Luke 1:28-69

²⁸Ta tovaleʼewa nana voneaya, “Kaiwa Meli, Yaubada ena veyoluba qiduana ʼiuya. Ta oʼa Kaiwabu maega.”

²⁹ʼInega Meli nuana voqana ta wese nuana vetonovea vona nana ana alamani weaqina.

³⁰Ta tovaleʼewa nana Meli voneaya, “Gebu una mwaniniva, mana Yaubada ena veyoluba qiduana ʼiuya.

³¹Nawale una valagata ta natuhu meʼolotona una venatunea ta ana wawa una gabea Ieisu.

³²Nawale tauna naveqidua vaʼine ta tomotau ina gabea Toatoa Vanena Natuna. Ta Kaiwabu Yaubada nawale ena waiwai naneia ena vetoluvine weaqina ʼidewana lova tubuna Deibida ʼabiluvine.

³³ʼInega me Isileli naluvinedi, ta ena ʼEbeluvine gebu nahawala.”

³⁴Ta Meli tovaleʼewa nana voneaya, “Maʼoda ʼedewana ena valagata ʼaiqa, mana yaʼa nawale matayauyogu ta ge eda vaqi?”

³⁵ʼInega tovaleʼewa nana Meli voneaya, “Niboana Gwalagwalana nawale nawebui mai ʼiuya ta Yaubada Toatoa Vanena ena waiwai ʼinega una valagata. ʼInega natuhu gwalagwalana una venatunea, tauna ina gabea Yaubada Natuna.

³⁶Ta una nuaia nibaiu Elisabeti niʼa vekofekofe ta gagalina be tomotau ivonea ge ana fata navenatuna. Ta tauna tawa vegamwegamweʼi ta ena waiʼena vesikisina niʼa lobea.

³⁷Mana yani qabuna Yaubada ana fata!”

³⁸ʼInega Meli voneaya, “Yaʼa Yaubada ena tofewa taha, ʼinega tolaʼai niʼau usimanea naʼifoqe ʼiguya.” ʼInega tovaleʼewa nana Meli nogei ta tauya.

³⁹Ta ge tuta kuena ʼabibodanaya Meli lukwayavonega tutuvila tauya ta diʼwe Iudia bwanaganavo ʼevataonidi, ʼinega taha ʼabaga ʼinaya ʼifoqe.

⁴⁰ʼInega Sakalaia ena vanuea lugu ta nibaina Elisabeti lukaiwa ʼinaya.

⁴¹Ta tutana Elisabeti Meli ena vekaiwa noqolia ʼinega gwama gamonaya nidoa ta Niboana Gwalagwalana Elisabeti luveagatunaʼia.

⁴²Ta bonana qiduanega gaba vonaya, “Oʼa Yaubada vivine qabudi ʼidiega niʼau venuaʼivineu ta veveyolubeu, ta natuhu nawale una venatunea tauna Yaubada veveyolubea.

⁴³Yaqaiqaiawa qiduana mana yaʼa vavine kavokavovo ta oʼa Yaubada ena venuaʼivina nawale egu kaiwabu una venatunea, ta umai sabi vayausigu!

⁴⁴Tuta nana eu lukaiwa yanoqolia, ʼinega gwama me ena qaiawa gamoguya nidoa.

⁴⁵Ta oʼa toveyoluba aqiaqi, mana Kaiwabu ena vale ʼiuya uvetumaqanea ʼinega nawale ana aqiaqi naʼifoqe.”

⁴⁶Ta Meli vonaya, “Tuta qabuna giwaliguyega Kaiwabu yahawahawatuboya,

⁴⁷ta yaqaiqaiawa Yaubada tauna agu Toʼetoyavua ʼinaya.

⁴⁸Mana tauna ʼita webui mai ʼiguya yaʼa ena tofewa tonuawebui. ʼInega tuta maimai ʼidia lagata ʼevaudi ina ʼawahaqiaqiegu yaʼa toveyoluba,

⁴⁹mana Yaubada tauna Tovewaiwai otaqa ta yani waiwaina viaqia weaqigu. Tauna ana wawa gwalagwalana.

