ᤗᤢᤁᤠ 1:28-69

²⁸ᤂᤧᤴ ᤔᤠᤱᤗᤠᤀᤡᤱᤒᤠᤸᤗᤧ ᤔᤧᤳᤋᤢ. “ᤀᤠᤛᤣᤘᤠᤖᤥ. ᤂᤧᤏᤧ᤹ᤃ ᤍᤠᤱᤒᤠᤸᤗᤧ ᤛᤠ᤹ᤖᤡᤰ ᤁᤢᤛᤡᤖᤠ᤹ ᤁᤧᤎᤠᤅᤧᤀᤠᤱ ᤁᤧᤘᤠ᤹ᤖᤥ॥ ᤂᤢᤏᤧ᤹ ᤂᤧᤏᤧ᤹ᤏᤢ ᤘᤠ᤹ᤖᤥ॥”

²⁹ᤔᤖᤡᤕᤶᤔᤡᤴ ᤛᤠ᤹ᤖᤡᤰ ᤁᤢᤏᤡᤱᤘᤠ᤹ ᤔᤕᤧᤀᤠᤱ ᤀᤠᤰᤋᤱᤒᤠ ᤐᤖᤡᤰᤗᤧᤴ ᤛᤣᤘᤠ ᤀᤡ ᤑᤠ᤹ᤀᤠᤱ ᤏᤡᤱᤘᤠ᤹ ᤀᤡ᤺ᤳᤇᤡᤱ॥

³⁰ᤜᤧᤰᤁᤩᤠᤱ ᤔᤠᤱᤗᤠᤀᤡᤱᤒᤠᤸᤗᤧ ᤂᤢᤏᤧ᤹ ᤔᤧᤳᤋᤢ. “ᤔᤖᤡᤕᤶᤔᤣ. ᤔᤧᤃᤡᤛᤧᤴᤏᤧ᤹ᤀᤥ᥄ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤏᤧ᤹ᤃ ᤛᤠ᤹ᤖᤡᤰ ᤁᤢᤛᤡᤖᤠ᤹ ᤁᤧᤎᤠᤅᤧᤀᤠᤱ ᤁᤧᤘᤠ᤹ᤖᤥ॥

³¹ᤀᤠᤸᤗ ᤂᤧᤏᤧ᤹ ᤕᤧᤶᤒᤡᤳᤇᤠ᤹ᤛᤠ᤺ᤎᤡᤰ ᤁᤧᤃᤳᤋᤢ᤹॥ ᤂᤧᤸᤗᤧ ᤁᤢᤔᤡᤱ ᤕᤧᤛᤢ ᤘᤠ᤺ᤳᤋᤧ᤹ᤀᤥ॥

³²ᤂᤢᤏᤧ᤹ ᤐᤕᤶ ᤕᤶᤒᤠ ᤐᤥ᤺ᤱᤅᤠᤱ ᤁᤧᤖᤧᤰᤏᤢ᤺ᤸᤗᤧ ᤐᤕᤶ ᤕᤶᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛ᤻ᤛᤠ᤺ ᤑᤠ᤹ᤀᤠᤱ ᤔᤧᤔᤧᤳᤋᤢ᤹ᤖᤥ॥ ᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤢᤏᤧ᤹ ᤁᤢᤎᤠ᤺ᤰᤌᤧᤒᤠ ᤍᤠᤀᤢᤍᤖᤧ ᤜᤠᤱ ᤆᤥᤃᤢᤒᤠ ᤜᤧᤰᤁᤣ ᤜᤠᤱ ᤆᤥᤃᤢ᤹ᤖᤥ॥

³³ᤜᤧᤰᤁᤩᤠᤱ ᤂᤢᤏᤧ᤹ ᤀᤡᤛᤪᤠᤀᤡᤗ ᤛᤶᤍᤠᤱ ᤛᤍᤠᤍᤡᤱ ᤜᤠᤱ ᤆᤥᤃᤢ᤹ᤖᤥ॥ ᤂᤢᤏᤧ᤹ ᤁᤢᤜᤠᤱᤈᤢᤶᤔᤡᤴ ᤀᤠᤵᤑᤠᤸᤗᤧᤀᤠᤱ ᤔᤧᤏᤢᤵᤏᤧᤴᤗᤥ॥”

