SAN LUCAS 1:28-69

²⁸Wa mdiya angajle seꞌen ndiꞌin nu kunaꞌan kanꞌ, ykwiꞌ loꞌo bra kanꞌ: ―Ndiya ska chaꞌ nu suꞌwe ꞌa nu ndijyaǎn chkwiǐnꞌ loꞌoo ―ndukwin angajle kanꞌ ꞌin Liya―. ¡Suꞌwe ꞌa nka tiye Ndiose loꞌo nuꞌwin! ¡Suꞌwe ꞌa ndiꞌiin loꞌo Ni! ―ndukwin―. Kaꞌan ꞌa chaꞌ suꞌwe nda Ndiose ꞌiin, ja ngiꞌni Ni ngwañaꞌan loꞌo xka la nu kunaꞌan.

²⁹Wa naꞌan Liya ꞌin angajle kanꞌ. Bra kanꞌ ynan Liya chaꞌ nu ykwiꞌ, loꞌo nduwe ꞌa tiꞌ ni chaꞌ lka nchkwiꞌ angajle kanꞌ ngwañaꞌan. Ytsen ꞌa bra kanꞌ.

³⁰Xiyaꞌ ykwiꞌ angajle kanꞌ loꞌo nu kunaꞌan kuneꞌ kanꞌ bra kanꞌ: ―Liya ―ndukwin―, ja kutseen chaꞌ wa nda Ndiose ska chaꞌ suꞌwe ꞌiin ―ndukwin angajle kanꞌ ꞌin Liya―.

³¹Kaa tnaan, tyiꞌin ska sñiiꞌ; nuꞌwin xtyaa nin Jesús ꞌin kuwiꞌ nu tyiꞌin ꞌiin.

³²Kanꞌ nu ka ska nten nu tnun nchka. Chkwiꞌ neꞌ ꞌin yu chaꞌ Sñiꞌ Ndiose nu lka Xꞌnaan nu tlyu la ti ka yu. Ti kwiꞌ taꞌa tñan tlyu nu yꞌni ayman ree David taꞌa yu, nu yan lo chalyuu nu ngwa sꞌni, kanꞌ tñan lka nu ta ykwiꞌ nu lka Xꞌnaan ꞌin Jesús,

³³chaꞌ nchga tsan ja tyii chaꞌ ka yu ndloo ꞌin nchga nten Israel; ngwañaꞌan ja tyii chaꞌ kulo yu tñan ꞌin nchga nten chalyuu.

³⁴Bra kanꞌ ykwiꞌ Liya loꞌo angajle kanꞌ: ―¿Ni sa ñaꞌan ka chaꞌ re sikwa a?, chaꞌ nu ja ya kaja kwilyoꞌoǔn ―ndukwin Liya ꞌin angajle kanꞌ.

³⁵Bra kanꞌ ytsaꞌ angajle ska chaꞌ ꞌin Liya: ―Ta Ndiose Tyiꞌi ykwiꞌ Ni chaꞌ tiyan seꞌen ndiꞌiin, chaꞌ xuꞌwi tyukwi ñaꞌaan; ska chaꞌ tnun nu kuꞌni Ndiose nu lka ndloo la ti ka chaꞌ kanꞌ. Bra nu kala sñiiꞌ, ska nten nu luwi ꞌa chaꞌ ꞌin Ndiose ka kuwiꞌ nu kala kanꞌ, ti kwiꞌ kanꞌ lka nu ka naan ykwiꞌ Sñiꞌ Ndiose.

³⁶Loꞌo xka chaꞌ chkwiǐnꞌ loꞌoo ―ndukwin angajle ꞌin Liya―, chaꞌ loꞌo neꞌ kula Sabe taꞌaa tyiꞌin ska sñiꞌ, loꞌo kula ꞌa neꞌ kula kanꞌ. Ti ngwa sꞌni la nchkwiꞌ nten chaꞌ ja ndiji sñiꞌ neꞌ kula siyaꞌ ti, loꞌo ni wa mdaꞌa skwa koꞌ ndaꞌan tnan.