⁵⁰Tauna ana toʼamayabayavo lagata ʼaidega ʼaidega ʼidia ena nuakolokolo ge nahawala ta ʼesi naʼeno vataya.

⁵¹Ta vonahaqiaqi, taudi tonuavane nimana waiwaina ʼinega ʼauefaledi.

⁵²Tauna toluvine kaikaiwabudi aʼuwebuiedi edi ʼebetoa kaikaiwabuna ʼinega, ta taudi tonuawebui givaneyedi.

⁵³Ta wese tobotana veʼainidi ʼabo gamodi ʼelukoko, ta tovekaikaiwabu nima ʼavaʼavadi vetune ʼeviviedi.

⁵⁴Ta tauna ena vona fofofola ge danuafania, ʼinega itaʼa me Isileli nuakolokoloyeda be iuleda.

⁵⁵Vonahaqiaqi, ʼaqegigidavo Ebelamo me ena gadeavo Yaubada vona fofofola ʼidia be nanuakolokolo vatayeda.”

⁵⁶Meli ena vonayavo luʼovoidi, ʼinega nibaina maega itoa waiʼena toi ʼidia, ʼinega ʼabiboda ʼevivi ena ʼabagaya.

⁵⁷Elisabeti ena tuta niʼa lobea ʼinega gwama meʼolotona venatunea.

⁵⁸Ta edi gadeavo wese ediavo Yaubada ena veyoluba ʼidia weaqina inoqolia ʼinega qabudi iqaiawa qiduana.

⁵⁹Ta gwama nana ena ʼaubena veʼeitina (8) niʼa lobea, ʼinega ena qabuyavo ivaʼauta mai ʼwafina sabi daʼana, ʼidewana lova Yaubada luvine Ebelamo neia. Ta wese nuanuadi ina gabea tamana Sakalaia waviana.

⁶⁰ʼInega inana iawatayedi ivonedia, “Gebu, gwama baʼe kana gabea ana wawa Ioni.”

⁶¹ʼInega qabu diavona ivonaya, “Benaʼe wawa nana omiʼa gademina ge ami wawa.”

⁶²ʼInega venima giyoyowega tamana ivetalaʼaiea maʼoda gwama ana wawa nagaba ʼaiqei.

⁶³ʼInega Sakalaia ʼebeʼwayavi weaqina noqi ta ineia, ʼinega gwama nana ana wawa ʼwayavia baʼe ʼidewana, “Ana wawa Ioni.”

⁶⁴Ta omoʼe tuta nana ʼinaya Sakalaia meana meaqana ʼevivi, ʼinega veqae ta Yaubada awatuboya. ʼInega qabu koyadi wawa nana iʼitea ʼabo nuadi voqana qiduana.

⁶⁵Ta totoa ʼabaga qabudi baʼe yani diavona weaqina nuadi voqana qiduana. ʼInega tomotau edi veqae ʼinega valena yawala dadana diʼwe Iudia bwanaganavo ʼidia.

⁶⁶Ta tomeqabu vale baʼe inoqolia nuadi ivetonovea, ʼinega taudiega ivetalaʼaiedi ivonaya, “Tolaʼai nawale naʼifoqe baʼe gwama nana ʼinaya ta maʼoda naviaqa ʼaiqa?” Mana iʼitea Yaubada ena waiwai ʼinaya ʼenoʼeno.

⁶⁷Ta Ioni tamana Sakalaia Niboana Gwalagwalana luveagatunaʼia ʼinega simana ʼifoqe vonaya,

⁶⁸“Kaiwabu kana awatuboi, tauna me Isileli eda Yaubada, mana niʼau vayausida be toa vita ʼinega liʼamida.

⁶⁹ʼInega Yaubada ena tofewa tubuda Deibida ena gadeyega ada Toʼetoyavua veʼifoqeyea ʼidaya, ta tauna Tovewaiwai vaʼine.