SAN LUCAS 1:28-69

²⁸Chayaycurmi ángil caynog nergan: “¡María! ¡Tayta Diosnintsi acrashganmi caycanqui!”

²⁹Tsaynog niptinmi María yarpachacorgan: “¿Imanirtag tsaynog niman?” nir.

³⁰Tsaynog yarpachacuycaptinmi ángil caynog nergan: “María, ama mantsacamaytsu. Tayta Diosnintsimi gamta cuyashunqui.

³¹Cananpitaga gueshyagmi ricacunqui. Wawayqui yurenga olgumi. Paypa jutinmi canga Jesús.

³²Payga munayniyogmi cangapag. Tsaymi payta nipäconga Diospa tsurin cashganta. Paytami Tayta Diosnintsi churanga mandag rey cananpag, unay castan Davidtanog.

³³Paypa maquinchömi Israel runacuna imayyagpis cangapag.”

³⁴Tsauraga María caynog taporgan: “Runata manarag reguerga ¿imanogpatag gueshyag ricacöman?”

³⁵Niptinmi ángil caynog nergan: “Santu Espíritu gamman shamuptinmi Tayta Diosnintsipa munayninwan gueshyag ricacunquipag. Tsaymi wawayquipag runacuna nenga Diospa tsurin cashganta.

³⁶Tsaynogmi castayqui Elisabetpis, chacwanna caycar, wachangapag. Paytami runacuna: ‘Mana wachayta yachag’ nipäcorgan. Sogta quillanami payga gueshyag caycan.

³⁷Tayta Diosnintsipäga manami imapis sasatsu.”

³⁸Tsauraga María caynog nergan: “Nogaga Tayta Diospa maquinchömi caycä. Tsauraga pay munashgannog cayculätsun.” Tsaypitanami ángil aywacorgan.

³⁹Ángil nishganpita warantincuna María aywargan Judea provincia jircacho caycag marcaman Elisabetta watucunanpag.

⁴⁰Zacariaspa wayinman chayaycurmi saludargan Elisabetta.

⁴¹Saludaptinmi Elisabetpa pachancho caycag wamrapis cuyorgan. Tsauraga Santu Espiritupa munayninwanmi Elisabet cushicushpan caynog nergan:

⁴²“¡Lapan warmicunapitami Tayta Diosnintsi gamta acrashushcanqui! Gueshyag caycashgayqui wawayquita paymi imaypis yanapanga.

⁴³Cristupa maman caycar watucamänayquipäga ¿pitag cä noga?

⁴⁴Saludamashgayquita mayaycur pachächo caycag wawäpis cushicuypita cuyushgami.

⁴⁵¡Tayta Diosnintsi nishushgayquita cumplinanpag cashganta criyishgayquipitami imaypis yanapashunquipag!”

⁴⁶Tsauraga María caynog nergan: “Lapan shongöwanmi Tayta Diosnintsita alabä.

⁴⁷Salvacog Tayta Diosnintsi acramashganpitami cushicö.

⁴⁸Mana digno captëpis Tayta Dios cuyapämarmi acramashga. Cananpitaga imaypis runacuna nipäconga Tayta Dios acramashganta.

⁴⁹Munayniyog Tayta Diosnintsi alimi ricamashga. Paynöga manami pipis cantsu.

⁵⁰Pay munashgannog cawagcunataga imaypis cuyapanmi.

⁵¹Pipis mana rurashgancunatami payga ruran. Yachag-tucogcunataga manacagmanmi churan.

⁵²Mandag cashganpita nación mandagcunatapis gargun. Mana musyag-tucogcunatami itsanga ali cawananpag yanapan.

⁵³Muchogcunata micuyta camaripan. Mana cuyapäcog rïcucunatanami itsanga mana yanapannatsu.

⁵⁴Abrahamta promitishganta cumplirmi paypita miragcunata imaypis yanapan. Tsaymi Israel runacunata mana gongaylapa cuyapan.” Tsaynog nirmi Tayta Diosnintsita María alabargan.

⁵⁶Elisabet cagcho quimsa quillanog goyarcurnami wayinpana María cuticorgan.

⁵⁷Elisabetpa quillan aypämushgana captinnami olgu wamrata wachargan.

⁵⁸Wawayog cananpag Tayta Diosnintsi payta yanapashganpitami castancuna y reguinacushgancunapis cushicärergan.

⁵⁹Tsaymi pusag (8) junagniyog wamran caycaptin Zacariaspa wayinman paycuna aywapäcorgan wamranpa cuerpunta señalananpag. Tsaychömi taytanpa jutinta churapayta munapäcorgan.

⁶⁰Tsauraga maman caynog nergan: “¡Manami tsaynogtsu jutin canga! Juanmi jutin canga.”

⁶¹Elisabet tsaynog niptinmi waquin runacuna nipäcorgan: “Castayquicuna tsay jutiyog mana caycaptenga ¿imanirtag munanqui Juan jutin cananta?”

⁶²Tsauraga ima jutita churapänanpagpis sëñalapa Zacariasta tapupäcorgan.

⁶³Tapuptinmi pay manacorgan tacshala tablata tsaycho escribinanpag. Nircurna tsaycho escribergan: “Juanmi jutin canga” nishpan. Zacariaspis tsurinpa jutin Juan cananta munaptinmi tsaycho cag runacuna äyacashga ricacorgan.

⁶⁴Tsauraga jinan hörami shimin pashtarcuptin Zacarías Tayta Diosnintsita alabargan.

⁶⁵Tsaycunata ricaycur lapan reguinacushgancuna cushicärergan. Tsay pasashganpitami pï-maypis parlapäcorgan intëru tsay marcacunacho.

⁶⁶Tsayta mayagcuna yarpachacärergan caynog nir: “¡Cay wamra winarcur ima munayniyograg cayconga!” Runacuna parlashgannoglami tsay wamrata Tayta Diosnintsi yanapargan.

⁶⁷Tsauraga Santu Espíritu tantyatsiptinmi Zacarías caynog nergan:

⁶⁸“Israel runacunata yanapag Tayta Diosnintsi alabashga cayculätsun. Payga salvamänantsipagnami caycan.

⁶⁹Pay munashgannog cawag Davidpa castancunapitami munayniyog salvador yurengapag.