Lukase 1:28-69

²⁸Eleki kena Gabriele iluake, ibeteke loko Maria be, “Hlamate kenamu, Tuhane Iriluke misete etemu boka titinai! Kai Tuhane Ime kaimu!”

²⁹Eleki Maria hkutukeni kai kaplalei titinai le lepata meru. Hoko inoake me lalei be lepata meru esi natire elia.

³⁰Eleki Gabriele ibeteke lokoi be, “Maria, rilamu yake, le asupu misete bei Alla,

³¹hoko takwali moneka, akeu blublulu kai aruele kwete mokwai, eleki suke aono Eni nane Yesuse.

³²Kwetele mere namake Eni kbasare ela kai tamata esi kotiNe Alla Elake titinaije Eni Nanae. Kai Tuhane Alla Iono Ipleta kena Eni ntuane mena kamale Dauta lakwaije,

³³kai Iono kamale ete nusa Israele esi anubuaru eti pela. Ipleta rame eti pela.”

³⁴Eleki Maria ibeteke loko Gabriele be, “Po meije au kai mosa kai au ntulu kai mokwai mosa, hoko abeteke au keu blublulure eono elia?”

³⁵Gabriele iombe, “Namake Ro Misete Ikusu kenamu hoko Alla Eni kbasa rebe ktili titinaije eono akeu blublulu. Bei mere hoko Kwetele rebe namake arueleIje kotiNe misete titinai le Eni dosa sae mo, Alla Elake titinaije Eni Nanae.

³⁶Alene! Elisabete rebe luami bei luma toini esare, masike imatabina peneka kai tamata esi beteke be indote, po meije ikeu blublulu bulana ne peneka.

³⁷Le Alla Eni kbasa kena ono sasaisa neka.”

³⁸Maria iombe, “Au meije batuke Tuhane Eni tamata makerike neka. Sebei eono kenaku lulu amu lepataru neka.” Eleki Gabriele ikeu beini ne.

³⁹Bei mere eleki takwali mo Maria ikeu sosoli lolete kota sae ndete ulate babai, ndete otoi Yudea.

⁴⁰Kena iluake, ikusu me Sakaria eni luma eleki ibeteke hlamate loko Elisabete, Sakaria eni bina. Elisabete kai Mariare luasi upu esa.

⁴¹Eleki kena Elisabete ilene Maria ibeteke hlamate lokoije, kwetele rebe Elisabete ikeu blublulu leije ialeli, kai Elisabete isupu kbasa bei Ro Misete,

⁴²hoko laleije ndina titinai eleki ibeteke loko Maria kena na elake be, “Kwaliku Maria! Alla Iono misete etemu peneka, lesi bei pusue ami bina maketaru, kai Alla Iono misete ete Kwetele rebe akeu blublulu leIje.

⁴³Au meije sia pine auku Tuhane Eni inaI luake loko aure?

⁴⁴Au rekware Kwetele rebe akeu blublulu leI mere auku Tuhane. Le kena au lene abeteke hlamate loko aure, kwetele rebe au keu blublulu leije ialeli sosoli le laleije ndina.

⁴⁵Tuhane Iriluke misete etemu le ahlaleke loko saisa rebe Tuhane Ibeteke ete ale kai pusue lepate meru namake uono tinaije neka!”

⁴⁶Eleki Maria iisike Tuhane. Ibeteke be, “Au isike Tuhane titinai,

⁴⁷kai laleku ndina titinai le Ale auku Alla, auku Maka Hlamate.

⁴⁸Le masike au meije tamata makerike po Anete loko au, kai bei meije eti pelare pusue tamata esi beteke be Alla Aono misete elake eteku.

⁴⁹Le Ale Alla Maka Kbasa, Amu nane misete titinai le Amu dosa sae mo, Aono yelu misete elaka kenaku peneka.

⁵⁰Bei anubu kena anubu, Tuhane laleMu noa pusue tamata rebe esi holmateMu.

⁵¹Tuhane Apake balaMu esi kbasa elake kena etebi tamata kwakwalaru, leke saisa rebe esi suka onore eono moneka.

⁵²Tuhane Aruluke kamala esi kbasaru, yo Abitike tamata maktekwane lesi bei tamata maketaru.

⁵³Tuhane Ariluke pusue yelu miseta ete tamata rebe esi sasaisa more, yo tamata rebe esi taneia bokalaru, Aulakesi keu kai esi keri sasaisa moneka.

⁵⁴Tuhane Anete saisa rebe Ataluke ete ami tamata Israelaru amiki ntuana menaru, Abrahame, Isake, kai Yakupe. Hoko Tuhane laleMu noa Abrahame kai ami tamata Yahudiaru, eni anubuaru. Ami ono Tuhane Amu tamata makerike. Tuhane laleMu noa ami rame eti pela.”

⁵⁶Maria irue kasuke bulana telu kai Elisabete, eleki ileu lope eni hena ne.

⁵⁷Eleki petu kena Elisabete iruele eni nanare peneka, hoko iruele eni nanae mokwai.

⁵⁸Eleki kena tamata me eni luma leini keholi kai eni luma toini esi lene be Tuhane Iono misete ete Elisabete peneka, hoko lalesi ndina sakesa kaini.

⁵⁹Eleki kena kwete mokwaije eni petua kwalure, tamata me eni luma leini keholi kai eni luma toini esi luake kena sunateni kai esi suka ono eni nane Sakaria lulu amai eni nane,

⁶⁰po inai beteke be, “Mo! Eni nane suke Yohanese.”

⁶¹Eleki esi beteke lokoi be, “Le mula pine ele mere? Bei amu luma toine sae eni nane ele mere mo.”

⁶²Eleki esi kode loko Sakaria be isuka ono eni nanare eni nane sire.

⁶³Sakaria ikotie batu maka leki eleki ileki kena bature be, “Eni nane Yohanese.” Hoko pususi herane.

⁶⁴Kena ileki Yohanese eni nane, kena mere Sakaria isupu lepa suike sosoli neka, eleki iisike Alla.

⁶⁵Pusue tamata me luma leini keholi rilasi lakwai esa, kai esi alenake kwete mokwai tone mere elei pusue ulate Yudea.

⁶⁶Hoko pusue tamata rebe esi lene mere esi noake me lalesi be, “Tuhane Ime kaini, hoko namake kena kwetele mere ielare iono elia?” Le esi selu Tuhane Iraka kwetele mere mise!

⁶⁷Eleki Ro Misete Ikbasae Sakaria, Yohanese amai, hoko ibeteke sou bei Alla. Iombe,

⁶⁸“Mai ite isike Tuhane, beteke Eni kbasare hita titinai, Alla Israele, le Iluake kena Itapa Eni tamataru, kai Itiesi.

⁶⁹Iriluke Maka Hlamate ktiline ete ite, Irulu bei kamale Dauta. Dauta mere maka layani Alla.