Lucas 1:28-69

²⁸Kiro Tupana'gapyrive'ga ruri Mariava'ea pyri javo ahe ve: —Ejoryjory ti, ei ga. A'ereki Tupana'ga omombyry nde ve okovo nde pyri. Koji'i Tupana'ga imombyryvi nde ve kunhangwera'g̃a pe hohe, ei ga Mariava'ea pe.

²⁹Omyi Mariava'ea py'a Tupana'gapyrive'ga imombe'urame ahe ve. Oyvyteri pe ahe ei: “Marag̃atu ga ei ji ve ra'e?” A'ea ahe ei ojapyakavo hehe ikwahave'yma.

³⁰A'ero Tupana'gapyrive'ga ei: —Maria, ei ga ahe ve. Terekyhyji! A'ereki Tupana'ga imombyryvi nde ve.

³¹Ji rendu ti! Ndepuru'a po ti nde nehẽ, ei ga. A'ero po ti nde eja'yra'ga mbo'ari nehẽ, ei ga Mariava'ea pe. Jesus emondo ti inog̃a gareraramo.

³²Huvihavuhu hete po ti ga nehẽ, ei ga. Nhandepojykaharete'ga Tupana'ga koji'i ipopoaka hete g̃a hohe pa. Jesus'ga pe po ti ga ei nehẽ jira'yra'ga. Tupana'ga tuhẽ po ti ga mongoi nehẽ eko ti huvihavuhuhetero javo. Nahã po ti ga huvihavuhuhetero g̃wamonhava'ea py'rovo Daviva'ea py'rovo nehẽ, ei Tupana'gapyrive'ga.

³³Nane'ymi jipi po ti ga rekoi Jacóva'ea rakykwepohara'g̃a nduvihavuhuhetero gwe'yja'g̃a nduvihavuhuhetero nehẽ. Avuirama po ti ga rekoi huvihavamo nehẽ, ei Tupana'gapyrive'ga Mariava'ea pe.

³⁴Kiro Mariava'ea ei: —Akwaimbae'g̃a ndajirerekoi ve, ei ahe Tupana'gapyrive'ga pe. Ma po ti ji puru'aro nehẽ naerũ? ei ahe ga pe.

³⁵A'ero Tupana'gapyrive'ga ei ahe ve: —Pyry hete Tupana'ga ra'uva. Tupana'ga ipopoaka hete ojipe'g̃a hohe pa. Aerẽ po ti gara'uva jyvi ua nde pyri nehẽ. Opopoakara pyvõ po ti Tupana'ga tayri'ga mondoi nde pype a'ero nehẽ. Nahã po ti ga ndera'yra'ga apoi nde ve nehẽ, ei ga Mariava'ea pe. Nurã ombo'arame po ti ndera'yra'ga pyryhetero nehẽ. “Tupana'ga ra'yra'ga,” e po ti g̃a ga pe nehẽ, ei ga ahe ve.

³⁶—Ji rendu ti! ei ga ahe ve. Erekwaha nde eje'yjahẽa Isabelhẽa. Hẽa ipuru'a no. Ig̃waivĩ hẽa kiro a. Ymya g̃a ei: “Ndata'yri tuhẽ hẽa.” Nahã g̃a ei. Emo seis hẽa omondo jahya opuru'arame. Kiro po ti hẽa gwa'yra'ga mbo'ari nehẽ.

³⁷A'ereki Tupana'ga pe ahã onhimiva'ea, ei ga imombe'gwovo.

³⁸A'ero Mariava'ea ei Tupana'gapyrive'ga pe: —Ji ko Tupana'gareheva'ea. Na ti ji puru'aro a'ero nehẽ ganhi'ig̃a rupi nehẽ – kiroki a'ea nde eremombe'u ji ve, ei ahe ga pe. A'ero Tupana'gapyrive'ga hoi ahe hugwi.

³⁹Aerẽ Mariava'ea herekokatui ombate'ria. Kotihĩ ahe herohoi yvytyruhua rupi Judéiapeve'g̃a gwyri pe yvytyruhupeve'g̃a gwyri pe ogwovo pevove'g̃a cidade pe.