³⁷Ja ska chaꞌ nu tukwi ꞌin Ndiose.

³⁸Bra kanꞌ ykwiꞌ Liya loꞌo angajle kanꞌ: ―Si ndukwin Ndiose chaꞌ ngwañaꞌan kala sñiěnꞌ, wa lka chaꞌ bra kanꞌ. Suꞌwe ꞌa nka tiyeěn kuꞌniǐn tñan ꞌin Ni, nchga tñan nu kulo Ndiose Xꞌnaan ꞌñaǎn ―ndukwin Liya. Loꞌo mdoꞌo angajle kanꞌ, ndyaa.

³⁹Bra kanꞌ mdoꞌo Liya ndyaa ndla ti nde ska kichen nu ndiꞌin laja kiꞌya Judea.

⁴⁰Bra kanꞌ mdiya Liya seꞌen ndukwa naꞌan tyi Zacarías, mdyisnan ykwiꞌ loꞌo neꞌ kula Sabe.

⁴¹Bra nu ynan neꞌ kula kanꞌ chaꞌ nu ykwiꞌ Liya loꞌo, bra ti mgii tiꞌ chaꞌ mñan chinꞌ kuwiꞌ. Bra kanꞌ msaꞌan tiye neꞌ kula Sabe nsuꞌwi Tyiꞌi Ndiose,

⁴²kanꞌ chaꞌ kwen ꞌa ykwiꞌ loꞌo Liya bra kanꞌ: ―Tnun ꞌa chaꞌ suꞌwe nu nda Ndiose ꞌiin ―ndukwin neꞌ kula kanꞌ ꞌin Liya―. Ja ya kuꞌni Ni ngwañaꞌan loꞌo xka la nu kunaꞌan. Loꞌo ngwañaꞌan, nchka ꞌa tiꞌ Ndiose ꞌin kuwiꞌ nu ndiꞌin ꞌiin ―ndukwin―.

⁴³Wa mdiyan jyaꞌan nu ka Xꞌnaǎn seꞌen ndiꞌiǐn, loꞌo nten ya ñaꞌan ti lkaǎn.

⁴⁴Chañi chaꞌ nu nchkwiǐnꞌ loꞌoo, chaꞌ mgii tiǎnꞌ chaꞌ wa mñan chinꞌ kuwiꞌ ꞌñaǎn, chaꞌ suꞌwe ngwa tiye kuwiꞌ bra nu ynaǎn chaꞌ nu ykwiiꞌ loꞌoǔn.

⁴⁵Suꞌwe ꞌa nka tiyee chaꞌ wa ndyaa ñaꞌan tiiꞌ chaꞌ ꞌin Ndiose, chaꞌ kuꞌni Ni nchga chaꞌ nu wa ykwiꞌ Ni loꞌoo. Ngwañaꞌan ndukwin neꞌ kula Sabe ꞌin Liya.

⁴⁶Bra kanꞌ yꞌni tnun Liya ꞌin Ndiose: Tyukwi ti tiyeěn kuꞌni tnuǔn ꞌin Ndiose nu lka Xꞌnaǎn, ndukwin Liya.

⁴⁷Chka suꞌwe kasiya ꞌñaǎn chunꞌ ndlaa Ni ꞌñaǎn ꞌin nu kuxi.

⁴⁸Wa yꞌni kuwe ꞌa tiꞌ Ndiose ꞌñaǎn, chaꞌ lkaǎn msu ꞌin Ni, ni siya ska nten tiꞌi lkaǎn. Ni wa mdyisnan nchkwiꞌ nchga nten nu ndijyan lo chalyuu chaꞌ suꞌwe ꞌa nka tiyeěn; kwiꞌ ngwañaꞌan chkwiꞌ nten nu kan nde loo la.

