LUKA 1:28-69

²⁸Aneru na ia dekenai e raka vareai, eto, Ba mauri, e lalokau henimumu hahinemu! Lohiabada ese baine bamomu.

²⁹Una hereva dainai ia na kudouna e hetaha, bona lalona e haguhi, una hahenamo anina be dahaka.

³⁰A aneru ese e hamaoroa, eto, Maria e, asio gari, badina be Dirava ena harihari ome abia.

³¹Oi na do ba rogorogo, mero ta bavabia, ladana ba hatoa IESU.

³²Ia na baine herea dae, Herea Mikamika Natuna bae gwauraia; Lohiabada Dirava ese tamana David ena terono na baine henia;

³³Iakob ena iduhu baine halohiaia hanaihanai; ena basileia na basine doko.

³⁴Maria ese aneru e hamaoroa, eto, Lau na tau asi dibagu, ina be ede baine vara toma?

³⁵Bena aneru na e haere, eto, Lauma Helaḡa na latamu ai baine diho, bona Herea Mikamika ena siahu ese baine hakerukerumu; bena oiemu amo baine vara merona helaḡana na Dirava Natuna bae gwauraia.

³⁶Ba diba danu, oi varavaramu Elisabeta na burukana ai vada e rogorogo; gabani e gwauraia, to ena hua ihatauratoina binai.

³⁷Badina be Dirava na ḡau iboudiai ikaradia mai dibana.

³⁸Maria eto, Lau na Lohiabada ena hesiai hahinegu; emu hereva heḡereḡerena ai egu ai baine vara. Bena aneru na iena amo e raka oho.

³⁹Unu dinadia ai Maria e tore isi, e raka haraḡa Iuda ororodia hanuana ta ela,

⁴⁰Sakaria ena ruma ai e dae Elisabeta e hanamoa.

⁴¹Elisabeta ese Maria ena hahenamo herevana e kamonai negana ai na natuna na bogana ai vada e marere; bona Elisabeta na Lauma Helaḡa ese a rohea.

⁴²Bena e hereva badabada, eto, Hahine iboudiai bogaragidiai oi mo sibomu namo herea, bona bogamu anina danu namo herea.

⁴³Egu namo be dahaka bena egu Lohiabada sinana dekegu vada ema?

⁴⁴Badina be emu hahenamo mamina na taiagu ai e vareai negana ai na natugu na bogagu ai e marere, moale dainai.

⁴⁵Abidadama hahinemu, vada o namo; badina be Lohiabada ena amo o kamonai herevadia do bae momokani.

⁴⁶Bena Maria eto, Lau lalogu ese Lohiabada eme imodaia,

⁴⁷Bona laumagu ese danu ihamaurigu Diravana eme moalelaia;

⁴⁸Badina be ia ese ena hesiai hahinena ogoḡamina e haḡerea, Taunabunai ini amo uru iboudiai ese bae hanamogu;

⁴⁹Badina be Siahu Diravana ese hoa karadia egu ai eme havara; Ia Iadana na Helaḡa.

⁵⁰Ena hebogahisi na uru uru idoidiai Ia garina e garimu taudia latadiai.

⁵¹Ia imana ese ena goada vada e hahedinaraia: Lalodia e hekokoroku taudia ia ese e hakarohodia,

⁵²Bona Iohia na edia helai ḡaudia amo ia ese vada e dolidia dobi, A ogoḡami taudia ia ese vada e abidia isi;

⁵³Hitolo taudia ia ese ḡau namodia amo bogadia vada e hakunu, A taḡa taudia ia ese ima kavakavadia e haloudia.

⁵⁴Ena hesiai besena Israel ia ese vada e kahaia, Ena hebogahisi vada e helalolaia une,

⁵⁵Seneda e gwau henidia hamata heḡereḡerena, Abraham mai garana ida do baine bogadia hisi hanaihanai eto.

⁵⁶Bena Maria na Elisabeta ida e nohova hua toi, gabeamo ena ruma e lou henia.

⁵⁷Elisabeta ena mara neganla e gini dae, mero ta vada e abia.

⁵⁸Bena dekena taudia bona varavarana ese Lohiabada ena harihari-bada ienai vada e vara harina e kamonai, idia na ia ida e moale hebou.

⁵⁹Dina ihataurahanina ai, idia na mero iperitomena totona e hebou, bena ladana bae hatoa Sakaria, tamana baine nemaia eto.

⁶⁰To sinana e haere, eto, Lasi, ia ladana na Ioane.

⁶¹Idia eto, Be, una na emu iduhu tauna ta ladana a?

⁶²Bena idia ese tamana matadia ai e kunumaia, mero ladana ede bae hatoa toma.

⁶³Ia ese toretore ḡauna ta e gwauraia, bena ini e torea toma: ia ladana be Ioane.

⁶⁴Una negana ai uduna e haḡaia, malana danu e maoro, bena e hereva, Dirava e imodaia.

⁶⁵Taunabunai, dekedia taudia iboudiai na gari ese e butudia tao; bona unu kara haridia na Iudea ororodia hanuadia iboudiai lalodiai vada e piua.

⁶⁶Bena e kamonai taudia iboudiai e lalo tao; eto, Ina mero na ede baine heto? Badina be Lohiabada imana na ia latanai.

⁶⁷Lauma Helaḡa ese mero tamana Sakaria e rohea, bena e haroro, eto,

⁶⁸Lohiabada, Israel ena Dirava, aita hanamoa, Badina be ia ese ena bese taudia vada e vadivadidia bona vada e hamauridia.

⁶⁹Hahemauri badina ia ese vada e havaraia ita eda, Ena hesiai tauna David ena iduhu amo,