Luqaas 1:28-69

²⁸Barjosa gaanaar kokal nivayse, “Ya Barjosa nashadhoono, payyamo hana ko dee; Barjo hambetene. Ya maanasa shaarinte gobshadhoonone” kona ki hamade.

²⁹Kodiar kisa dhalqinka kattsi targadhayse, “Kono hamin dohoono nagaymakkone?” hamayse ko qaabade.

³⁰Ogora Barjosa gaanaar kona yin ki giyade: “Mayriyam, Barjosa birante gobshi hanin haaponna kurtumbhaabhode.

³¹Shedaa! Ya sirmaada sirme; naasi anngiar adhaada adhe; kisa naabenamaar Yesus hamayse hada wode.

³²Kidi eedi gebhi kida maate; kanka Wuldara Sagea Barjo Naasine koda hambhe. Imbaa Barjo kisa imbaa Dawtsa bitamon borkotonam kina kida ime.

³³Yayqoobsa muldhandar rooro wulna lay kida bitime; kisa bitamonsaar macchi qolehe” kona ki hamade.

³⁴Mayriyamaar Barjosa gaanaana “Inta anngika wodhayse inin dhesaamonna, ogono hamin ko yin dee?” kina ko hamade.

³⁵Kidiar kona yin ki giyade: “Manpas Gazano hadar niva ko nive; Wuldara Sagea Barjosa kantano hadar koda shipe. Ogonante hanin adhea gazaa naasa Barjo Naasine kida hambhe.

³⁶Shedaa! Hasa muldhano Elsaabethaar ta yisa gecchamondar naasi anngi kodi sirmidine; seekine hambhayno ko sirmaysaka kono kosa arpi laskone.

³⁷Harrna hambhidianna, Barjoam bashea yer qolehe” kona ki hamade.

³⁸Mayriyamaar, “Barjosa waadiman edono intane. Hanin giyondettsi ina ko dee” kina ko hamade. Barjosa gaanaar kokalanka edimayse ki yivade.

³⁹Ogo wodanka Mayriyam dhaabhayse Yiwda peente dhukanka dohon katama kallondar saana yivayse,

⁴⁰Zakkariassa ooninte ardayse Elsaabethaam ko nagaysade.

⁴¹Elsaabethaar Mayriyamin nagaysenam konin qansenka, iinte kosa dahaa naasa kattsi ki ruqumade; Elsaabethaar Manpas Gazanka ko thoothade.

⁴²Kodiar upsi gebhika yin ko giyade: “Ya mansen naana wulra gobshadhoonone; hanin adhea naasaar gobshadhaane.

⁴³Barjoyn qaadhaa Imbaam adhayno ikal hanin nivayno hamin dohoono ina gobshine.

⁴⁴Shedaa! Hanin nagaysenam qansite i daaka, isa iinte dahaa naasa wozaka ki ruqumade.

⁴⁵Barjo Imbayn hana giyon wulam maata ko maate hamayse hanin tiyonna, ya gobshadhoonone!” kona ko hamade.

⁴⁶Mayriyam yin ko giyade: “Isa sadano Barjo Imbaam koda gobshe;

⁴⁷isa woylammoar iam Dhacchea Barjoka koda wozadhe.

⁴⁸Inin wozadhayno Barjo i ko tokaa maaton yisa waadiman edonam kinin haaponnane. Kinara yedayse adhadhino wul gobshadhoono iam koda hame.

⁴⁹Ogonoar kantanka dahaa Barjo ina yer gebhi kinin hayonnane; naabenoar kisa gazane.

⁵⁰Barjoam kurtumbhen eenna adhadhira adhadhinka yekka, Barjo kena burqadhayse yer payya kida haye.

⁵¹Kidi yisa kantanka gebhi waadima haydine. Yisa bhocchinka poorimbhaynaam kidi kekalanka thar thar haydine.

⁵²Peen wottsaynaam kesa bitamora keam hanchidine; yirk hamaynaam gobshika keam dheg haydine.

⁵³Daaqardhaanaam yer payyaka kidi micchidine; wodimma eenaam aan guuri keam ki yittsade.

⁵⁴Barjo wosa eykena Abraambee kisa muldhanabena ‘Rooro wul lay yena burqadhayse yer payya ida haye’ hamayse kinin giyon wozanam bhocchintaka, kina waadadhayna Israveel eenaam kidi kelshidine” ko hamade.

⁵⁶Mayriyamaar Elsaabeth ooninte arpi makkamaddha dooqayse yisa oonindar maatate ko yivade.

⁵⁷Elsaabethaar adhiman arpin kosa yeskaysaka naasi anngi ko adhade.

⁵⁸Kosa gurdan eenabee muldhanabe Barjo yisa nashimmakkonam kona thoosayse kinin hayonam qansayse kombesana kinka ke wozadhade.

⁵⁹Kediar lankaysoa rooroaka naasasa qaamanam taxana ke nivade; imbaasa naabenka Zakkarias hamayse kisa naabenam wodana ke qaabade.

⁶⁰Indano “Yin dehehe; nammo kisa Wannisne” kena ko hamade.

⁶¹Kediar “Hasa muldhante naabea agaaka eldhea hay ki hannaar qolehe” kona ke hamade.

⁶²Ogora imbaam “Hasa naasaam hay hamayse eldhoadettsi ha nashe?” hamayse milkitka kiam ke oysade.

⁶³Zakkariasaar milkitka yer thaapi thaapadhea oysayse, “Kisa nammo Wannisne” hamayse ki thaapade. Eeno wulaar targadhidine.

⁶⁴Ogo wodanka saanawa Zakkariassa apono ko bulimade; Barjoamaar gobshaate dhalqan ki yedade.

⁶⁵Gurdante dohon een wulna kurtumbhe ko maatade. Ogono yerro wul Yiwda peen dhukanka dohon wul gidir ko giidhade.

⁶⁶Qansaana wulaar, “Ta naasa kaa hamin hamea ki doo?” hamayse yisa woylaminte ke yedade; ogonoar Barjosa kantano kimbesana kinka konin dohonnane.

⁶⁷Naasasa imbaa Zakkarias Manpas Gazanka thoothayse hamota dohonam yin giyan ki yedade:

⁶⁸“Israveel eenasa Barjo Imbaa wo kisa eedanakal nivayse wodar dohon bazanam kashayse woam kinin dhacchonna ki gobshadhe.

⁶⁹Yisa waadiman ea Dawtsa muldhara dhacchea kanta eam kidi dhaasidine;