³⁴ᤔᤖᤡᤕᤶᤔᤡᤸᤗᤧ ᤔᤠᤱᤗᤠᤀᤡᤱᤒᤠᤴ ᤛᤣ᤺ᤴᤍᤥᤛᤢ. “ᤁᤴ ᤀᤠᤰᤂᤣᤗ᤹ᤖᤡᤰ ᤐᤥ᤺ᤱᤒᤠᤒᤣ᥅ ᤀᤡᤱᤃᤠ᤹ᤃ ᤛᤡᤛᤠᤃᤧᤴ ᤔᤧᤴᤇᤡᤕᤠ᤹ᤀᤠᤖᤥ॥”

³⁵ᤔᤠᤱᤗᤠᤀᤡᤱᤒᤠᤸᤗᤧ ᤏᤥᤃᤵ ᤐᤡᤖᤢ. “ᤛᤣᤛᤣᤔᤠᤱᤅᤡᤴ ᤁᤧᤛᤶᤍᤠᤱ ᤋᤠᤀᤠᤱ ᤁᤧᤖᤧᤰᤏᤢ᤺ᤸᤗᤧ ᤐᤕᤶ ᤕᤶᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤢᤰᤛᤠᤶᤔᤡᤸᤗᤧ ᤁᤧᤄᤢ᤺ᤰᤗᤥ. ᤜᤧᤰᤁᤣᤗ᤹ᤖᤡᤰ ᤂᤧᤏᤧ᤹ᤀᤥᤗᤠᤶ ᤛᤠᤃᤧᤘᤠ᤺ᤴᤇᤡᤱᤒᤠᤱᤃ ᤏᤡᤱᤘᤠ᤹ᤑᤢᤛᤠ᤺ ᤔᤧᤔᤧᤳᤋᤢ᤹ᤖᤥ॥

³⁶ᤂᤧᤵᤛᤧ᤹ᤀᤥ. ᤂᤧᤏᤧ᤹ ᤁᤧᤃᤠ᤹ᤀᤡ ᤀᤡᤗᤡᤛᤡᤒᤠ᤺ᤴ ᤂᤢᤏᤧ᤹ ᤁᤢᤃᤠᤵᤔᤥ ᤋᤢᤶᤔᤥ ᤔᤧᤴᤇᤢᤰᤔᤠ ᤐᤥ᤺ᤰᤂᤧᤀᤠᤱ ᤘᤠ᤹॥ ᤀᤠᤸᤗᤥ ᤔᤏᤠᤜᤠ᤹ᤖᤧ ᤂᤢᤏᤧ᤹ ᤛᤠ᤺ᤔᤧᤱᤃᤵᤔᤏᤠᤔᤠ ᤔᤧᤔᤧᤳᤋᤢᤛᤠᤱ ᤔᤧᤴᤇᤢᤰᤔᤠ ᤐᤥ᤺ᤰᤂᤧᤒᤠ ᤗᤠ ᤋᤢᤰᤛᤡ ᤁᤧᤖᤧᤀᤠᤱ ᤘᤠ᤹ᤖᤥ॥

³⁷ᤂᤧᤸᤗᤧ ᤆᤥᤃᤢᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤆᤥ᤺ᤰᤔᤠ ᤔᤧᤛᤢᤰᤋᤢᤶᤒᤠ ᤕᤠ᤺ᤶᤒᤰ ᤌᤣᤀᤠᤱ ᤜᤥ᤺ᤵᤗᤥ॥”

³⁸ᤔᤖᤡᤕᤔᤖᤧ ᤏᤥᤃᤵ ᤐᤡᤖᤢ. “ᤀᤡᤱᤃᤠ᤹ᤃ ᤍᤠᤱᤒᤠᤸᤗᤧ ᤁᤢᤛᤣᤘᤠᤖᤥᤔᤠᤀᤠᤖᤥ॥ ᤂᤧᤏᤧ᤹ ᤁᤧᤒᤠ᤺ᤳᤋᤢᤒᤠ ᤜᤧᤰᤁᤣᤀᤣ ᤁᤧᤳᤗᤖᤥ॥” ᤜᤧᤰᤁᤩᤠᤱ ᤔᤠᤱᤗᤠᤀᤡᤱᤒᤧᤴ ᤐᤣ॥

