Luk 1:28-69

²⁸Pwen angelou ara iya kili yiy pe irawulohani yiy, ipa, “Yapan ita sura wou, pe koyun iti wou namandran iya.”

²⁹Pe Mariya ara ndriyan ipworu namandran iya, iya sehe nongan angelou kinpwai kinna kili yiy; pe iro lohonge soyon iya sehe ndroiyi nongan isa polohori yiy iya aliy.

³⁰Hapeko angelou ipwai iya kili yiy, ipa, “Mariya, mbuna anoh. Pahas ta Ngindrai ita kili wou.

³¹Kamulan mapundriyam, pe andre amwalahiy kiyata mbunah kamai hamou, pe andre apohowe ngalan, ara Yesu.

³²Yiy andre kirayah ndramat hamou namandran pe mangalan, pe andre hu kapohowe yiy Noru Yiy Hiyeh Iyera Paingan Masih. Pe Yapan Ngindrai andre kiyki yiy kirayah King, pe andre kiwiri ndrohonoku tumbun Tepit.

³³Pe yiy andre kiro King kili hu ndraye Yakop kinto-kinto, pe ndrohonoku pwanpwan ta King mepo andre kinhipwen pwi.”

³⁴Pwen Mariya isok angelou, ipa, “Melit aro andre kirayah tapeh? Paratesah, yo kunna polo hamou kamai mapu.”

³⁵Pe angelou isomwi yiy, ipa, “Pwoke ta Ngindrai Iyera Paingan Masih ara andre kiramburihi wou, pe Mwoiwan Haiyan andre kisa ndritam. Pwen pe yiy haiyan mepo namwalahiy kiyatan ara, ara andre kapohowe yiy Noru Ngindrai.

³⁶Animei, nayim Elisapet ara kinhi pihi parangoloh pwen, hapeko yiy mapundriyan, pe andre kipo norun kamai hamou. Pe yiy mepo hupa kinhopo norun pwi ara, ara walehen manonoh pwen imira.

³⁷Sehe melit pwokeyan mepo Ngindrai kinlahiy para kimbusiy pwi yeh?”

³⁸Pwen Mariya isomwi yiy, ipa, “Yo pihin para poya mbulya Yapan. Nongan mepo anpwai, ara hiyan para kirayah mannan kisa kili yo.” Pwen angelou itali yiy pe iyau.

³⁹Iro mwonen ara, Mariya ihikule yiy, pe ileheleh iya kol hakol ngawan ita nondriya hu ngondron para kol namandran hape Yutiya.

⁴⁰Pe iyarayah iya pe isong iya nondriya suwe Sekarayah, pe irawulohani Elisapet.

⁴¹Iro mwonen Elisapet ihilingi yohola Mariya, pwen mbunah iro ndriyan ara ilohori yiy. Pe Elisapet ara ipep iyata Mwoiwan Haiyan.

⁴²Pe iwayeh namandran iya, ipa, “Ngindrai ara kintoholi wou pwen mwalinga hu pihin masih. Pe norum mepo namwalahiy kiyatan, ara kintoholi yiy.

⁴³Yo po hiyeh, pwen pe tina Yapan to isarayah isa kili yo?

⁴⁴Pe iro mwonen ndraingo ihilingi yoholam, pwen mbunah iro ndriyo ara ilohori yiy iyapolo pwesai.

⁴⁵Yapan kitoholi yiy mepo kinpwotisingi lohongan tehe sehe melit mepo Yapan kinpwai kinna kili yiy, ara andre kirayah mannan.”

⁴⁶Pwen Mariya ipa, “Lohongo ihiri ngala Yapan,

⁴⁷pe mwoiwo ipwesani Ngindrai, Yiy Ngara Kisopwat Yo.

⁴⁸Yo pihin mwaihei para poya mbulyan, pe lohongan ngara kiti yiy mepo iyki yiy iya pwan. Pe kiro matne mahapo kiya, hasap kiyau hasap, ara andre hu kapa tehe Yapan kiniyki lomwes kinsa kili yo.

