Luuk 1:28-69

²⁸A angelo aave xo a savat sina e a xuuse, “A luaian xulum. A Piran a waan xuvul pama e a xafut nano pana roxoyan sina.”

²⁹Na Maria a mamaxus sena ferawaian sina e a lalamon faaxaves pana so ta buk fasusuian va malaan.

³⁰Taasaxa, a angelo a xuuse, “Muta mataut Maria, a Piran a faamamaas paaliu pama.

³¹No taa tiva e no taa luk a lak tomexaan. E no taa faꞌisine pa Yesus.

³²Nane tafe lava e ri taa xalie pana Lak Tomexaan sina Piran pana Isin Molava Paaliu. E a Memai Piran i taa faneie la vena naian lava si buna lava, na Devit.

³³I taa tagan vulan a matafetama si Yaakop. E a fatataganan sina i taa pife taxapus.”

³⁴Na Maria a fin a angelo, “I taa savat malaafaa senaso nenia, ne tefin palau.”

³⁵A angelo aave a suie, “A Vovau Xaradak i taa savat siim e a gutan sina Piran pana Isin Molava Paaliu i taa xafut nano. E no taa luk a Lak Xaradak e ri taa xalie pa Natuna Piran.

³⁶A tauma, na Elisabet, i taa luk a lak e nane ve a tefin vaiak. Nane piau ta lak lunai, taasaxa i taxa waan xo lana fulun pisaxa sina.

³⁷Piau ta mo a Piran pife fexaxaas sena vile.”

³⁸Na Maria a suie. “Nenia xa ne sisiak sina Memai. E ne kuus turoxo pana ferawaian siim.” E a angelo xo a taꞌulane.

³⁹La yaan aave xo na Maria tamasiak e fe laak fataapus xe la bina put pe Judia.

⁴⁰Pave nane fe laak la lifu si Sekaraia e fesuai se Elisabet.

⁴¹Layaan na Elisabet a langai a ferawaian si Maria, a popo la xuna a lalaas marasaxa. E na Elisabet febas paaliu pana Vovau Xaradak

⁴²e a ferawai falava paaliu e kuus, “Nano, no faamamaas paaliu sena maana lutefin e a roxoyan i taa xafut a lak aava no taa luxe.

⁴³Taasaxa, xenaso nano, nina Memai siak, no filimaan xena xalumau?

⁴⁴Layaan ne langai a ferawaian siim a lak la xuak a lalaas pana faamamaasan.

⁴⁵Nano, no fo namkai o a lagasai sina Memai xe siim i taa savat tuuna e voxo no taa faamamaas.”

⁴⁶E na Maria a yangan e a kuus, “A xunus iga a nangus a Memai

⁴⁷e a vovau siak a faamamaas pana Piran aava Nges Ina Vil Fatato siak.

⁴⁸Nane fo lamon faꞌuliau, ne sisiak palau sina. E naboxo a mu rabuna aava ri taa savat mui, ri taa xaliau pana tefin pana faamamaasan.

⁴⁹A Piran pana Maana Gutan Xapiak fo vil a maana mo roxo paaliu paga e a isina a taap e xaradak.

⁵⁰Nane tiuan a mamaaluxan sina xuluna mu rabuna aava ri suai faagut sena, a mu rabuna xapiak lana mu yaan xapiak.

⁵¹Pana mana, nane fo vil a maana buk faisok ina gutan: nane fo tapalan xolan a mu rabuna aava ri vil falavai nari xa lana lamonan fufunai siri.

⁵²Nane fo fapoxoi a mu paamua la venanai piranan siri e a faꞌisin a mu rabuna palau pana isin lava.

⁵³Nane fo famasi a rabuna aava ri lagai pana maana mo roxo taasaxa feng tapin a mu rabuna piran malaan sena valagof.

⁵⁴E malaan sena kuus fanaian sina, nane fo xavang a sisiak sina aava na Israel. E nane lamon faꞌuli na Abrahem e mu buna xapiak pana mamaaluxan sina.”

⁵⁶Lavaxa, na Maria a waan xuvul pa Elisabet pana fulun talatul e mui nane ulaa xe la lifu sina.

⁵⁷A yaan ina luluuxan xo a savat si Elisabet e nane luk a lak tomexaan.

⁵⁸A mu fesing sina e mu tauna ri langai o a Piran fo faxalite pana mamaaluxan molava e ri faamamaas xuvul pana.

⁵⁹La fapisiktulaana yaan sina lak aave ri savat xena putuxaana e ri buk faꞌisine sait pana isi tamana, na Sekaraia.

⁶⁰Taasaxa na ninana a kuus, “Piau, a isina na Jon.”

⁶¹Ri fiai, “Xenaso? Piau ta tauma pana isin malaan.”

⁶²E ri talangai pana mari xe sina tamana lak xena fine pana so ta isin rao i vubuk faꞌisin a lak pana.

⁶³Nane fiai pana mo ina kala e nane faꞌipul nari xapiak layaan a kala malaan, “A isina ve na Jon.”

⁶⁴Fataapus paaliu a valana talakas e a xalemana tamulus e nane tangpat pana kuus fati a isina Piran.

⁶⁵A mu fesing siri, ri ipul marasaxa. E pe Judia, lana bina put aave, a mu rabuna ri taxa lo ferawai pana maana mo aanabeꞌ.

⁶⁶Naseꞌ ta mataa a langai pana mo aanabeꞌ a lalamon pana e a fiai, “A lak aanabeꞌ i taa so ta buk mataa?” Senaso ri texaas o a gutan sina Piran a waan xuvul pana.

⁶⁷A tamana lak, na Sekaraia, a bas pana Vovau Xaradak e a kuus fatuxai malaan:

⁶⁸“Nangus a Memai aava Piran sina mu Israel senaso nane fo filimaan xena maraan faꞌuli a mu rabuna sina.

⁶⁹Nane fo fasavat a Saxa ina Gutan xena fakaxup netaara, a saxa aave a bu Devit aava sisiak sina.