³⁹ᤕᤠᤱᤛᤡ ᤔᤖᤡᤕᤶᤔᤡᤴᤏᤠᤱ ᤕᤜᤢᤍᤡᤕᤠ ᤌᤢᤶᤔᤥᤒᤠ ᤁᤥ᤺ᤰᤔᤠᤀᤥ ᤁᤧᤏᤧᤒᤠ ᤐᤠᤱᤈᤢᤶᤔᤥ ᤌᤠᤛᤡᤱ॥

⁴⁰ᤂᤧᤵᤔᤥ ᤈᤁᤖᤡᤕᤠᤖᤧ ᤁᤢᤜᤡᤶᤔᤥ ᤁᤧᤖᤧᤀᤠᤱ ᤀᤡᤗᤡᤛᤡᤒᤠ᤺ᤴ ᤛᤣᤘᤠ ᤔᤧᤳᤋᤢᤖᤥ॥

⁴¹ᤀᤡᤗᤡᤛᤡᤒᤠᤖᤧ ᤔᤖᤡᤕᤶᤔᤡᤴ ᤛᤣᤘᤠ ᤔᤕᤧᤒᤠ ᤂᤧᤵᤛᤢᤏᤠᤔᤧ᤺ᤴᤏᤣ ᤁᤢᤛᤠᤵᤐᤥ᤺ᤰᤁᤥ ᤁᤧᤕᤠᤰᤐᤠ ᤀᤅᤧ᤺ᤰᤘᤠ᤺ᤴ ᤔᤢᤴᤈᤡᤱ ᤗ᤹ᤖᤧᤖᤥ॥ ᤀᤡᤗᤡᤛᤡᤒᤠ᤺ᤴ ᤛᤣᤛᤣᤔᤠᤱᤅᤡᤸᤗᤧ ᤁᤢᤎᤡᤶ ᤐᤥ᤺ᤰᤂᤧ.

⁴²ᤜᤧᤰᤁᤩᤠᤱ ᤕᤶᤒᤠ ᤀᤡᤰᤗᤠᤀᤥ ᤐᤠᤖᤧ. “ᤂᤧᤏᤧ᤹ᤃ ᤔᤧᤴᤇᤢᤔᤠᤜᤠ᤹ᤀᤥ ᤁᤧᤖᤧᤰᤏᤢ᤺ᤸᤗᤧ ᤔᤢ᤹ᤀᤡᤛᤠᤔᤠᤏᤧᤖᤥ. ᤜᤧᤰᤁᤩᤠᤱ ᤂᤧᤏᤧ᤹ ᤛᤠᤃᤧᤘᤠ᤺ᤴᤍᤢᤒᤠ ᤀᤅᤧ᤺ᤰᤘᤠ᤺ᤱᤃ ᤔᤢ᤹ᤀᤡᤛᤠᤒᤠ ᤐᤥ᤺ᤱᤗᤥ॥

⁴³ᤜᤧᤰᤁᤩᤠᤱ ᤀᤡᤱᤃᤠ᤹ ᤀᤠᤍᤠᤱᤒᤠᤸᤗᤧ ᤁᤢᤶᤔᤠᤀᤣ ᤀᤠᤍᤢᤶᤛᤧ ᤋᤠ᤺ᤔᤠ ᤁᤴ ᤀᤠᤰᤋᤱᤒᤠ ᤔᤡᤱᤛᤥ ᤀᤡᤱᤎᤠ᤺ᤱᤏᤧ ᤀᤡᤱᤃᤠ᤹ ᤂᤥ᤺ᤛᤢᤱᤒᤣ᥅

⁴⁴ᤂᤧᤏᤧ᤹ ᤛᤣᤘᤠ ᤁᤧᤔᤧᤳᤋᤠᤱᤒᤠ ᤐᤠ᤺ᤴᤏᤡᤴ ᤂᤧᤵᤛᤢᤱᤏᤢᤔᤧ᤺ᤴᤏᤣ ᤀᤡᤱᤃᤠ᤹ ᤀᤠᤛᤠᤵᤐᤥ᤺ᤰᤐᤥ ᤁᤧᤕᤠᤰᤐᤠ ᤀᤅᤧ᤺ᤰᤘᤠ᤺ᤴ ᤛ᤺ᤳᤋᤧᤖ ᤔᤢᤴᤈᤡᤱ ᤗ᤹ᤖᤧᤖᤥ॥