⁴⁹Yiy Hiyeh Mepo Pwokeyan Masih ara, ara kinmbusi melit namandran iya kinsa kili yo— pe ngalan ara haiyan.

⁵⁰Pe koisirai tan ara andre kisalti hu mepo huro pahandra nohowai tan, hu hasap kiyau hasap.

⁵¹Pe yiy imbusi hu mbulen pwokeyan iya, pe irasumbuwani hu mepo ngara hu kasikiye hu koro nondriya lohongahu.

⁵²Pe irapiyani hu king pwokeyan iya husa pwan husa mawen ndrohonokuhu, pe ihiri hu ndramat mepo ngalahu pwi.

⁵³Pe hu ndramat mepo hu mundrui, ara iyki hu melit hiyan iya kili hu, pe isihi hu. Hapeko irasses hu ndramat mameltahu soyon iya, ara huyau o mwaihei.

⁵⁴Pe kinsopwat ndramiran hu para Yisrayel, pe koyun kintut koisirai tan pwi, pe andre kinto-kinto kiya kili

⁵⁵Apraham pe ndrayen hu, tehe kinpwai pwen kinna kili tamarou hu.”

⁵⁶Pe Mariya ara iyepolo Elisapet iho pakeh tehe walah maroyoh. Pwen iyamulan imui iya kolon.

⁵⁷Pwen irahihini lenge Elisapet para nakimwalahiy ta mbunah, pwen imwalahiy ta norun kamai.

⁵⁸Pe yowen hu pe hu mepo huro pakeh kili Elisapet, ara huhulingiy tehe Yapan kiniyki koisirai tan namandran kinna kili yiy. Pwen yihu masih ara, ara hupwes iyasura yiy.

⁵⁹Pe iro mwonen lang mandrolwoh para yihu nakasondriti kapilo mbunah, ara yihu pakayoh ngalan kiya pihisali taman Sekarayah.

⁶⁰Hapeko tinan ipwai iya hu, ipa, “Pwi yoh! Andre kayoh ngalan Yohanes.”

⁶¹Pwen hupwai iya kili yiy, hupa, “Hamou kinho mwalinga yowem hu, ara ngalan tehen tora pwi.”

⁶²Pwen huwong kaipisa nongan iya nima hu iya kili taman, para hu pakayirowei tehe inamili ngala mbunah kiya hiyeh.

⁶³Pe ipwai iya kili hu para hu kawiri melit handra kisa para kiratuluwi nongan kaliy, pe mwoiwahu masih ara ihin tehe iratuluwiy, ipa toro: “Ngalan ara Yohanes.”

⁶⁴Pwen hape pwi ko, poho Sekarayah ite pe kalamen imemeyeu pe iwong imwonen, pe ihari ngala Ngindrai.

⁶⁵Pe hu ndramat masih mepo huro pakeh kili yiy, ara nohowai iwiri hu. Pe tiyeya hu melit masih ara, ara ingau pe isalti ngondron para kol namandran hape Yutiya, pe hu ndramira kol ara huye pwahaltaniy.

⁶⁶Hu ndramat masih ara huhulong pe huro lohonge soyon pe huro sok, hupa, “Mbunah aro ara andre kirayah hiyeh ndrokonan?” Huro sok tehen tora, paratesah, pwoke ata Yapan ara iro kili yiy.

⁶⁷Pe Sekarayah, tama Yohanes, ara ipep iya Mwoiwan Haiyan, pe iwong tehe poropet hamou, ipa toro:

⁶⁸“Kahari ngala Yapan Ngindrai para Yisrayel, paratesah, yiy ara kinsa pwen pe kinsopwat worou ndramiran.

⁶⁹Yiy ara kiniyki pwoke kinna kili ndramat hamou para kisopwat tou iripo nondriya kamaye Tepit, ndramat para poya mbulyan,