Lukas 1:28-69

²⁸A tentu en nakipaita te Mariya a “Namaratu ya makkamu teko, Aboy, a itta hapa ya pangdayawan na teko, te iko ya pinili na,” kunna tentu.

²⁹A nagburung hapa i Mariya en gafu ta uhohug na en, a “Anu panaw ya ikayat na uhohugan teyak?” kunna kan na nonot na. A ya uhohug ha na anghelen tentu a

³⁰“Awem la magburung, Mariya, te dayawan na ka na Namaratu ewan,

³¹te matarun ka sangaw, a maganak ka sangaw ta lalaki, a ingagan muy sangaw ta Hesus.

³²“A am dakal na sangaw ya anak mu a pake malalaki na tolay, a amu sangaw na ngamin tolay ta intu hala ya Anak na Namaratu ewan. A intu hapa sangaw ya pagbalinan na Namaratu ta ari, te intu ya ari muyen nga nekari na Namaratu nga metali ta minakakay na en Dabid.

³³“A awan sangaw ta addet na pagari na, te intu hala sangaw ya makkamu ta ngamin kiden tolay na Namaratu addet ta addet,” kunna ha na anghelen tentu.

³⁴A ya uhohug hapa ni Mariya a “Onay, ammi had kun na katarun ku, te awek para la nakidorug ta lalaki?” kunna.

³⁵“A maski, te ange sangaw teko ya Kahalwa na Namaratu, a ihuga na sangaw ta matarun ka. A pake dayawan da sangaw ya anak men, te ibar da sangaw ta awan ta pakehuyan na, te kagitta hala na Namaratu ewan.

³⁶“A em sangaw itan ya Anti men Lisabet nga awan nagan-anak ta idi, te maski am bakbakat na a ittan ya annam na hulan ta katarun na,

³⁷te maski am anu ya ngagan na a awan ta awa makkwa na Namaratu awa makkwa na ya ngamin,” kunna ha na anghelen tentu.

³⁸“A kwa nak mantu la na Dafu tamewan, petta dumatang hala ya kuman na inuhohug mu teyak,” kunna hapa ni Mariya. A ta nepaguhohug nan ta kumanen a nagtugut hapa ya anghelen.

³⁹A ta nekabalin na anghelen a nahukal hapa i Mariya ta pake lalakwat, a imalistu umange ta takday ili ta lugar na Hudeya,

⁴⁰a nagdulot ta bali na Anti na en Lisabet. A tentu en simarok ta bali na a “Namaratu ya makkamu teko, Anti,” kun ni Mariya tentu.

⁴¹A ta nepakadangag ni Lisabet ta uhohug na en a timollok kan hapa ya asitayen ta umag na sirat na, a ka-ma la napasinapān i Lisabet ta Kahalwa na Namaratu,

⁴²a nagsitang hapa ta masikan; “Iko, Mariya, ya pake nagāsāt ammi ta ngamin kiden bābāy, a Dyos hapa ya mangbendisyon ta anak mina.

⁴³Ammi anu hud ya pangdayawan na Namaratu teyak ta doban na teyak ya hina na Dafu kewan?

⁴⁴On, Aboy, amuk na ta iko sangaw ya maganak tentu, te teyaken nakadangag ta inuhohug men teyak ta ayanen a timollok hapa ya asitay kin ta talak na ta umag na sirat kin.

⁴⁵A yen ta nagāsāt kan hapa, Aboy, te kinurug mu ya uhohug na Namaratu nga nepepadangag na teko,” kunna.

⁴⁶A gafu ta matalak hapa i Mariya a ka-ma la magnot hapa: “Napannu ya nonot ku ta pangdayaw ku te Afu.

⁴⁷A magayayatak ta Dyos nga mangikerutan teyak,

⁴⁸te maski pobre yak a pinili nak. A ta ngamin kiden tolay nga meanak sangaw, a awan sangaw ta awa makanonot ta iyak ya nagāsāt ta bendisyon na Dyos.

⁴⁹Te ya Namaratu ewan nga seppakapangwa na Dyos a nekallak nak hala ta dakal na bendisyon. Madaydayawan mantu ya Dafu tamewan,

⁵⁰te ikallak na ikallak ya ngamin mamat tentu, a kumanen hapa ta simsima da kiden.

⁵¹Ammi ta ngamin kiden magparayag a nepaita na ya kasikan na kamat na, te kinutkutet na kid gafu ta pagparayag da.

⁵²A ya masikan kiden magturay a pinaakban na kid, ammi pinautun na hapa ya alinnak kiden.

⁵³A pake binattug na hapa ya mabisin kiden, ammi nagtalekudan na la ya naba-nang kiden.

⁵⁴A pinagdulot na la ya nekari na en ta gingginafu tam kiden, te nedulot na ya panguffun na ta tolay na kiden,

⁵⁵te nanonot na i mina Abraham ikid na simsima na kiden addet ta addet,” kunna.

⁵⁶A nagyan i Mariya te Anti na en Lisabet addet ta tallu hulan kapye na dimmatang ta agyan na.

⁵⁷A ta datang na paganak ni Lisabet a naganak hala ta lalaki,

⁵⁸a enda hapa itan na kahulun na kiden ikid na karuba na kiden gafu ta kallak na Namaratu tentu, a nekokolu da hapa ya anak na en.

⁵⁹A ta mekawalu en araw a nagaammung kid ha gafu ta banggitan ni Zikaraya ya anak da en, te yen ya gagangay na Hudyo ta pagbunyag da. A ikayat na kahulun na kiden ta makikanāgān ya asitayen ta dama na en Zikaraya,

⁶⁰ammi ya uhohug na hina na abbingen a “Bakkan, te Hwan ya ngagan na,” kunna.

⁶¹“A anu haman ta Hwan, bakawa itta hud ya kumanen na ngagan ta kadwan kiden kahulun muy?” kunda hapa.

⁶²Otturu nagsenyas kid hapa ta dama na abbingen am anu ya ikayat na ta ngagan na.

⁶³A nagpaalap i Zikaraya ta pagsuratan na petta isurat na ya ngagan na, a ya nesurat na a “Hwan ya ngagan na,” kunna. A pake nepagpaka-lat na kahulun da kiden.

⁶⁴Ammi ta nepakasurat ni Zikaraya ta ngagan na anak na en a ka-ma la nakasitang na hapa, a dinayawan na ya Namaratu.

⁶⁵A gafu ta kumanen a nahigalan hapa ya ngamin kiden karuba da, a kanayun bibidan da ya dumatang ta agyan da addet ta sumaned ta ngamin kiden tolay taga Hudeya.

⁶⁶A ya ngamin kiden nakadangag ta pakabidan da ta abbingen a pake netug da hapa ta nonot da, a “Anu panaw ya pagbalinān na abbingin yan?” kunda, te yaga naita da ta itta ya bendisyon na Namaratu tentu.

⁶⁷A ta nepakasitang ni Zikaraya en a napasinapān hapa ta Kahalwa na Namaratu, otturu naglavun;

⁶⁸“Madaydayawan ya Namaratu ewan nga Dafu na Istralita kiden, te nanonot na ya tolay na kiden nga nagtalekudan na ta idi, petta ikerutan na kid ta zigat da.

⁶⁹A kustu hapa ya uhohug na aglavun kiden nga nepeuhohug na Namaratu tekid ta palungu araw, te patayukan nan tekitam ya mangikerutan nga meanak ta simsima ni mina Dabid,