Louk 1:28-69

²⁸Gabwiyèl pawèt douvan fi-a, i diʼy, “Bonjou! Ou ja twouvé favè èk Bondyé, èvèk Bondyé épiʼw.”

²⁹Mari té distwé, épi sa chagwinen lèspwiʼy. I katjilé, “Ki sa nanj-lan té vlé di pa sa?”

³⁰Nanj-lan di fi-a, “Mari, sé pa pou ou pè, paski Bondyé ja fèʼw an favè.

³¹Touswit ou kay vini gwo bouden, épi gason-an ou kay fè-a, ou kay bay nonʼy Jézi.

³²I kay ni pouvwa, épi yo kay kwiyéʼy Gason Bondyé. Épi Bondyé Senyè kay ba li kondwit gwanpapaʼy, Wa David.

³³I kay kondwi jan Izwayèl pou tout tan.”

³⁴Mari wéponn, “Ki mannyè sa kay fèt lè mwen pʼòkò kouché épi pyès nonm?”

³⁵Nanj-lan wéponn li, “Lèspwi Bondyé kay vini anlèʼw, èk pouvwa Bondyé kay kouvèʼw kon yon lonbwaj. Ou kay twapé kòʼw gwo bouden, épi ti manmay-la ou kay fè-a kay Gason Bondyé. I kay pawfé san pyès péché.

³⁶Épi jis fanmiʼw Élizabèt yo di ki té bwanhany, jòdi-a sé sis mwa dépi i gwo bouden an vyéyès li,

³⁷paski la pa ni anyen Bondyé pa sa fè.”

³⁸Mari di, “Mwen sé sèvant Bondyé. Kité tout sa ou di-a fèt.” Èk apwé sa nanj-lan kitéʼy.

³⁹Èk apwé nanj-lan fini palé bay Mari, Mari pwépawé kòʼy èk i pati vitman alé adan yon vil an sé mòn péyi Jouda-a.

⁴⁰Lè i wivé i antwé an kay Zèkaraya, i di Élizabèt bonjou.

⁴¹Lè Élizabèt tann vwa Mari, ti manmay-la ki té an boudenʼy-lan soté. An mouman sala Élizabèt té anba kondwit Lèspwi Bondyé

⁴²épi i hélé, “Ou sé an madanm ki benni an chay pasé tout lézòt madanm, èk ti manmay-la ou kay fè-a benni osi.

⁴³Ki moun mwen yé pou ou ki manman mèt mwen vini vizité mwen?

⁴⁴Èk kon sa mwen tann vwaʼw, ti manmay-la soté an bouden mwen paski i té tèlman kontan.

⁴⁵Mari, ou benni paski ou kwè konmisyon-an Bondyé diʼw-la kay fèt pou vwé.”

⁴⁶Épi Mari di kon sa, “Mwen ka palé konsèné mannyè Bondyé gwan épi tout tjè mwen.

⁴⁷Mwen byen kontan épi Bondyé, paski i sé sovè mwen.

⁴⁸Magwé mwen pa anyen douvan Bondyé, mé i fè bagay sala ban mwen. Moun kay di ki Bondyé fè on gwan bagay ban mwen.

⁴⁹Paski Bondyé ki pli ho pasé nou tout èk ki ni tout pouvwa ka fè gwan twavay ban mwen.

⁵⁰I ni on tjè fèb pou sé moun-an ki ni wèspé pou li, i ka édé yo jennenwasyon apwé jennenwasyon.

⁵¹I ka fè gwan twavay épi lanmenʼy. I ka fè sé moun-an ki ni lògèy pou kouwi tout diwèksyon.

⁵²I ka tiwé otowizasyon pou kondwi an lanmen wa, mé i ka fè lé pòv enpòtan.

⁵³I ka bay lé pòv bon bagay mé i ka voyé sa ki wich alé lanmen vid.

⁵⁴I ka édé sèvant li, sé jan Izwayèl-la.

⁵⁵I pa obliyé pou i édé Abrahanm épi tout désandanʼy pou tout tan, menm kon i té pwonmèt ayèl nou.”

⁵⁶Mari wèsté épi Élizabèt pou apipwé twa mwa, èk apwé sa i witounen lakay li.

⁵⁷Tan-an té wivé pou Élizabèt té akouché, èk i fè on ti gason.

⁵⁸Vwézinaj èk fanmiʼy tann ki mannyè Bondyé té bon pou li èk yo tout vini pou sélébwé épiʼy.

⁵⁹Lè ti manmay-la té ni on simenn, tout fanmi èk vwézinaj vini pou wè ti manmay-la sikonsayz. Yo té vlé kwiyé ti manmay-la Zèkaraya kon papaʼy.

⁶⁰Mé manmanʼy di, “Non, nonʼy sé kay Jan.”

⁶¹Yo diʼy kon sa, “Mé ou pa ni pyès fanmi ki ni non sala.”

⁶²Kon sa yo fè sin bay Zèkaraya pou sav ki non i té vlé bay ti manmay-la.

⁶³Zèkaraya mandé on bagay pou i sa ékwi asou èk i ékwi “Nonʼy sé Jan.” Épi tout moun té sipwi.

⁶⁴An menm mouman sala Zèkaraya té sa palé ankò, èk i koumansé ka glowifyé Bondyé.

⁶⁵Sé vwézinaj-la té étonnen, èk nouvèl sala simen toupatou an sé mòn péyi Jouda-a.

⁶⁶Tout moun ki tann katjilé asou sa, èk yo mandé ki kalité ti manmay sa kay yé, paski yo wè Bondyé té épiʼy.

⁶⁷Lèspwi Bondyé té ka kondwi Zèkaraya, papa Jan, èk i koumansé palé sé pawòl-la Bondyé mété an bouch li. I di,

⁶⁸“Annou glowifyé Senyè-a, Bondyé Jan Izwayèl. I kay vini pou i édé sé moun li-an èk pou ba yo libèté.

⁶⁹I ka ban nou yon sovè ki ni an chay pouvwa, yonn ki sé désandan Wa David, sèvant Bondyé,