Luka 1:28-69

²⁸Malekan yi fa a fɛma, a naxa, “Sɛwani i xa Ala fe faɲin nagidixi i tan naxan ma. Marigina i xɔn!”

²⁹Mariyama yi kuisan malekana falana fe ra, a yi a miri a xɔntɔnna bunna ma.

³⁰Malekan yi a fala a xa, a naxa, “Mariyama, i nama gaxu amasɔtɔ Ala bata maragidi faɲin fi i ma.

³¹I fudikanma nɛn, i dii xɛmɛn sɔtɔ, i yi a xili sa Yesu.

³²A binyen sɔtɔma nɛn, a xili bama nɛn a Kore Xɔnna Alaa Dii Xɛmɛna. Marigina Ala a findima nɛn mangan na alo a benba Dawuda yi kii naxan yi.

³³A findima nɛn Yaxuba bɔnsɔnna mangan na habadan. A mangayaan mi ɲanɲɛ mumɛ!”

³⁴Mariyama yi a fala malekan xa, a naxa, “Sungutun nasɔlɔnxin nan n tan na, ito ligama di nayi?”

³⁵Malekan yi a yabi, a naxa, “Alaa Nii Sariɲanxin godoma nɛn i ma, Kore Xɔnna Ala sɛnbɛn godoma nɛn i xun ma. Nanara, na dii sariɲanxin xili bama nɛn a Alaa Dii Xɛmɛna.

³⁶I ngaxakedenna Elisabɛti fan fudikanna nan a ra iki. Hali a to bata fori, e yi a falama naxan ma a gbantana, na kuiin kike senninden na ra iki.

³⁷Amasɔtɔ Ala nɔɛ feen birin ligɛ nɛn.”

³⁸Mariyama naxa, “Marigina walikɛɛn nan n tan na, Ala xa na liga n xa alo i bata a fala kii naxan yi.” Malekan yi keli a fɛma.

³⁹Na xanbi ra, Mariyama yi a yitɔn mafurɛn, a siga taana nde yi Yuda yamanani, geya wuyaxi yi dɛnaxan yi.

⁴⁰A siga Sakari konni Elisabɛti xɔntɔndeni.

⁴¹Elisabɛti Mariyama xɔntɔn ti xuiin mɛ waxatin naxan yi, diin yi a ramaxa Elisabɛti kui. Elisabɛti yi lugo Alaa Nii Sariɲanxin na.

⁴²A yi a fala ti xuini te, a naxa, “Baraka diin nan i tan na ɲaxanle tagi! I diin naxan fan sɔtɔma, baraka diin nan na ra!

⁴³N binyen sifani ito sɔtɔxi di, n kanna nga xa fa n konni?

⁴⁴Amasɔtɔ, n na i xɔntɔn ti xuiin mɛ waxatin naxan yi, diin yi a ramaxa n kui sɛwani.

⁴⁵Sɛwani i xa, i tan naxan laxi a ra fa fala Marigina falan kamalima nɛn.”

⁴⁶Mariyama naxa, “N Marigin tantunma n bɔɲɛni.

⁴⁷N sɛwaxi n bɔɲɛni n nakisimana Alaa fe ra.

⁴⁸Amasɔtɔ a bata a xaxili lu n tan a walikɛ magodoxin xɔn ma. Nanara, fɔlɔ iki ma han habadan, muxun birin a falama nɛn a baraka diin nan n tan na.

⁴⁹Amasɔtɔ Ala Sɛnbɛmaan bata fe gbeen liga n xa. A xinla sariɲan.

⁵⁰A kininkinin a yɛɛragaxu muxune ma han mayixɛtɛ mayixɛtɛne.

⁵¹Ala bata a yiini bandun, a yi waso muxune raxuya ayi e nun e fe yitɔnxine.

⁵²Ala bata manga sɛnbɛ kanne ba e manga gbɛdɛne yi. Naxanye e yɛtɛ magodoxi, a yi ne yite.

⁵³A kamɛtɔne ralugo fe faɲin na. A nafulu kanne yii seene ɲan.

⁵⁴Ala layirin naxan xidi en benbane xa, a mi ɲinanxi na ma.

⁵⁵A yi a xaxili lu a hinanna xɔn ma Iburahima xa e nun a bɔnsɔnna birin han habadan!”

⁵⁶Mariyama yi kike saxan ti Elisabɛti fɛma. Na xanbi ra, a yi xɛtɛ a konni.

⁵⁷Elisabɛti dii bari waxatin yi a li, a yi dii xɛmɛn sɔtɔ.

⁵⁸A dɔxɔ bodene nun a xabilan muxune yi a mɛ a Marigin bata kininkinin a ma, e yi sɛwa e bode xɔn ma.

⁵⁹Diin barin lɔxɔ xunna, e fa a ra a banxulandeni, e yi a xili sama nɛn Sakari alo a fafe xinla kii naxan yi.

⁶⁰Koni a nga naxa, “Ɛn-ɛn de! A xili sama nɛn Yoni.”

⁶¹E yi a fala a xa, e naxa, “Muxu yo mi i bɔnsɔnni naxan xili na kiini.”

⁶²Nayi, e yi e yiin maliga a fafe xa, e yi a maxɔdin diin xinla ma.

⁶³Sakari yi walaxan tongo, a yi a sɛbɛ, a naxa, “A xili nɛn Yoni.” E birin yi kabɛ kati!

⁶⁴Na waxatin yɛtɛni, Sakari yi nɔ falan tiyɛ, a Ala tantun fɔlɔ.

⁶⁵A dɔxɔ bodene yi gaxu kati! Muxune yi na feene falama Yudaya yamanan birin yi.

⁶⁶Naxan birin a mɛ, ne yi e miri, e maxɔdinna ti, e naxa, “Diini ito sa ligama di?” Amasɔtɔ e bata yi a yigbɛ kati, a Marigin sɛnbɛna a xun ma.

⁶⁷Yoni Fafe Sakari yi lugo Alaa Nii Sariɲanxin na, a yi waliyiya falane ti, a naxa,

⁶⁸En Marigin tantun, Isirayilaa Ala! Amasɔtɔ a bata fa, a yi a yamaan mali, a yi e xɔrɔya.

⁶⁹A bata Marakisi Tiin sɛnbɛmaan namini a walikɛɛn Dawuda bɔnsɔnni,