⁴⁵ᤂᤧᤏᤧ᤹ᤃ ᤁᤧᤖᤧᤰᤏᤢ᤺ᤸᤗᤧ ᤔᤢ᤹ᤀᤡᤛᤠᤔᤠᤏᤧᤖᤥ. ᤌᤣᤀᤠᤱᤓᤧᤸᤗᤧ ᤍᤠᤱᤒᤠᤸᤗᤧ ᤂᤧᤏᤧ᤹ ᤁᤧᤜᤡᤱᤔᤴᤏᤥ ᤐᤥ᤺ᤱ ᤐᤠ᤺ᤳᤋᤢᤒᤠ ᤐᤠ᤺ᤴᤜᤠ᤹ ᤁᤢᤏᤠ ᤁᤧᤛᤠ᤹ᤖᤢᤖᤥ॥”

⁴⁶ᤜᤧᤰᤁᤩᤠᤱ ᤔᤖᤡᤕᤔᤖᤧ ᤐᤠ᤺ᤳᤋᤢ. “ᤀᤡᤱᤃᤠ᤹ ᤀᤠᤛᤡᤰᤗᤢᤱᤔᤥᤗᤠᤶᤔᤣ ᤍᤠᤱᤒᤠᤸᤗᤧ ᤁᤢᤏᤠᤖᤠ ᤑᤥ᤺ᤛᤢᤱᤗᤥ.

⁴⁷ᤜᤧᤰᤁᤩᤠᤱ ᤀᤡᤱᤃᤠ᤹ ᤀᤠᤛᤧᤴᤗᤵᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤢ ᤛᤠ᤹ᤖᤡᤰ ᤛ᤺ᤳᤋᤠᤱᤅᤠᤱ ᤘᤠ᤹ᤀᤠᤖᤥ॥

⁴⁸ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ ᤜᤧᤰᤋᤱᤔᤠ ᤆᤢᤱᤈᤡᤃᤧᤴ ᤁᤢᤛᤣᤘᤠᤖᤥᤔᤠᤴ ᤏᤡᤱᤘᤠ᤹ ᤀᤡ᤺ᤳᤋᤠᤱᤅᤠᤱ ᤘᤠ᤹ᤀᤠᤖᤥ॥ ᤀᤠᤸᤗᤀᤠᤱᤎᤥ ᤌᤠ᤺ᤰᤌᤠ᤺ᤰᤁᤥ ᤀᤡᤱᤃᤠ᤹ ᤔᤢ᤹ᤀᤡᤛᤠᤔᤠ ᤑᤠ᤹ᤀᤠᤱ ᤔᤧᤔᤧᤳᤋᤠᤖᤥ.

⁴⁹ᤌᤣᤀᤠᤱᤓᤧᤸᤗᤧ ᤔᤢᤰᤛᤠᤶᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤕᤶᤗᤠᤒᤠ ᤕᤠ᤺ᤶᤒᤰᤜᤠ᤹ ᤀᤡᤱᤃᤠ᤹ ᤆᤥᤃᤠᤱ ᤐᤡᤖᤠᤱᤅᤠᤱ ᤘᤠ᤹ᤀᤠᤖᤥ॥ ᤂᤢᤏᤧ᤹ ᤁᤢᤔᤡᤱᤅᤡᤱᤃ ᤛᤣᤛᤣ ᤆᤥ᤺ᤰᤗᤥ॥

⁵⁰ᤜᤧᤰᤁᤩᤠᤱ ᤂᤢᤏᤧ᤹ ᤔᤡᤱᤛᤥ ᤀᤡᤱᤎᤠ᤺ᤱ ᤁᤧᤒᤡᤒᤠᤜᤠ᤹ ᤁᤧᤖᤧᤰ ᤌᤠ᤺ᤰᤌᤠ᤺ᤰᤁᤥ ᤂᤢᤏᤧ᤹ ᤁᤢᤗᤢᤱᤃᤢᤶᤔᤡᤴ ᤀᤥᤛᤣ᤺ᤴᤎᤠᤰᤋᤢᤛᤡ᤹ᤖᤥ॥

⁵¹ᤂᤢᤏᤧ᤹ ᤔᤢᤰᤛᤠᤶᤒᤠ ᤁᤢᤜᤢᤰᤜᤠ᤹ᤖᤧ ᤕᤠ᤺ᤶᤒᤰ ᤆᤥᤃᤢᤀᤠᤱ ᤘᤠ᤹. ᤜᤧᤰᤁᤩᤠᤱ ᤀᤠᤱᤍᤡᤱ ᤁᤧᤗ᤹ᤒᤠᤜᤠ᤹ ᤁᤧᤖᤧᤰ ᤀᤡᤍᤡᤘᤍᤡ᤹ ᤆᤥᤃᤢᤛᤡᤀᤠᤱ ᤘᤠ᤹ᤖᤥ॥