⁴⁰Pevo Zacariasva'ea ronga pe ahe hoi ogwovo Isabelva'ea pyri. —Kirog̃we ji ruri, ei ahe Isabelva'ea pe.

⁴¹A'ero Isabelva'ea ra'yrava'ea Isabelva'ea avykyi aheyvyteri pe ahe Mariava'ea nhi'ig̃a renduvame. Kiro Tupana'ga ra'uvapyryva ruri Isabelva'ea pyri ahe pojykavo.

⁴²Nurã Isabelva'ea nhi'ig̃a hahyahi hẽa erame: —Koji'i Tupana'ga imombyryvi nde ve kunhangwera'g̃a pe hohe, ei Isabelva'ea Mariava'ea pe. Aerẽ po ti Tupana'ga imombyryvi ndera'yra'ga pe nehẽ no.

⁴³Nde ko jipojykaharete'ga yhẽa reki. Kiro po ti nde ga mbo'a nehẽ. A'ero nde huvihava. Jihi okoteheva'ea ko ji. Emo nde erejo jitehe ji repiaga! ei ahe Mariava'ea pe onhimomby'avo.

⁴⁴Nenhi'ig̃a ji henduvame kotihĩ jira'yra'ga roryroryvamo ji avykyavo jiyvyteri pe ko, ei ahe Mariava'ea pe.

⁴⁵Pyry hete nde ve. A'ereki nde Tupana'ga nhi'ig̃a rerovia na tuhẽ po ti a'ero nehẽ javo, ei Isabelva'ea Mariava'ea pe. Tupana'ga po ti nopiriani tuhẽ onhi'ig̃a nde ve nehẽ, ei Isabelva'ea.

⁴⁶A'ero Mariava'ea ei: —Ambohete tuhẽ ji Tupana'ga jipojykaharete'ga jipy'a pe. Huvihavuhu ko nde epyryvamo, a'e ji ga pe.

⁴⁷Tupana'ga ji mbohoryory ojihe, ei ahe. Jiyvyteri pe ji jiroryrory. A'ereki ga nhimbopiro'yharamo oko.

⁴⁸Ji ko gareheva'ero, ei ahe. Ji rendu ti! Kiro ji ndakotehea'javi reki. A'ereki ga ji repia katu ji moka'nhyme'yma. Nurã kiro po ti yvyakotyve'g̃a epavi nehẽ pyry hete hẽa pe javo ji ve, ei Mariava'ea.

⁴⁹A'ereki Tupana'ga ipopoakaheteve'ga ji poko hete. Anhimomby'a ji ga rehe. Pyry hete tuhẽ ga.

⁵⁰Nane'ymi ga g̃a arõhetei g̃a pokoga – kiroki g̃a ganhi'ig̃a rupi oko ga mbohetepota. Oporogwety ga g̃anda'yra'g̃a g̃anymymino'g̃a no – kiroki g̃a ganhi'ig̃a rupi oko ga mbohetepota. Oporogwety ga g̃anamonha'g̃a no – kiroki g̃a ganhi'ig̃a rupi oko ga mbohetepota, ei Mariava'ea.

⁵¹Ga okwahavuka opopoakara. Ombokwaki'o ga onhimboheteve'g̃a.

⁵²Ga omombo huvihava'g̃a tapekoa'javi ti huvihava kiro javo g̃a pe. Okoteheve'g̃a ga omongouka reki eko ti huvihavamo kiro javo g̃a pe, ei Mariava'ea.

⁵³Ga omondo pyryva'ea imbatere'ỹve'g̃a pe. Imbateve'g̃a ga omondouka reki ojihugwi. G̃apojate oho a'ero.

⁵⁴Tupana'ga nomoka'nhymi onhi'ig̃agwera ojiheva'ea pe israelitasva'ea pe. Oko ga g̃wembi'ea rupi ahe pokoga, ei Mariava'ea.

