhui Tanahuatijquet David cati huejcajquiya eliyaya itequipanojca.