⁴⁹Tlyu ꞌa tñan nu ngiꞌni Ndiose, loꞌo tnun ꞌa chaꞌ nu ngiꞌni Ni loꞌoǔn; luwi ꞌa Ndiose, ndukwin Liya.

⁵⁰Ja kulaa yaꞌ Ndiose ꞌin nten nu tukwa chaꞌ nu nchkwiꞌ Ni; nchga bra nu ti ndijyan nten lo chalyuu, chañi chaꞌ nchka tꞌnan tiꞌ Ndiose ꞌin neꞌ kanꞌ.

⁵¹Kaꞌan ꞌa chaꞌ tnun wa yꞌni Ndiose. Wa yꞌni tyii Ni chaꞌ ꞌin nten nu xkwiꞌ chaꞌ siyeꞌ ngiꞌni loꞌo taꞌa nten neꞌ.

⁵²Suꞌwa ti ngiꞌni Ndiose loꞌo nchga nten. Nchga nten nu tnun nchkwiꞌ, nu lye ꞌa ngiꞌni siyeꞌ loꞌo taꞌa nten neꞌ, kanꞌ ngulaa tiꞌin Ndiose ꞌin neꞌ. Loꞌo nchga nten nu ndiꞌin nganen, nu ja tukwin ꞌa ngiꞌni kwenta ꞌin, tyiꞌin Ndiose loꞌo neꞌ kanꞌ chaꞌ xtya Ni ꞌin neꞌ seꞌen nu suꞌwe la ti.

⁵³Wa yꞌni Ndiose chaꞌ kiꞌya tlaꞌ tiye nten nu lyiji ꞌa chaꞌ suꞌwe ꞌin, loꞌo wa ngulo Ni tñan chaꞌ ja kaja la chaꞌ kuliyaꞌ ꞌin neꞌ nu kuliyaꞌ ꞌa.

⁵⁴Ndayaꞌ ꞌa Ndiose ꞌin nchga neꞌ Israel taꞌaan, chaꞌ lkaan msu ꞌin Ndiose; loꞌo suꞌwe ꞌa mskanꞌ Ni chaꞌ loꞌo ayman ꞌñaan nu yuꞌwi ti sꞌni. Ja mjlyaa tiꞌ Ndiose ꞌñaan, nten taꞌa ayman Abraham lkaan; xkwiꞌ nchka tꞌnan tiꞌ Ni ꞌin neꞌ taꞌaan. Loꞌo ñaꞌan ti nchka tꞌnan tiꞌ Ni ꞌñaan loꞌo sñianꞌ tyukwi bra nde loo la. Ngwañaꞌan ngwa bra nu yꞌni tnun Liya ꞌin Ndiose.

⁵⁶Snan koꞌ nganun Liya naꞌan tyi neꞌ kula Sabe, bra kanꞌ mdoꞌo ndyaa kichen tyi.

⁵⁷Wa mdiya tsan nu kala sñiꞌ neꞌ kula Sabe. Kiꞌyu kuwiꞌ nu ngula ꞌin.

⁵⁸Xa wa ynan neꞌ chaꞌ ngula sñiꞌ neꞌ kula kanꞌ, suꞌwe ꞌa ngwa tiye nchga neꞌ taꞌa, loꞌo neꞌ nu ndiꞌin kwiꞌ seꞌen ti. Bra kanꞌ mdiyan neꞌ seꞌen ndiꞌin neꞌ kula kanꞌ, chaꞌ chkwiꞌ neꞌ loꞌo, chaꞌ suꞌwe ꞌa ngwa tꞌnan tiꞌ nu lka Xꞌnaan ꞌin neꞌ.

⁵⁹La mdaꞌa snuꞌ tsan, bra kanꞌ yaa neꞌ naꞌan tyi neꞌ kula Sabe chaꞌ lkwan kuwiꞌ kanꞌ chaꞌ ꞌin neꞌ judío, chaꞌ msiꞌyu kijin yu. Wa xtya ti neꞌ nin kuwiꞌ kanꞌ, chaꞌ ka naan Zacarías, sa ñaꞌan naan sti.