⁵²ᤜᤧᤰᤁᤩᤠᤱ ᤂᤢᤏᤧ᤹ ᤜᤠᤱ ᤁᤧᤈᤥ᤺ᤰᤐᤠᤜᤠ᤹ ᤂᤢᤏᤡ᤹ ᤜᤠᤱ ᤕᤢᤰᤏᤠᤀᤥᤗᤠᤶ ᤕᤥ ᤌᤠ᤺ᤛᤢᤛᤡᤀᤠᤱ ᤘᤠ᤹. ᤁᤖ ᤆᤢᤱᤈᤡᤃᤧᤶᤒᤠᤜᤠ᤹ ᤌᤠ᤺ᤱᤎᤠ᤺ᤱ ᤑᤥ᤺ᤰᤂᤢᤛᤡᤀᤠᤱ ᤘᤠ᤹ᤖᤥ॥

⁵³ᤜᤧᤰᤁᤩᤠᤱ ᤂᤢᤏᤧ᤹ ᤛᤠᤰᤁᤡᤸᤗᤧ ᤋᤖᤢᤛᤡᤒᤠᤜᤠ᤹ ᤏᤢ᤺ᤒᤠ ᤆᤡᤃ᤺ᤰᤘᤠᤜᤠ᤹ ᤐᤡᤖᤢᤛᤡᤀᤠᤱ ᤘᤠ᤹. ᤁᤖ ᤕᤠᤱᤛᤠᤁᤢᤴᤎᤣᤛᤠᤒᤠᤜᤠ᤹ ᤁᤢᤄᤠᤗᤧᤶ ᤐᤠᤱᤄᤢᤛᤡᤀᤠᤱ ᤘᤠ᤹ᤖᤥ॥

⁵⁴ᤂᤢᤏᤧ᤹ ᤀᤒᤪᤠᤜᤠᤔ ᤏᤢ ᤁᤢᤔᤢ᤹ᤀᤡᤍᤠᤱᤛᤠᤜᤠ᤹ ᤛᤍᤠᤍᤡᤱ ᤗᤢᤱᤔᤠ᤹ ᤋᤢᤰᤔᤠᤛᤡ ᤏᤡᤱᤘᤠ᤹ ᤀᤡ᤺ᤳᤋᤢᤀᤠᤱ ᤘᤠ᤹ᤖᤥ॥ ᤂᤢᤏᤧ᤹ ᤀᤠᤏᤡᤃᤧ ᤌᤠ᤺ᤰᤜᤠ᤹ ᤔᤧᤳᤋᤢᤛᤡᤒᤠ ᤜᤧᤰᤁᤣ ᤁᤢᤛᤣᤘᤠᤖᤥᤒᤠ ᤀᤡᤛᤪᤠᤀᤡᤗᤧᤴ ᤁᤢᤓᤠ᤹ ᤐᤡᤖᤢᤀᤠᤱ ᤘᤠ᤹ᤖᤥ॥”

