Luka 1:28-69

²⁸Eme aŋelo e Mariarao fuarâ muwec, “Wofuŋte joroc biaŋ, go ʒeri ec, Wofuŋzi gohec jukac.”

²⁹Aŋelozi dâŋ iŋuc mume maname quŋkeme maŋnezi ʒiŋuc manasuwec: Weniŋucte mu ʒeri enarekac?

³⁰Eme aŋelozi ʒiŋuc âzâcnewec: “Maria go mi hâwicguoc, Anutuzi honecgume biaŋkekac.

³¹Manakic, go motec kiweckerâ rocmu, ere ʒâŋe Jesu muzemec.

³²E kâcɋene jâmbâŋ jume Fekicne sâko ere Ŋokâ mucneniŋmu, â Wofuŋ Anutuzi apa‐ticne Dawidi ere ŋeŋetacko râeocmu.

³³Eme Jakobore ɋâricfâc guriŋne bajarehuc jume Ŋicwofuŋ juju‐ticne foraʒihuc juocmu sanaŋ.”

³⁴Mume Mariazi ʒiŋuc âzâcnewec: “No ŋic tâmiric jukopacko dâŋ mukic i weniŋuc erâ sanaŋkeocmu?”

³⁵Mume aŋelozi dâŋ ʒiŋuc bâtikiecnewec: “Tiri Mârozi faigao wahaocmu â Fekicne sâko ere tâpirizi neŋgoc ŋesiŋ ŋegareocmu. Eme irec motec rocmu e tiri mucnezo, Anuture Ŋokâ hâcne.

³⁶Erâ moc gazape manac: Âgoge Elisabete e ŋokac qizeczi motec kiweckerâ juhame mosa 6 ekac, e hufiŋ ŋokac mucneeŋgopieŋzi iŋuc ekac hâcne.

³⁷Anutu e wiac moc ezomurâ mi eipieekac.”

³⁸Mume Mariazi ʒiŋuc âzâcnewec: “No Wofuŋte kiŋaŋ naru, irec dâŋ mukic iŋuc hâcne enarezejec.” Iŋuc mume aŋelozi beherâ rawec.

³⁹Maria e jume mi ʒoraha biac ʒawierâ Judaia tiki mâreŋko hae moc ŋewec ira rawec.

⁴⁰Ra fisirâ Zakariare ficko ferâ Elisabete mu ʒeri ecnewec.

⁴¹Mu ʒeri ecneme manahame izia bumaŋnao motec e kiwaewec. Eme Tiri Mârozi Elisabete ere maŋko hurâ fuseme

⁴²dâŋ bafehuc ʒiŋuc âzâcnewec: “Ŋokac âgo‐nâŋec gore manape sâc moc eme mumbiaŋgukopac â bumaŋgao fuajec fokac e wâc iŋuc jaha mumbiaŋkekopac.

⁴³Go Wofuŋ‐nanere neŋgoczi wemo biaŋ‐nanere norao warekomec?

⁴⁴Mu ʒeri enaretec hazec‐naneo hume bumaŋ‐naneo moteczi kiwaekac.

⁴⁵Go Wofuŋte biŋedâŋ gazakicne irec fârine fuaocmu manapaŋkemeŋte gore manape ʒerine ekac.”

⁴⁶Eme Mariazi kecʒiŋuc muwec: “No maŋ qâqâtâc‐nanezi Wofuŋ muafeckekopac,

⁴⁷â maŋnanezi Anutu bâbapiaŋ‐nane ʒeri ecnekopac.

⁴⁸E kiŋaŋ naru‐ticne waha qaqane no bafecnukacte ŋic gurune gurune nore manapie ʒerine eocmu.

⁴⁹E bapafârezi norao mâsi sâko bakac hâcne. Ʒâŋe biŋe‐ticne tiri jaha fokac.

⁵⁰Araŋ bacneeŋgopieŋ jaŋe maŋuruc‐ticnere erâ mimiŋzi ɋâric ehâmo‐jareekac.

⁵¹E tâpiri‐ticnere fuŋne bâfuahuc maŋfefe jueŋgopieŋ jaŋe bâtâtiec‐jopaekac.

⁵²E ŋicbomboŋ sâko jaŋe popoonec tuŋjopame wahahapie hujukicne jaŋe bafec‐joparâ toŋko râec‐jopakac.

⁵³E roroc hapetac jaŋe wiac bâmâckehuc jare gumec ekac, â mafa sâkohec behec‐jopame qarâ suriŋne juŋgopieŋ.

⁵⁴Erâ Israe kiŋaŋ ŋicfâc‐ticne maŋuru‐ticnere roroŋ fâre‐nârekac.

⁵⁵Mimiŋnefâc‐nâŋec, Abraham â ɋâricfâcne, jurahuc juniŋmu, jaŋe dâŋ jazawec irec fârine fuakac.”

⁵⁶Eme Maria e mosa jahec â moc Elisabetehec juku hae‐ticnao risie rawec.

⁵⁷Elisabete e dameŋ‐ticne maickeme motec rowec.

⁵⁸Eme haefâc‐ticne â mame sâkofâc‐ticne jaŋe Wofuŋzi maŋuruc‐ticnere fuŋne erao bataniŋkewecte manarâ ehec mâmâc bubiaŋ manambiŋ.

⁵⁹Izi ʒoaŋ gie bapa 8 tarame jaŋe tumaŋnerâ motec sahacnao Wofuŋte ma barâ mamac‐ticne Zakaria ere wase bazo mumbiŋ.

⁶⁰Eme neŋgoc‐ticnezi qatara‐jarerâ muwec, “Aricne, ʒâŋene Johane muzo.”

⁶¹Mume ʒiŋuc âzâcnembiŋ: “Hâc, mame sâkofâcge jaŋerao ʒâŋe wase iŋucne moc mi fokac.”

⁶²Qaqatarac erâ Zakaria e motecte ʒâŋe muocte ecnepie

⁶³tafere ejareme râcnepie fainao ʒiŋuc qâreŋkewec: “Ʒâŋe‐ticne Johane.” Iŋuc qâreŋkeme jaŋe manapie moc eha

⁶⁴izia nameŋne risieme dâŋ dâŋ ehuc Anutu muteŋkewec.

⁶⁵Eme hae rârec rârec ŋic jurambiŋ jaŋe dâŋ binaŋ i manapie hâhâwicne ewec. Eme Judaia tiki mâreŋko binaŋ miczi mic nazaŋ gazaŋ efârembiŋ.

⁶⁶Eme manambiŋ jaŋe dâŋ i maŋke juhuc ʒiŋuc mumbiŋ: “Motec iŋucnezi sokarâ weniŋuc eocmu?” Eme Wofuŋzi dopecke sapec ecneha juwec.

⁶⁷Eme mamac‐ticne Zakaria e Tiri Mârozi maŋne fusucmame findaŋdâŋ kecʒiŋuc muwec:

⁶⁸“Israe ŋic nâŋâc Wofuŋ‐nâŋec Anutu muteŋkenaŋ. Eki hâcne ŋicfâc‐ticne iqic‐nâporâ kitâc‐nâpokac.

⁶⁹Ehuc kiŋaŋŋic‐ticne Dawidi ere ɋâricfâc nâŋâcnao bâbâpiaŋte wâtuŋ moc âkendâŋnekac.