Luk 1:28-69

²⁸Odocob ensel uqaca humei madon, “Feeleo, hina Anut amegna me bahic biligina! Tibud hinaca bilina,” don.

²⁹Euqa Maria uqa ensel odi madocob uqa waug ben bahic culumen don. Odocob uqana je eu cel gugnu? ec cisdon.

³⁰Odocob ensel madon, “Maria, hina Anut amegna me bilec wele oga. Eunu cain cucuiagaun.

³¹Faga, hina wawinca cobimeg mel oso basegan. Odimeg mel eu ijan Jisas qogan.

³²Uqa hibna dana binanca biligian. Odocob age Anut Ohis Bahic Melah doqagan. Anut Tibud odudeceb uqa king caligian. Uqa asag Dewid king bilen eu odi biligian.

³³Odocob uqa Jekobna sihul agena king bileceb catanigian. Uqana cul qee qee meiaun,” don.

³⁴Odocob Maria ensel madon, “Ija dana oso qee olom. Eunu ceteh eu adi caligian?” don.

³⁵Odocob ensel jejeg hewi madon, “Kis Gun hinaca humei u tacihigian. Odocob Anut Ohis Bahic uqana gagadic odoc jahulhigian. Eunu mel hina basigian eu age gun oqagan, age Anut Melah oqagan,” don.

³⁶“Faga, hina cotin Ilisabetnu cisdoga. Uqa toia bahic. Uqa mel basecwe qee egina qa qila uqa jagel 6-pelana mel waugna bilia.

³⁷Ge, ceteh oso Anut uqa odocnu ihoc qee oso qee nijel,” don.

³⁸Odocob Maria madon, “Faga, ija Tibudna cabi caja. Hina ija odi mataga eu ijaca caleiale,” don. Odocob ensel uqa cuculdi nuen.

³⁹Saen eu odina Maria uqa taun oso aluhna nijen eu Judia hatuna ono mahucwe nuen.

⁴⁰Uqa nuimei Sekaraiana jona limei Ilisabet alalagdon.

⁴¹Saen Maria uqa Ilisabet alalagdodon waugna mel sim uqa bicolen. Odocob Anut uqa Ilisabet Kis Gun cacawac meceb

⁴²uqa jejeg gagadicca utai madon, “Hinana eeldoc eu caja cunug agena eeldoc wooladec. Mel sim basegan eu Anut uqaha eeldugian.

⁴³Ija adec ijana Tibud uqa anag ija mecitigiannu ijaca hoia?

⁴⁴Ge faga, saen ija dahini hinana alalagtec ec docob mel wawina bicolimei alegeeia.

⁴⁵Tibudna je ensel mahen eu odi caligiannu hina wawin meleen. Eunu hina ceelhec biligina,” don.

⁴⁶Odocob Maria maden: “Ija wawi Tibud binan sulina.

⁴⁷Anut ijana Cahahatec. Eunu ija doloni ceelena.

⁴⁸Ge, ija Tibudna cabi caja himec. Euqa uqa ijanu dahig bilia. Gec faga, qila hibnaca dana cajaca cunug age ijanu mati eeladec oin toqagan.

⁴⁹Anut Gagadicca uqa ceteh ben bahic ijanu odeia. Uqa ijan eu gun.

⁵⁰Dana cajaca wele bileinca, qila bileginaca cunug age Anutnu cumunegina eu Anut uqa agenu waug qona.

⁵¹Uqa uen gagadicca huleldumei dana feeec hewadi bilisaadeceb buadein. Agena cisdoc qee men.

⁵²Uqa king benben ilo cudunnadec hewadeceb mahana nein. Odimei dana age mahana bilein eu suli u binanagaca maden.

⁵³Uqa dana wenca eundec ceteh me aden. Odimei dana cehewanagaca age ceteh me oso qee adimei suladeceb cetehca qee belein.

⁵⁴Uqa weleca Ebrahamca, uqana sihul eundecca je hahun maaden eunu cisdon. Uqa agenu waug qocnu dahig bileceb catanigian ec maaden. Eunu uqa Isrel dana age Anutna cabi ogina cesuladen,” en.

⁵⁶Odocob Maria uqa jagel cijed odi Ilisabetca bilimesi uqa uqana jobon ceseli nuen.

⁵⁷Odocob Ilisabet uqana mel basecnu saen caleceb uqa mel oso basen.

⁵⁸Odocob utuqanelca, uqana sihulca age Tibud uqa me bahic uqanu waug qon eu dumeig age uqaca ceelein.

⁵⁹Odocob deel 8-peladoc caleceb age mel eu deweg cagu qocnu age hoin. Odimeig age ijan Sekaraia eu memeg jomog qoqaga bili odoin.

⁶⁰Euqa anag maaden, “Cain! Uqa ijan Jon qoqagan,” aden.

⁶¹Odocob age madoin, “Hinana sihulna eundec oso ijan edecca qee,” doin.

⁶²Odimeig age mel memeg ebenegana dado mumudeig cel ijan qoum? ec sisildoin.

⁶³Odocob Sekaraia uqa jamel oso jaqecnu maadeceb age utecebil uqa jaqiaden, “Uqa ijan eu Jon,” jaqen. Odocob age cunug tumatumaein.

⁶⁴Odocob saen euna dih Sekaraia uqa co je madec eu fihilicdon. Odocob uqa Anut binan sulen.

⁶⁵Odocob dana cajaca cunug age cemenug bilegina dumeig cucuiein. Odimeig age ceteh odi calennu je eu Judia hatuna dana cajaca cunug age doin.

⁶⁶Dana cajaca cunug age je eu dumeig age je eunu cocobi cisdoin, “Mel sim eu hibna adi biligian?” doin. Ge, Tibudna gagadic odoc uqaca bilen eunu doin.

⁶⁷Odocob Anut odudeceb Jon memeg Sekaraia uqa Kis Gun cacawac meceb uqa je hahun madec odi maden:

⁶⁸“Ege cunug Anut binan suluqale, uqa Isrel egena Tibud. Uqa uqana dana cajaca cahahagecnu egeca hoia.

⁶⁹Uqa uqana cabi dana Dewidna sihuldec odocob Cahahagec Dana gagadic oso calen.