⁵⁵Ymyahũ ga nhi'ig̃atui nhaneramonhava'ea pe Abraãova'ea pe. Aerẽ ga nhi'ig̃atui aherakykwepoharava'ea pe israelitasva'ea pe. “Nane'ymi ji pe pokogi jipi,” ei Tupana'ga ahe ve. “Penymymino'g̃a po ti ji g̃a pokogi nehẽ no,” ei ga. Na tuhẽ reki. Nomoka'nhymi ga ahe pokoga. Ga po ti nhande pokogi nehẽ no, ei Mariava'ea. Nhanenymymino'g̃a po ti ga g̃a pokogi nehẽ no. G̃anymymino'g̃a po ti ga g̃a pokogi nehẽ no, ei Mariava'ea.

⁵⁶Kirẽ Mariava'ea três jahya mondoi gwerevi opytavo Isabelva'ea pyri. Aerẽ ahe jivyri ogwovo g̃wonga pe.

⁵⁷Kiro Isabelva'ea ra'yrava'ea ahava. A'ero ahe gwa'yrava'ea mbo'ari.

⁵⁸Aherongapypeve'g̃a okwaha ahere'yja'g̃a pavẽi Tupana'ga pyryhetea ahe ve ga ahera'yrava'ea mbo'arukaro g̃waramo ahe ve. A'ero g̃a ndoryndoryvamo Isabelva'ea pavẽi.

⁵⁹Sete tay'riva'ea kiri o'arirẽ. Ko'emame aherakwanhapi'ria kytihava. A'ero g̃ande'yja'g̃a nduri hepiaga. Tay'riva'ea rehe g̃a inombotari ahereraramo ahepo'ria rera Zacarias po ti garera nehẽ javo.

⁶⁰A'ero ahe'yembora ei: —Ahã te! Poi rũi po ti garera nehẽ. Garera po ti João nehẽ, ei Isabelva'ea.

⁶¹A'ero g̃a ei ahe ve: —Maraname nde ei nahã? Ndogwerekoi ndere'yja'g̃a a'ea gwera, ei g̃a.

⁶²Opoa pyvõ g̃a ei tay'riva'ea po'ria pe marãva'ea nde erepota garera naerũ javo.

⁶³A'ero Zacariasva'ea poeruri peru ti ji ve ikwatijahava javo. A'ereki ahe nonhi'ig̃i. G̃a imondorame ikwatijahava ahe ve, ahe ikwatijari inog̃a: “Garera ko João.” G̃a nhimomby'apavi aherera repiaga.

⁶⁴Kiro kotihĩ Zacariasva'ea nhi'ig̃a'javi a'ero. —Pyry hete Tupana'ga, ei ahe ga mboheteavo.

⁶⁵Zacariasva'ea nhi'ig̃ame ahekotyve'g̃a kyhyjipavi. Hehe g̃a nhomonhi'inhi'ig̃i imombe'gwombe'gwovo pa yvytyvytyruhupeve'g̃a pe nhaporemo Judéiapeve'g̃a pe.

⁶⁶Kiroki g̃a g̃wendu Zacariasva'ea mombe'ua tay'riva'ea mombe'ua no – g̃a nhaporemo ojapyaka hehe. A'ero g̃a ei: —Tayri'ga po ti oko huvihavuhuro a'ero nehẽ! ei g̃a. A'ereki Tupana'ga popoakahetea oko tay'riva'ea rupi.

⁶⁷Tay'riva'ea po'ria Zacariasva'ea, ahe kiro Tupana'ga ra'uva ahe pojykai. A'ero ahe imombe'ui Tupana'ga rembikwahavukara javo:

⁶⁸—Timbohete ti nhandepojykaharete'ga israelitas'g̃a pojykaharete'ga Tupana'ga! A'ereki ga uhu nhande pokoguka ojiheva'ea pokoguka nhande mbopiro'yavouka, ei Zacariasva'ea.

⁶⁹Ga ombuhuruka ipopoakaheteve'ga toko ti ga g̃ambopiro'yharamo javo. Garamonhava'ea ko Daviva'ea Tupana'gareheva'ea, ei Zacariasva'ea.