Lukas 1:28-69

²⁸Ey tu anghel, éy inumange siya ni Maria, a kinagi na diya, a “Maria, édse diko i Diyos, a kagbian na ka.”

²⁹Ey ti Maria, pékabati na to kagi no anghel, éy métageg siya, a mégéisipén siya éng anya wade i kahulugina na éya a kinagi na.

³⁰Ey kinagi no anghel diya, a “Diyan ka méganteng, Maria, da mahal ka na Diyos.

³¹Gemtén na Diyos a mangilog ka, a tulos magenak ka ta lélake. Ey ta kéenak na, Maria,” kagi na, “éy ngahinan mo siya ni Jesus.

³²Siya éy maging mataas, a dulawén de siya a anak na mataas a Diyos. Ey i Panginoon Diyos,” kagi no anghel, “éy gemtén na a maging hari siya, a kona to apo na a Hari Dabid to araw.

³³Sakay maghari siya du Judeo a éwan tu hanggan. Ey éwan tu katapusan i péghari naa!”

³⁴“Ey pakodya ye,” kagi ni Maria, “da éwanék pabi tu asawa?”

³⁵“Umange diko i Banal a Espiritu,” kagi no anghel, “sakay umédse diko i kapangyarian na Diyos. Kanya tu ienak mo, éy dulawén de a banal a anak na Diyos.

³⁶Ey entan mo ti dada mo a Elisabet, Maria. Kagi de a baug kan siya. Pero nadid, maski bakés dén siya, éy mabuktet dén siya.

³⁷Da makagimet i Diyos ta maski anya.”

³⁸“Ey maari,” kagi ni Maria, “da utusanék na Panginoon, éy tanggapén ko i kaluuben na diyakén.” Nadid, pégkagi ni Maria ta éya, éy gininanan siya no anghel.

³⁹Nadid, ta éya a panahun, éy inumange ti Maria to esa a banuwan ta buked ta Hudea,

⁴⁰a bumisita siya to dada na a Elisabet. Ey kédemét na to bile de, éy sinomdép siya a binati na tu dada na.

⁴¹Ey ti Elisabet, pékabati na to boses ni Maria, éy bigla a linuminés tu anak na ta tiyan na, éy tulos inumasék i Banal a Espiritu ni Elisabet.

⁴²Tulos kinagi na ni Maria ta medegsén, a “Masuwerte ka, Anéng, ta maski ti ésiya a bébe, da tu anak mo, éy siya i mahaléna na Diyos!

⁴³Salamat ta Diyos,” kagi ni Elisabet, “da bumisita dén diyakén tu ina na Panginoon ko!

⁴⁴Da entan mo, Maria,” kagi na, “to pékabati ko diko, éy linuminés tu anak ko ta tiyan kua, dahil ta kasahatan naa.

⁴⁵Masuwerte ka dén, Anéng, da naniwala ka dén to kinagi diko na Panginoon!”

⁴⁶Nadid, kinagi ni Maria i kona se: “Purién ko i Diyos ta isip kua!

⁴⁷Mésayaék, da Diyos i tagapagligtas kua.

⁴⁸Sakén i utusan na a mababa, éy pinansingék dén na Diyos. Sapul nadid, éy dédulawénék na tolay a masuwerteék,

⁴⁹dahil ta memahal a gimet na mataas a Diyos diyakén. Siya i banal.

⁵⁰Kékagbian na du umanteng diya, ta maski nikésiya a panahun.

⁵¹Sakay gemtén na i kapangyarian na a ibutan na du palalo a tolay, a patahantaén na i gayak dia.

⁵²Pinababa na dén du mataas, sakay pinataas na dén du mababa.

⁵³Du mégalép éy atdinan na side ta kanén de, sakay du mayaman éy paibutén na side a éwan side tu kébil a kanén.

⁵⁴“Nadid, éy inaguman na Diyos i katulung na a Israel. Ewan na naleksapan tu pangako na du apo-apo tam, a mangagbi dikitam. Kinagbian na ti Abraham. Sakay kagbian na be sikitam a apo-apo na, a éwan tu katapusan.” Saya i katapusana no kinagi ni Maria.

⁵⁶Ey kétapos na éya, éy tinumulos ti Maria to bile no dada na ta manga étélo a bulan, bagu nagsoli siya to bile na.

⁵⁷Nadid, kédemét na oras, éy nagenak ti Elisabet ta lélake.

⁵⁸Ey du tétotop na sakay du karatig na, pékabaheta de a nagenak dén, éy mésaya side diya, da kinagbian dén siya na Diyos.

⁵⁹Ey nadid, to ikawalu dén a aldew a idad no anak, éy dinumulug side to bile de Elisabet, a monda bugitén de tu anak, sakay ngahinan de. Talaga de a ngahinan siya ni Sakarias, da saya tu ngahen no ama na.

⁶⁰Pero “Ewan,” kagi no ina na. “Maigi pa éy ngahinan tam siya ni Juan.”

⁶¹“Ey bakit,” kagi de. “Ewan ka tu top a maski isesa a te ngahen ta kona sa!”

⁶²Tulos nisenyas de ni Sakarias éng anya i gustu na a ngahen no anak na.

⁶³Ey nihalimbawa ni Sakarias dide a atdinan de siya ta panulatan na. Ey to péngiatéd de diya, éy nisulat na i ngahen a Juan. Ey péketa du tolay ta éya, éy nagtaka side.

⁶⁴Nadid, bigla a nakapégkagi agad ti Sakarias, a tulos nagpasalamat siya ta Diyos.

⁶⁵Ey inumanteng dén du karatig na, éng anya i kahulugen na éya. Ey i éya a nanyari, éy nabahibaheta dén ta lebuta na éya a lugar ta Hudea.

⁶⁶Ey du étanan a nakabaheta, éy mégéisipén side ta éya a anak, éng maging anya siya. Da neta du tolay a édse diya i kapangyarian na Diyos.

⁶⁷Nadid, ti Sakarias a ama no anak, éy édse diya i Banal a Espiritu, éy naghula siya.

⁶⁸“Salamat ta Panginoon,” kagi na. “Siya i Diyos a péniwalaan du tolay a Israel! Da inumange se siya a méngiligtas du tolay na.

⁶⁹Paangen na dén se i tagapagligtas dikitam, a lahi siya no katulung na a Dabid.