⁵⁶ᤔᤖᤡᤕᤶᤔᤡᤴ ᤗᤠ ᤛᤢᤶᤛᤡ ᤌᤠᤖᤡᤰ ᤀᤡᤗᤡᤛᤡᤒᤠ᤺ᤴᤏᤢ ᤘᤕᤧ. ᤜᤧᤰᤁᤩᤠᤱ ᤁᤢᤜᤡᤶᤔᤥ ᤏᤢ᤺ᤰᤂᤧᤖᤥ॥

⁵⁷ᤜᤧᤰᤁᤩᤠᤱ ᤀᤡᤗᤡᤛᤡᤒᤠᤖᤧ ᤁᤢᤛᤠᤘᤠ᤺ᤶᤔᤠ ᤕᤧᤶ ᤋᤩᤧᤀᤠᤱ ᤕᤧᤶᤒᤡᤳᤇᤠ᤹ᤛᤠ᤺ᤎᤡᤰ ᤛᤠᤘᤠ᤺ᤴᤍᤢᤖᤥ॥

⁵⁸ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤜᤡᤶᤒᤣᤛᤠᤱᤒᤠᤜᤠ᤹ ᤏᤢ ᤁᤢᤃᤠ᤹ᤀᤡᤒᤠᤜᤠ᤹ᤖᤧ ᤁᤴ ᤍᤠᤱᤒᤠᤸᤗᤧ ᤂᤢᤏᤧ᤹ ᤗᤢᤱᤔᤠ᤹ ᤋᤢᤰᤋᤢᤒᤠ ᤐᤠ᤺ᤴᤏᤡᤴ ᤔᤧᤄᤧᤵᤛᤢᤀᤠᤱ ᤂᤧᤱᤜᤠ᤹ ᤂᤢᤏᤧ᤹ᤏᤢ ᤔᤧᤛ᤺ᤳᤋᤧᤖᤥ॥

⁵⁹ᤜᤧᤰᤁᤩᤠᤱ ᤀᤅᤧ᤺ᤰᤘᤠᤛᤠ᤺ᤴ ᤕᤧᤳᤇᤡ (᥎) ᤕᤧᤴᤏᤥ ᤜᤷᤍᤥ ᤔᤧᤜᤧᤃᤢ ᤔᤧᤒᤡᤖᤢᤒᤠ ᤌᤡᤶᤔᤥ ᤔᤧᤍᤩᤧᤀᤠᤱ ᤂᤢᤏᤧ᤹ ᤁᤢᤔᤡᤱᤅᤡᤴᤏᤠᤱ ᤁᤢᤶᤒᤠᤖᤧ ᤁᤢᤔᤡᤱ ᤁᤢᤀᤡᤛᤡ᤺ᤰ ᤈᤁᤖᤡᤕᤠ ᤔᤡᤱ ᤘᤠ᤺ᤵᤔᤠ ᤔᤧᤀᤡ᤺ᤳᤋᤢᤀᤠᤱ ᤔᤧᤘᤕᤧ.

⁶⁰ᤁᤖ ᤁᤢᤶᤔᤠᤖᤧ ᤔᤧᤳᤋᤢᤛᤡ “ᤔᤧ᤺ᤴᤗᤥ᥄ ᤁᤸᤗᤧ ᤁᤢᤔᤡᤱᤃ ᤕᤢᤜᤢᤴᤏᤠ ᤘᤠ᤺ᤵᤔᤠ ᤐᤥ᤺ᤱᤗᤥ॥”

⁶¹ᤂᤧᤱᤜᤠ᤹ᤖᤧ ᤁᤢᤶᤔᤠ᤺ᤴ ᤔᤧᤔᤧᤳᤋᤢ. “ᤂᤧᤏᤧ᤹ ᤁᤧᤃᤠ᤹ᤀᤡᤜᤠ᤹ᤀᤥ ᤀᤰᤋᤱᤒᤠ ᤔᤡᤱ ᤁᤧᤘᤠ᤺ᤵᤐᤠ ᤔᤏᤠᤜᤠ᤹ ᤔᤧᤜᤥ᤺ᤵᤗᤥ॥”

⁶²ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤈᤁᤖᤡᤕᤠ᤺ᤴ ᤜᤢᤰᤆᤠ᤺ᤸᤁᤡ᤺ᤸᤗᤧ ᤛᤣ᤺ᤴᤔᤧᤍᤥᤛᤢ. “ᤁᤸᤗᤧ ᤁᤢᤔᤡᤱ ᤌᤣ ᤘᤠ᤺ᤵᤔᤠ ᤏᤡᤱᤘᤠ᤹ ᤁᤧᤈᤥᤃᤢᤀᤠᤱ ᤁᤧᤘᤠ᤹ᤒᤣ᥅”

⁶³ᤂᤧᤸᤗᤧ ᤛᤠᤵᤔᤠ ᤛᤠᤔᤠ᤺ᤴ ᤏᤠ᤺ᤰᤋᤢᤛᤡᤀᤠᤱ ᤁᤸᤗᤧ ᤁᤢᤔᤡᤱ ᤕᤢᤜᤢᤴᤏᤠ ᤗ᤹ᤖᤡᤰ ᤛᤠᤵᤋᤢ ᤐᤡᤖᤢᤛᤡ॥ ᤜᤧᤰᤁᤣ᤺ᤸᤗᤧ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ ᤔᤕᤧᤖᤥ॥

