Luka 1:28-69

²⁸Tu winoyanoyana i nei po Maliya ugolina i pa, ‘Tinani tam. Guyau a winagana po gasi tauna tam mitehi.’

²⁹Tu winoyanoyana a baha ugolina ma Maliya nugonugona i helele duma po a bahahi anohi i inugonugotuhugehi.

³⁰Ma tu winoyanoyana i pa, ‘Maliya, ega una matomatouta babana amaka Yaubada i hagu lagonem.

³¹Tam apo natum olotona una koibeya po una guni po gowana Yesu una hiyawi.

³²Tauna apo lawa baneina gehouna ma lawa apo hina wootalagiyeya hina pa, “Yaubada Gegewahagana Natuna.” Ma Guyau Yaubada apo tauna ina dewaya po wasawasa mei gogana Dawita i wasawasa pite,

³³po apo Yakobo a guguni u hinehi ina iwasawasa houga magomagouna ina nae po ega a siga ma anani taniwaga apega ina kokoe.’

³⁴Ma Maliya tu winoyanoyana ugolina i baha i pa, ‘Tau ega ata tawine ma apo iyowai a wigunaguna?’

³⁵Ma tu winoyanoyana i pa, ‘Alugo Woiyawa apo ina nei po Yaubada a wipoya ina welem po ugolinei tewela waiwoiyawana una guni po gowana hina hiyawi, Yaubada Natuna.

³⁶Am guguni wawinena Elisabeta gasi i koiba a houga wikeduluma ugolina. Tauna ipa ega emoemotana ina wigunaguna ma amalai a wamahiya magouna 6.

³⁷Matababana Yaubada ginouli atapuhi emoemotana.’

³⁸Ma Maliya i baha nae tu winoyanoyana ugolina i pa, ‘Tau Guyau tu wiponawogogena ma amalai awai u palipaliweleu ugoliu ina wawala.’ Ma tu winoyanoyana Maliya i nehaleya.

³⁹Geka u mulina Maliya i wononogo ma i wotowolo po i nae dobu waioyana i tutani po i nae Yudeya u hinena.

⁴⁰I nae po Sakaliya a u numa i geleta po Elisabeta i mamali.

⁴¹Ma Elisabeta pona i noonoli po natuna managona u hinena i’imtuilupa po Elisabeta Alugo Woiyawa i wihogoya.

⁴²Ma ponana i lata ma i wootu i pa, ‘Wiwine atapuhi u hinehi tam tu kaoha lagona po tewelana apo una guniguni tauna tu kaoha.

⁴³Aee, awai binei lunugotootogo geka pite i wawala po u Guyau hinana i witoumana mai ugoliu.

⁴⁴Matababana am baha wimaamala a noonoli po tewela u managou i kaoha po i’mtuilupa.

⁴⁵Guyau a baha u itumaganeya binei apo ina laimoineya naka tam tu kaoha.’

⁴⁶Maliya i pa, ‘Guyau a hunena dumaya

⁴⁷ma nugonugou hinena i wotalagae babana u Yaubada Tu wiluyagohaniu.

⁴⁸Tau a tu bagibagi yabayababa ma i galena tuhagau tau. Ugolinei lawa atapuhi amalai ma i wawala po i nenae apo hina pa tau tu kaoha.

⁴⁹Matababana Yaubada manininagei ginouli gegehi biugei i dewahi. Tauna gowana i wiwoiyawa.

⁵⁰A lunugotootogo i mewahaga hapana po hapana ugolihi iyawoi Yaubada hi matumatuteya.

⁵¹Tauna nimana kadikadidilina i lodomi po tu nugogegae hai wiwogatala i lunohahi.

⁵²Wasawasa gegehi hai ani tugula ugolihi i hauhopunehi ma tu nugohopuhopu i houna geletehi.

⁵³Tu omhilage lawahi i wiomhiyougohi, ma tu wigapola lawahi a nima kwakwawihi i himilihi.

⁵⁴A paliwitumagana googata ugolihi i womomota emoteya, ma i nei Isalaela lawahi ina haguta.

⁵⁵A lunugotootogo Abelaham ugolina i woogeleteya po gasi googana, po ataputa ugolita apo ina nae po ega a siga.’

⁵⁶Ma Maliya Elisabeta mitehi hi mamae wamahiya tonuga hi kokoe ma i gunawilena meya a u numa.

⁵⁷Elisabeta upuna i wiyuwa po i igunaguna po natuna olotona.

⁵⁸Ma a lawa po a guguni hi noonoli po tauna mitehi hi kaoha babana Guyau a hagu dewadewa dumana i weleya.

⁵⁹Natuna i guni po iyeta magouhi 8 hi kokoe ma lawa hi’mboina mai. Ma hai dewa hi deweya po tewelana a wekiwekilala naka hinina hi hapi ma ipa Sakaliya hina wiwaligeheya.

⁶⁰Ma tamogi hinana i pa, ‘Apega. Apo gowana Yoni.’

⁶¹Ma a lawa hi pa, ‘Ega ita dewadewa ipa Yoni una hiyawi babana ega am bada gehouna gowana Yoni.’

⁶²Apoma amana nimahiyei hi paliweleya gowana apo iyai ina hiyawi, babana tauna naka i wigumgum.

⁶³Ma Sakaliya ani’mgiluma i lupaliyeya po i’mgiluma i pa ‘Gowana Yoni.’ Ma lawa nugonugohi hi goholihi.

⁶⁴Ma noka hougana Sakaliya a wigumgum i kokoe po i wibaabani meme ma Yaubada i wotalagiyeya.

⁶⁵Lawa u liyaliyahi tu mae matouta i wihogohi. Ma geka dewana atapuna tuwegana naka Yudeya oyana i weluyayata pahi.

⁶⁶Lawa iyawoi tuwegana hi noonoli naka hai nugohine ma hi pa, ‘Geka tewelana apo tauna iyai?’ Matababana i lugeletana dumaya naka Yaubada a wipoya tauna ugolina.

⁶⁷Yoni amana Sakaliya Alugo Woiyawa i wihogoya po Yaubada tuwegana i baheya i pa,

⁶⁸‘Isalaela lawahi ata Guyau Yaubada ta wotalagiyeya. Tauna a lawa haguta binei i nei po hau panipani i lupena haleta.

⁶⁹Yaubada a tu wiponawogo lawana gowana Dawita gogana i himiliyai Tu wiluyagohanita kadikadidilina.