Luk 1:28-69

²⁸Uleginama sok mana saing harua ba, “Xaidap xai. Toxoratamona wa ranguaung. Libu xai maung baing!”

²⁹Maria lungu haruanganoa ba, baing hatum xumana mana ba baru namuxinta.

³⁰Ne uleginama harua na ba, “Maria, Urana yaha sibuna maung, labu umaxuwau tai.

³¹Baing ina naga, bagula gamom saing uhayau gara lup tela, bing uxu yanoa ba Yesu.

³²Ina bagula xap yaya sabanga saing bagula duxu ba Urana Eta Loam Sibuna Garanoa. Toxoratamona Urana bagula sina muganganoa Xaitamoxi Debit yonggaxinoa na.

³³Baing bagula wa xaitamoxi mana Yudadi, Yekop bakbagindi, bungingbunginalo. Yonggaxinoa sanga ba sup te.”

³⁴Baing Maria xusunga uleginama ba, “Alaba bagula sok baru, namua na ngakinu rangua lipu tela te?”

³⁵Baing uleginama haxuya ba, “Urana Aningonoa bagula ri ma ranguaung, baing Urana Eta Loam Sibuna haringinganoa bagula kaung. Binabu, gara wa gamomia bagula duxu ba lipua Urana mogu naina xaung Urana Garanoa.

³⁶Bagu bakbagima Elisabet wa xanronggi, ne bagula hayau gara tela! Ina duxu ba xuhiana ba, ne gamona mana sobak 6.

³⁷Uhixi manau tai, namua na Urana sanga ba libu axamang longgalo.”

³⁸Baing Maria haxuya ba, “Bagu nga Toxoratamona lipuxing oxatama. Binabu ina libu manga bila uharua ba.” Saking uleginama yunga saing ila.

³⁹Ila sup baing Maria xauxau, ila sap mala long tela wa titia Yudia wa etuaʼm bimbidi.

⁴⁰Haxa mala laing sup, baing luxu Sekaraya numania saing harua xaidap xai na Elisabet.

⁴¹Bungina Elisabet lungu Maria baing ina naga, Elisabet garang kambagina wa gamonia ba xukxugia, saing Urana Aningonoa luxu mana Elisabet bu baxagi mana.

⁴²Wagi sabanga ba, “Urana libu xai sibuna maung mana haing longgalo, saing libu xai sibuna mana garama bagula uhayau baing!

⁴³Ne uma rangua nga baru? Nga haing olang. Ung bagula usok Toxoratamona ngayua bauna!

⁴⁴Ngaxabia alaba namua na hata sibuna li waxumtuanoa ri mana tangaguliandi, baing gara wa gamogia xukxugia namua na yaha sibuna.

⁴⁵Urana yaha maung, namua na haruanga ba Toxoratamona balaung mana ba, uhatum haringina bagula sok baing!”

⁴⁶Baing Maria harua ba: “O, lugua iti Toxoratamona yanoa

⁴⁷saing aningogua yaha sibuna mana Urana, Lipuxigu Xabingama Muli,

⁴⁸namua na hatumia nga, nga haing olang, lipuxing oxatam ing ganina. Bagu hatata saing ila, bagula lipu longgalo daharua ba, ‘Urana yaha maung’,

⁴⁹namua na Ing Haringing Sibuna libu axamang sabangadi manga, yanoa ing ganina maringing sibuna.

⁵⁰Usinganganoa ila rangua lipu gaxarea duwa hawa mana, lipu hatatamdi ila laing kimuamdi.

⁵¹Libu oxata haringina rimania, suka lipudi diti ding ludingia mala hataing hataina.

⁵²Tatua xaitamoxi haringindi, ne iti lipu olangdi.

⁵³Sina axamang xaidi na lipu gaxarea gesagiding bu dibaxagi, ne sina axamang tela na lipu xalaxalamdi te.

⁵⁴Hau haruangua waleu ba bungingbunginalo usinga mugangaroa Ebraham xaung bakbaginoa disok kimu. Hatumia muli haruanganoa, binabu hatata hauli Isrel lipuxing oxatamdi.”

⁵⁶Maria wa rangua Elisabet laing bila sobak tuwa disup ba, baing goxoya mala yabania.

⁵⁷Baing ina naga, bungina gara ruha Elisabet, baing hayau gara lup tela.

⁵⁸Yabanamdi xaung bakbagindi dilungu Toxoratamona hatanga usinganga sabanga na, binabu digabu diyaha ranguauba.

⁵⁹Xaidabing 8 sokkuba, baing dima ba duxuxu gara ba sangganoa, dibo ba disina tibuna Sekaraya yanoa na,

⁶⁰ning bauna harua ba, “Tegu! Yanoa bagula tauxu ba Yon.”

⁶¹Dibala ba, “Ai, bakbagim tela yanoa bila ba te.”

⁶²Baing ina naga, dahatanga babudi rimadingia na tibuna, bu daxabia ba ina muruna mana baru yanta.

⁶³Xusunga mana xailong buningam tela, saing bung, “Yanoa ba Yon.” Baing dihixi mana.

⁶⁴Hata sibuna li suxungunoa xaxaina muli, saing mananoa bisa, baing haruauba, iti Urana yanoa.

⁶⁵Baing maxuwangua xap yabanam longgalo, saing naxuyangua ila mana long longgalo duwa titia Yudia duwa etuaʼm bimbidi.

⁶⁶Ding longgalo dilungu naxuyanga ba dahatumhatum mana, saing duxusunga ding ba, “Gara ba bagula sok bila lipua na bila baru?” Daharua bila ba namua na Toxoratamona haringinganoa wa rangua.

⁶⁷Tibuna Sekaraya baxagi mana Urana Aningonoa saing xap Urana suxungunoa, saing baxanga muga mana axamang teladi bagula disok kimuya ba:

⁶⁸“Taiti Toxoratamona, Urana Isreliam, yanoa, namua na ri ma saing xap kira lipuxindi muli sangua bixuaradi rimadingia ba.

⁶⁹Liwe mana lipuxing oxatama Xaitamoxi Debit bakbaginoa ba, rang lipu haringing tela mali bu xap kira muli.