Luke 1:28-69

²⁸Lipufan sac tuku nu yorol ac fahk, “Paing kom! Leum God El wi kom, ac El arulana akinsewowoye kom!”

²⁹Mary el arulana fohsak ke kas lun lipufan sac, ac el suk na lah mea kalmen ma el fahk uh.

³⁰Na lipufan sac fahk nu sel, “Mary, nikmet sangeng, tuh kom ohi yurin God.

³¹Kom ac fah pitutuyak ac oswela sie wen, ac kom fah sang inel Jesus.

³²El ac fah arulana fulat — ac fah pangpang el Wen nutin God Fulatlana. Leum God El ac fah oru tuh elan sie tokosra oana David, papa matu tumal,

³³ac el ac fah leum fin fwilin tulik natul Jacob nwe tok. Tokosrai lal ac fah wangin saflaiya!”

³⁴Na Mary el fahk nu sin lipufan sac, “Ma inge ac sikyak fuka, ke nga soenna etu mwet?”

³⁵Ac lipufan sac topuk ac fahk, “Ngun Mutal ac fah tuku nu fom, ac ku lun God ac fah oan fom. Ke sripa se inge, wen mutal se inge ac fah pangpang Wen nutin God.

³⁶Esamul Elizabeth, sie nina in sou lom an. Tuh fwack mu el tia ku in isus, a inge el pitutu malem onkosr lac, el finne arulana matuoh.

³⁷Mweyen wangin ma God El kofla in oru.”

³⁸Na Mary el fahk, “Nga mwet kulansap lun Leum God. Lela ma inge in orek nu sik oana ke kom fahk.” Na lipufan sac som lukel.

³⁹Tiana paht tukun ma inge, Mary el akola ac sulaklak na som nu in sie siti srisrik inmasrlon eol in acn Judea.

⁴⁰El utyak nu in lohm sel Zechariah ac paingul Elizabeth.

⁴¹Ke pacl se Elizabeth el lohng kusen paing lal Mary, tulik se insial ah mokuikui, ac Elizabeth el sesseslana ke Ngun Mutal,

⁴²ac fahk nu sel Mary ke pusra lulap, “Kom pa insewowo emeet sin mutan nukewa uh, ac insewowo tulik se su kom ac oswela an!

⁴³Efu ku ouiya na yohk se inge in sikyak nu sik, tuh nina kien Leum luk in tuku nu yuruk?

⁴⁴Ke pacl se na nga lohngak ke kom paingyu ah, tulik se insiuk inge srosro ke engan.

⁴⁵Fuka lupan insewowo lom ke kom lulalfongi lah kas lun Leum God nu sum ac fah akpwayeyuk!”

⁴⁶Mary el fahk, “Insiuk kaksakin Leum God;

⁴⁷Ngunik engan ke sripen God, Mwet Lango luk,

⁴⁸Tuh El esamyu, mutan kulansap pusisel lal! Ingela mwet in fwil nukewa ac fah pangonyu insewowo,

⁴⁹Ke sripen orekma yohk su God Kulana El oru nu sik. Inel mutallana;

⁵⁰Liki fwil nu ke fwil El akkalemye pakoten lal nu selos su sunakunul.

⁵¹El asroela po kulana lal, Ac kunauselik pwapa lun mwet inse fulat.

⁵²El akpusiselye tokosra kulana liki tron lalos, Ac El akfulatye mwet pusisel.

⁵³El akkihpye mwet masrinsral ke ma wo, Ac supwalik mwet kasrup uh pisinpo.

⁵⁴El sruokyana wulela lal nu sin mwet matu lasr, Ac tuku in kasru Israel, mwet kulansap lal.

⁵⁵El esam in akkalemye pakoten lal nu sel Abraham Ac fwilin tulik nukewa natul nwe tok!”

⁵⁶Mary el muta yorol Elizabeth malem tolu, na el folokla nu yen sel.

⁵⁷Sun pacl lal Elizabeth in isusla, ac el oswela sie wen.

⁵⁸Mwet tulan lal ac sou lal lohngak lah Leum God El arulana akinsewowoyal, ac elos welul engan.

⁵⁹Ke tulik sac el sun len oalkosr matwal, elos tuku in tuh kosreyukla el, ac elos akoo in sang inel Zechariah, in folokin inen papa tumal ah.

⁶⁰Tusruktu nina kial ah fahk mu, “Mo! Inel pa John.”

⁶¹Ac elos fahk nu sel, “Wangin sou lom ma us ine sacn!”

⁶²Na elos kaskas srisrsrisr nu sin papa tumal ac siyuk sel lah ac su inen tulik sac.

⁶³Zechariah el siyuk sie ma elan sim kac, ac el simusla mu, “Inel pa John.” Elos nukewa arulana lut.

⁶⁴In pacl sacna Zechariah el sifilpa ku in kaskas, ac el mutawauk in kaksakin God.

⁶⁵Mwet tulan lalos nukewa arulana sangeng, ac pungen ma inge fahsrelik nu infulan eol nukewa in acn Judea.

⁶⁶Mwet nukewa su lohng ke ma inge elos nunku kac ac siyuk, “Tulik se inge fin kapak el ac mau mwet fuka se?” Mweyen kalem na lah ku lun God oan facl.

⁶⁷Zechariah, papa tumal John, el sessesla ke Ngun Mutal, ac el fahkak kas inge sin God me:

⁶⁸“Lela kut in kaksakin Leum God lun Israel! El tuku tari in kasru mwet lal ac aksukosokyalosla.

⁶⁹El ase nu sesr sie Mwet Lango kulana, Sie sin fwilin tulik natul David, mwet kulansap lal.