Luk 1:28-69

²⁸Doha anggelou ke kula tatanono pare, “A marein uaia tun totomua! Ingga ter niguata uaia tun, a Tamata Noman e uangoul tagu totomua.”

²⁹Tar binaka ke longoro Maria tena uelhireon, inggono ke kanuh, kare namanaehe pare, a uamarein uaia hauon.

³⁰Song ke kula polukur anggelou tatanono pare, “Maria ahik paho sokor, ge God pe ke guata uaia tun totomua.

³¹Ualongor! Ingga o turung balakos, karo turung poho tar keketik bulout, karo turung uelkila tatanono tang Iesu.

³²Inggon e turung kotpokos a tamata uleik, doh ra turung kilain a tuna God ger i ranantieh. Doh God ger Tamata Noman e turung uatoia tatanon ngohina tang Debit ge tubunon,

³³doh inggono tere turung uoum keip uakodkodoho tasir tamatang Israel tar mamang binakalik, doh na Nitoiaon e turung moko dede.”

³⁴Kare kula Maria tar anggelou pare, “Hape re turung pokoso per puhonene ge inggo pe ahik matu hohouo keip me bulout?”

³⁵Kare mene hahauar anggelou tatanono pare, “A Iabena Dedeil e turung la uaponaha totomua, doh na nitampopokoho God ger i ranantieh e turung ragom tane totomua, maeit a keketik bulout gero turung pohoia ra turung kilain a tuna God, kara dedeil.

³⁶Elisabet ge tahimulikia ke pigogo nomanampe, kara bouh, bo gine daan a puk, inggon e balakoso teil tar keketik bulout, doh na tonomo manasar bialok.

³⁷Ge God pe ahik me inete re uaparakukuhin.”

³⁸Song ke kula Maria pare, “Inggo tena kuahang kalekinaler Tamata Noman, uamaluana gero pokoso ro uelhire roono totoguo, hape ko kula sira pe ingga.” Song ke hiliuir anggelou tatanon.

³⁹Tar binakoneit Maria ke kaleuator, kare uateuelein tar la tar uauanilik tar ponponina tar pang Judia,

⁴⁰kare la lekala tena uma Sekaraia, kare meneng uaha tang Elisabet.

⁴¹Tar binaka ke longoro Elisabet tena meneng uaha Maria, a guamene re uangoul teil tang Elisabet ke siaka kai keip tar niuah, doh Elisabet ke uoun tun tar Iabena Dedeil,

⁴²kare mene ualeik ualutara pare, “God ke guata uaiantiehe tun totomua, a i rana uain tasir gisiamehe ro kuah, kare guata uaiantiehe tun tar keketik gero turung pohoia!

⁴³Inggo deh ahik paha kuaha uaia mare me ruh koutur kuaha gere uatinanain nag Tamata Nomano.

⁴⁴Gine ku longoro pe inggo tar meneng uaha ko menegia, a guamene i lolono totoguo ke siaka kai keip tar niuah.

⁴⁵Doh ingga ra turung guata uaia tunuia ro tagorong mana teil pe tar haua ke meneinir Tamata Nomana totomua e turung kotpokoso tun toro man.”

⁴⁶Kare kula Maria pare, “A kolouguo e uatakai tar hanganar Tamata Noman.

⁴⁷Doha iabeiguo e uahantiehe tun tang God ge nag tang Uelkarusio.

⁴⁸Teeit ke namana uanono peono tena kuahang kalekinale re kale uahiua pein. Uakekena tur daan o mamang babeir tamata ra turung kula totoguo ka guata uaia keipio tar niguata uleik.

⁴⁹Ge God pe ter tang sioko ger uleikintiehe na nitampopokoh, kara dedeilir hangan teke guata tar uleikir niguata totoguo.

⁵⁰Na niueldolomono e la tasisit ra ueltad, kara longoro tatanon, e uakekena tur pe tar babeir tamatang daan, kare uelueluahiuela tasir tamatang gaat i muduhia.

⁵¹Inggono ke uatouo ualasira keip tar limana tar uleikir nitou, kare geil ueltebeir tasisit re uairana keipis teresir ninaman.

⁵²Inggono ke guata tasir gisiameher toia ka touahiuais, bo ke kale kai puk tasisit re kale uahiuais.

⁵³Inggono ke uauoun tasisit ra gogo tar inete uaia, kare uelueltula liu tasir tang inete ra uasabelima teil puk.

⁵⁴Inggono ke poul i Israel gesno tamatang kalekinaleono tar namana huara tar niueldolomo geke ualapagah keipiono tang Abraham menia toso bunguna tar mamang binakalik.”

⁵⁶Maria ke uangoul tagu tang Elisabet kaelainane tar touonor bialok, song ke tapokis tena uan.

⁵⁷A binaka ke kotpokoso tang Elisabet tar poho manas, doh inggono ke poho tar keketik bulout.

⁵⁸Doho tamatasit ra uangoul uahuhut, doh gisis re ueliahe keipisiono ka longoro kout tar Tamata Nomana ke ualasira pe tatanono tar niueldolom, doh gisina ka uaha uelkout tagu tatanon.

⁵⁹Tar uatualinar marein gisina ka laha tar me poko tar kapokonar keketik bulout, doh gisina ka marang uelkila uahiua tatanono tang Sekaraia ge tamanon.

⁶⁰Bo tinana pukuono ke mene hahaua tapokis pare, “Ahik! Inggono deh ra kilain tang Jon.”

⁶¹Kara kulasina tatanono pare, “Bo ingga puk ahik tun me tahimulik re moko teilir hangonene.”

⁶²Temaeit, gisina ka sarang pau tang tamanar keketik tar uahire tatanon, hingiar hangana re malaraion e uelkila tar tun.

⁶³Inggono ke dangata me ineteng bolo keip, kare bolongua pare, inggono tar hangana te Jon. Doh gisina ka siokor lutarantiehe tun.

⁶⁴Ahik me sikir manasan, kare mene Sekaraia, kare uakekenengua tar uatakai tang God.

⁶⁵Gisit ra uangoul uahuhut ka ueltada keip tar nisokoro tang God, doh gane uakapa toro uaning toro ponponina tar pang uan i Judia, o tamata ra siokor mene pono tar puhon.

⁶⁶Gisit ka longoro tar ineteninanine ka namanaeh, kara kula pare, “A haua tununguampe re turung guatainir keketik gete hua kai.” A puh peonene e uakalahara tena nitampopokohor Tamata Nomana re uangoul teil pe tatanon.

⁶⁷Doh Sekaraia ge tamanono ke uoun tar Iabena Dedeil, kare hire tauete toro uelhire geke heirinir Iabena Dedeil pare,

⁶⁸“Uatakai tar hanganar Tamata Noman, ger Godong Israel, teeit inggono ke me bulaua tapokis tosno tamat.

⁶⁹Ge inggono pe ke heiriha tar tamatang uelkarus ger tampopokoho tun e la tur toro matina tang Debit ge na tamatang kalekinaleono tar me uelkarus tagigeig, ngohina sira ke mene keip peono tosno propet gesir dedeil, ke la tur peme sioun.