Luke 1:28-69

²⁸Noqw hoṅviaya put aw pákihqe, aw paṅqawu: Um hahlayni, Tutuyqawhqa úmuma. Pam núokway ūmi pas qaöwínoa. Um momoymuy amuṅaqw pas hahlayhpit ep’e.

²⁹Noqw Mary put aw yórikqe, lavayiyat ep hin kurs wūwa; nihqe hihta pa pam lavayhtiqat pam wūwanta.

³⁰Noqw hoṅviaya put aw paṅqawu: Pay um qa tsawiniwtani Mary, God núokway ūmi pas qaöwínoa.

³¹Noqw meh, um nö’yilte’, tiyohyat tihtani. Nen um put Jesus yan túṅwani.

³²Pam a’nö hímuni; pu Pas Sus’oveqnihqat Tíatnihqey yan túṅwantiwni. Noqw Tutuyqawhqa God put nayat David moṅqeniyat put máqani.

³³Noqw pam Jacob ahpiy sinoiwtaqamuy amumi sutsep moṅw’iwtani. Pu put moṅwtunatyaat pas qa haqami so’tani.

³⁴Pahsat pu Mary hoṅviayat aw paṅqawu: Noqw hin i’ pasiwtani. Pi nu qa hisat haqam hakiy tāqat ámuma.

³⁵Noqw hoṅviaya lavayhtiqe put aw paṅqawu: Pay ason Qahováriwtaqa Hikwsi ūmi pítuni; pu Sus’oveqnihqa öqalay akw uṅ nākwapnani. Paniqw ōviy ason pam tsāy qahováriwtaqa uhpiy tihtiwniqa God Tíatniqey yan túṅwantiwni.

³⁶Noqw meh, ūṅaqwvi Elizabeth as qa tílawhqat paṅqaqwaṅwuqw, pam wuyovehaq nö’yilti. Noqw pu’ hapi pam navay mūmuyawhtuy aṅ panta.

³⁷Pi God‐niqw pay qa himu qa pasiwtani.

³⁸Pahsat pu Mary paṅqawu: Taa, pay pi nu Tutuyqawhqat tūwikiata. Pay nam um hin lavayhtiqw antani. Noqw hoṅviaya put aṅqw ahpiy’o.

³⁹Noqw ephaqam Mary paṅqw nakwsuqe, haqami tsotsmoy’yuṅqat aqwhaqami k̇aktayi, Judeat‐tutskwat ep kitsókit aw’i;

⁴⁰Nihqe Zacharias kīyat aw pákihqe, Elizabeth aw yuaayku.

⁴¹Noqw Elizabeth Maryt lavayiyat navotq, put ponoveq tiposi tsoomhti. Noqw Elizabeth Qahováriwtaqat Hikwsit akw tuyqawiwk̇aṅw,

⁴²A’nö paṅqawu: Ṅaspi um momoymuy amuṅaqw namorstiwa! Pu uhpiy tihtiwniqa pas hahlayhpit epni.

⁴³Noqw nuy yan’ewayniqw ōviy kurs piw Itutuyqawhqay yuat aṅqaqw inumii?

⁴⁴Oviy pi meh, panis uhlavayi inaqvumiq töqtiqw, pahsat pay tiposi hahlayhtiqe, ivonoveq tsoomhti.

⁴⁵Um God aw tuptsiwhqe, pas hahlayhpit ep’e, ispi Tutuyqawhqa ūmi hin lavaytiqey pas kurs hin qa anhtiniq’ö.

⁴⁶Noqw Mary tuwat paṅqawu: Oviy nu iunaṅṅaqw Tutuyqawhqat pas hihtay’tani.

⁴⁷Ihikwsiy akw nu God nuy ayo távihqat aw hahlayhtini,

⁴⁸Ispi pam manhtuwikiy okiwhqatsiyat aw tātayhq’ö. Noqw meh, yahpiy haqahpiy yantani: Sohsoyam haqami nānaṅk yesniqam nuy hahlayhpit epnihqat paṅqaqwani.

⁴⁹Pi pam nuy qaöwítumalta, i’ hak Sus’öqaltutuyqawhqa, Qahováriwtaqa yan túṅwantiwhqa.

⁵⁰Pam put k̇aptsi’yuṅqamuy óokwatuwa, Sohsokmuy hakimuy nānaṅk yesqamuyu.

⁵¹Is uti! Pam hinurs öqalay’ta! May akw aṅ kwivi’naṅway’yuṅqamuy tatslakna. Piw pumuy tunatyayamuy sóontsana.

⁵²Pam aṅ ö’qaltuy qeniyamuy aṅqw hanna, Nit aṅ ókiwyaqamuy momiq oya.

⁵³Pam aṅ tsöṅsoiwtaqamuy hihta nukṅwat öyna, Nit k̇ahaksinmuy súmavuyawyuṅqamuy aṅqe lālayi.

⁵⁴Pam tumal’ayay Israel aw unaṅwtavi, Itanamuy amumi hin lavayhtiqey hapi panhti. Pam Abraham timuyatuy ōkwatuwa, Pu ahpiy aniwhtotiqamuy sohsokmuyu, Nihqe pam yūmosa panmani.

⁵⁶Noqw Mary payhkomuy mūmuyawhtuy aṅ Elizabeth amum qatut, pu ahoy kiy aqw’a.

⁵⁷Noqw Elizabeth tihtaniqat aw pituqw, pam tiyohyat tihta.

⁵⁸Noqw put kisṅwamat, pu sinomat nanaptaqw, yaw Tutuyqawhqa put qa an’ewakw ōkwatuwa. Nihqe puma put amum hahlayhtoti.

⁵⁹Noqw put nanalsikis talni’taqw, puma tsākw poṅotkuyaniqe öki. Nihqe puma put Zacharias yan tuṅwáya, nayat tuṅwniyat an’i.

⁶⁰Noqw put yuat paṅqawa: Qae, pam John yan mātsiwni.

⁶¹Noqw puma put aw paṅqaqwa: Noqw pi qa hak uhsino pan mātsiwa.

⁶²Pu puma put nayat aw māmasaya, hin pam put túṅwaniqey nāwaknaqat tūviṅtota.

⁶³Noqw pam hihta aṅ pēnaniqey tuhtuy’qe, aṅ pēna: Pam John yan mātsiwa. Noqw puma sohsoyam hin kurs wūwaya.

⁶⁴Noqw pahsat pay put moaat hötsíltiqw, leñiat ṅāhiwa. Noqw pam yuaaykuqe, God aw hahlayhti.

⁶⁵Noqw pumuy kisṅwamat pas kurs hin wūwaya. Noqw sohsoyam Judeat ep tsotsmova yesqam pep hin hiniwhtiqat nānami lavayta.

⁶⁶Noqw sohsoyam put nanaptaqam unaṅwpeq put wūwank̇ahk̇aṅw paṅqaqwa: Hin pa i’ tsay hintani? Noqw Tutuyqawhqat maat put aw unaṅwtavi’ta.

⁶⁷Noqw put naat Zacharias Qahováriwtaqat Hikwsit akw tuyqawiwk̇aṅw, hin hintaniqat lavayhtiqe paṅqawu:

⁶⁸Nam God Israel‐sinmuy Tutuyqawhqaam tayawintiwaa; Pam sinomuy pohtaqe, pumuy qenivo oya.

⁶⁹Pam hakiy a’nö öqalay’taqat wunuptsina, Itamuy ayo ōoyniqata, Tumal’ayay David amuhpiyviyatuy amuṅaq’ö.