Luke 1:28-69

²⁸Anea on aurin inat ato iyau, “Tuf aurim inama! Bada on om bisimui emama ato On an baimomogin on gagaminai bag imomoginem!”

²⁹Anea an dura ibikakafun on Mary iror, ato ibinonotai atonio dura an yabin on aifan.

³⁰Anea on aurin iyau, “Mary om men unaber mes; yabin God om ekakaberem.

³¹Om arimon uninafot ato fifi orot unituai; ato wabin unyorai Iesu.

³²On arimon gagamin bag inmatar ato arimon sinyorai God Natun Aiyetunenei Bag. Bada God on arimon iniyamai iniAiwab, On wawan agirin David ba,

³³ato On arimon Jacob an dam warar auris iniAiwab au wantoan; an Baiaiwab on an kanfoun ambin!”

³⁴Mary on anea aurin iyau, “Yau on matafiu wat. Atonio bobo on arimon mamaba inmatar?”

³⁵Anea iyafotai iyau, “Ayu Kakafotin arimon amomui inar, ato God an faiwar on arimon om intaragabuem. On yabinai fifi Kakafotin min arimon sinyorai God Natun.

³⁶Enos om tuam Elizabeth. Sabu siyau on arimon men fifi inituai on, baise on toun on ari inafot an roke nimtereban kaita, basit on ijenikwar min on.

³⁷Bobo engon tutufin God aurin on fofonin wat.”

³⁸Mary iyau, “Yau on God an agirotiu, dura aifan ubikakafun on auriu inmatar.” Ato anea ikirir inai.

³⁹Men weromin gibunai Mary ibotitiwag ato yagiginai inai oyau oyau tafanamai Judea mafam gagamin tani amonai nan.

⁴⁰On inai Zechariah an goai ato Elizabeth ikakaiwai.

⁴¹Elizabeth on Mary anbaikakaiu i’tatam on fifi yan amonai iyayob. Ayu Kakafotin Elizabeth ibonuai,

⁴²ato on fonan aumiet bag ikakafun iyau, “Om God an baimomogin on gagamin bag item jever engon tutufin amosi, a fifi unbibituai mat on God imomoginai!

⁴³Yau men anonosin atonio bobo gagamin bag auriu itmatar on, ato yau au Bada ayon on itnat yau itfasiueu mes?

⁴⁴Om am baikakaiu dura atatam mom on, fifi yau amonai on yasisirai iroboge.

⁴⁵Om On ututumai on yasisir gagamin bag, yabin Bada an aumatan om aurim ibikakafun on arimon innat inidura bag!”

⁴⁶Mary iyau,

⁴⁷yau ayubiui on abiyasisir yabin God on yau au Baiyawasotin,

⁴⁸Yabin On yau inosiu, yau on an agir jever wat!

⁴⁹yabin bobo gagamis bag on God Faiwarin auriu ifouren.

⁵⁰God sabu ekakaberes osi iyabon On sebeberuai on, sabu ari ra semama auris a sabu ra gibui sinmama auris.

⁵¹On iman faiwarin iyotet igat sabu ato osi iyabon taseseiris on engon ikugeyes sitagege.

⁵²On aiwab faiwaris asi mamageai simama emon on iyeires sisur, ato sabu kitumis on ibogaiis sigai.

⁵³On sabu kokoianis auris on asi sawar obis ibonues weines, ato sabu sawarotis on imas waganis wat iyafares sinai.

⁵⁴On an aumatan wawat agirit auris ibiyamai on ebokikin; ato On inat an agirotis Israel yangan inibaisis mes.

⁵⁵On an aumatan Abraham a On an dam warar engon auris ibiyamai on inos, on inkaberes au wantoan!”

⁵⁶Mary on nan Elizabeth bisinai ima roke ton isawar weie imatabir men inai an au go.

⁵⁷Elizabeth an wera inat fifi itituai mes, ato fifi orot ituai.

⁵⁸On an sabu a an dam warar duran sitatam mamaba Bada ikakaberai on, osi mat engon on aurin on men sunub siyasisir on.

⁵⁹Fifi irat tafaror kaitamom nanaba isawar ato osi sinat fifi sitiaskibubuai mes, ato sigogoi taman Zechariah wabinai sitiwabseirai mes.

⁶⁰Baise fifi ayon iyau, “Ambin! On wabin on John tanyorai.”

⁶¹Osi on Elizabeth aurin siyau, “Baise omi ami dam warar amonai on men iyafan tani atonio wab ibo on!”

⁶²Namon osi imasi wat fifi taman siyawur, an gogoi wab menan on fifi sityorai.

⁶³Zechariah on fef mes ifefeyan ato fifi wabin igayam iyau, “On wabin on John.” Osi engon tutufin nan on men sunub siduduran on!

⁶⁴Men weromin Zechariah awan iruseren dura ikakafun men, ato on ibosuruf God ifain.

⁶⁵Sabu engon tutufin on siber kwakwan, ato atonio osi bobo simamatar an dura on irat inai Judea oyau oyau tafanam engon ibonu.

⁶⁶Sabu engon tutufin on dura sitatam on sibinonotis ato sibitetem si’yau, “Atonio fifi inrarat gagamin on arimon mamaba inmatar?” Osi rerebai sit sisagob Bada iman an faiwar on fifi bisinai yen.

⁶⁷John taman Zechariah on Ayu Kakafotin ibonuai ato God an dura ikakafun iyau:

⁶⁸“Ot engon tutufin Bada tanifain, Israel yangan asi God! On inat an sabu inibaisis a iniyawasis mes.

⁶⁹God on ati Baiyawasotin Faiwarin itet, an agirotin David an dam warar emon.