⁶⁴ᤂᤡᤔᤥ ᤂᤧᤴ ᤐᤠ᤺ᤵᤔᤠ ᤜᤣ᤺ᤰᤋᤧᤀᤠᤱ ᤂᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤠᤖᤠ ᤑᤥ᤺ᤔᤠ ᤜᤣ᤺ᤰᤋᤢᤖᤥ॥

⁶⁵ᤂᤧᤱᤜᤠ᤹ᤖᤧ ᤂᤢᤏᤡ᤹ ᤜᤡᤶᤒᤣᤛᤠᤱᤒᤠᤜᤠ᤹ ᤂᤢᤏᤡ᤹ ᤏᤡᤱᤘᤠ᤹ ᤔᤕᤧᤖ ᤔᤧᤃᤡᤛᤧᤖᤥ॥ ᤕᤜᤢᤍᤡᤕᤠᤛ᤻ᤔᤠ ᤁᤠᤰ ᤁᤥ᤺ᤰᤔᤠ ᤑᤠᤱᤈᤱᤒᤠ ᤐᤠᤱᤓᤣ᤹ ᤂᤠᤖᤠᤰ ᤁᤴ ᤐᤠ᤺ᤴᤏᤡᤴ ᤛᤧ᤺ᤖᤧᤖᤥ॥

⁶⁶ᤜᤧᤰᤁᤩᤠᤱ ᤁᤴ ᤐᤠ᤺ᤴᤏᤡᤴ ᤁᤧᤄᤧᤶᤒᤠ ᤁᤧᤖᤧᤰᤗᤧ ᤂᤢᤏᤡ᤹ ᤏᤡᤱᤘᤠ᤹ ᤔᤕᤧᤀᤠᤱ ᤂᤧᤱᤜᤠ᤹ᤖᤧ ᤀᤰᤂᤣ ᤔᤧᤒᤠ᤺ᤳᤋᤢ. “ᤀᤠᤸᤗ ᤁᤴ ᤀᤅᤧ᤺ᤰᤘᤠ᤺ᤴ ᤋᤠ᤺ᤴᤍᤡ ᤌᤣ ᤐᤥ᤺ᤱᤒᤠᤀᤡᤖᤥ᥅” ᤌᤣᤀᤠᤱᤓᤧᤸᤗᤧ ᤍᤠᤱᤒᤠᤸᤗᤧ ᤁᤢᤜᤢᤰᤁᤡᤴ ᤂᤧᤴ ᤀᤅᤧ᤺ᤰᤘᤠ᤺ᤸᤗᤧ ᤁᤢᤛᤶᤍᤠᤱ ᤘᤕᤧᤖᤥ॥

⁶⁷ᤕᤢᤜᤢᤴᤏᤠᤖᤧ ᤁᤢᤶᤒᤠ ᤈᤁᤖᤡᤕᤠ᤺ᤴ ᤛᤣᤛᤣᤔᤠᤱᤅᤡᤸᤗᤧ ᤌᤢᤰᤋᤢᤀᤠᤱ ᤔᤠᤱᤏᤡᤱᤘᤠ᤹ᤐᤠ᤺ᤴ ᤐᤠᤖᤧ.

⁶⁸“ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤏᤡ᤹ ᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤠᤖᤠ ᤑᤥ᤺ᤛᤢᤶᤗᤥ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤁᤢᤔᤏᤠᤜᤠ᤹ ᤁᤶᤒᤪᤠᤱ ᤔᤧᤳᤋᤢᤛᤡᤀᤠᤱ ᤆᤥ᤺ᤰᤕᤢᤶᤓᤥ ᤐᤡᤖᤢᤛᤡᤖᤥ॥

⁶⁹ᤂᤢᤏᤧ᤹ ᤁᤢᤛᤣᤘᤠᤖᤥᤒᤠ ᤍᤠᤀᤢᤍᤖᤧ ᤁᤢᤜᤡᤶᤛᤕᤱᤗᤠᤶ ᤕᤠᤵᤔᤡ ᤛᤧᤴᤗᤵ ᤁᤧᤒᤡᤒᤠ ᤔᤢᤰᤁᤧᤃᤢᤒᤠ ᤛᤧᤴᤗᤵᤍᤠᤱᤒᤠᤎᤡᤰ ᤑᤥ᤺ᤰᤂᤢᤖᤥ॥