⁶⁰Loꞌo bra kanꞌ ja mda jyaꞌan kuwiꞌ kanꞌ chabiyaꞌ chaꞌ ka naan sñiꞌ ngwañaꞌan: ―Siꞌi ngwañaꞌan ka naan yu ―ndukwin neꞌ kula kanꞌ ꞌin neꞌ―, Xuwa ka naan yu re.

⁶¹―Ja ndiya taꞌa wan nu naan ngwañaꞌan ―ndukwin taꞌa neꞌ kula kanꞌ.

⁶²Yꞌni yaꞌ neꞌ ꞌin sti kuwiꞌ bra kanꞌ, chaꞌ ñaꞌan ti ja nchka ꞌa chkwiꞌ yu kula kanꞌ. Mnichaꞌ neꞌ ꞌin yu bra kanꞌ: ―¿Sa ñaꞌan ka naan kuwiꞌ re, nchka tiiꞌ a? ―ndukwin neꞌ ꞌin yu kula.

⁶³Bra kanꞌ mjñan yu kula ska kaꞌ lyuꞌ ti chaꞌ lo kaꞌ kanꞌ kwaꞌan yu letra. Nde ndukwa chaꞌ nu ngwaꞌan yu kula kanꞌ bra kanꞌ: “Xuwa ka naan yu.” Nchga nten nu ndiꞌin kwiꞌ seꞌen ti, yuwe ꞌa tiꞌ neꞌ bra kanꞌ.

⁶⁴Bra ti ngwa ykwiꞌ Zacarías xiyaꞌ bra kanꞌ, mdyisnan yu yꞌni tnun yu ꞌin Ndiose bra kanꞌ.

⁶⁵Yuwe ꞌa tiꞌ nchga nten taꞌa kichen tyi neꞌ bra kanꞌ; kwiꞌ ngwañaꞌan yuwe ꞌa tiꞌ nchga neꞌ kichen laja kiꞌya Judea kanꞌ, ytsaꞌ neꞌ ꞌin taꞌa neꞌ sa ñaꞌan nu ngwa chaꞌ ꞌin Zacarías.

⁶⁶Mdaꞌan ꞌa chaꞌ tiye nchga nten nu ynan chaꞌ kanꞌ: ―¿Sa ñaꞌan tñan ka ꞌin kuwiꞌ kanꞌ a? ―ndukwin neꞌ ꞌin taꞌa neꞌ. Chañi chaꞌ suꞌwe ꞌa ngiꞌni Ndiose loꞌo kuwiꞌ kanꞌ.

⁶⁷Wa msaꞌan tiye Zacarías nsuꞌwi Tyiꞌi Ndiose. Bra kanꞌ mdyisnan yu kula kanꞌ ykwiꞌ yu nchga chaꞌ nu wa ytsaꞌ Ndiose ꞌin yu:

⁶⁸Ndiꞌin chaꞌ kuꞌni tnuan ꞌin Ndiose nu lka Xꞌnaan, nu lka Ndiose ꞌñaan neꞌ Israel, ndukwin yu kula kanꞌ bra kanꞌ. Wa xiyaꞌ mdyisnan Ndiose ykwiꞌ Ni loꞌo neꞌ taꞌaan nu lkaan nten ꞌin Ni. Sa bra ni ngiꞌni Ni tñan chaꞌ kulaa Ni ꞌñaan ꞌin nchga chaꞌ kuxi.

⁶⁹Tka msuꞌwa Ndiose ndijyan ska nu suꞌwe ꞌa chaꞌ nchka ꞌin, nu kulaa ꞌñaan ꞌin nchga chaꞌ kuxi nu ndiꞌin ꞌñaan; kanꞌ lka ska nten nu ti kwiꞌ taꞌa ayman David nu yꞌni tñan ꞌin Ndiose nu ngwa sꞌni.