Luk 1:28-69

²⁸Angelo Gabriel watá Maria yan káin kungga ku inuk, “Káe álo, náráwa kák, kák ku Táwi yá kákkot átang pahán kamek.”

²⁹Wáina inán narángga Maria yá hárámutang narángpak tángga ing naruk, “Me náwu rina hánám?”

³⁰Wáina tán kangga angelo yá inuk, “Maria, ma pitáindalák. Ánutu yá pahán álosim kák ka naráng kamek.

³¹Narelák, kák ku kawila átang nangge ámnaná táng tinelák, wata kutná wu Jesu ing mantáinelák.

³²Watá kutná yá táwi hánám hálengga kungga árán du Ánutu yá kut ing iminek, Ánutu Árená Hánám wata Nanggená. Táwi Ánutu málámbá táng táwiná Dewit tá kut táuk kut wáinanyon wa imán

³³watá wu Jekop pán tombong gán king hálengga rámá rámá átang kungga ámna náráwa pin yáni tátáyan háláng wa tángga átang kung kuinek.”

³⁴Wáina inán Maria yá inuk, “Rina tángga ku wáina tunggafeinek? Nák ku máto hurup hánám átat.”

³⁵Wáina inán angelo yá inuk, “Iruk Káungá watá kákkán káin áwán du Ánutu Árená Hánám watán háláng watá kák keháng támorán du rongrongngá káungá hánám máriya tunggafeinek wawu Ánutu Nanggená ing mantáng mineráng.

³⁶Wáinanyon Elisabet sipya kátu wawu náráwa kátoná nangge ma tátáyan tátáwi watá kawilá árán yap 6 hálengga átak wawu nangge ámnaná táng tinek.

³⁷Ánutu yá náut kámá káman ma tátáyan kámá ma árak.”

³⁸Wáina inán Maria yá inuk, “Nák ku Táwi yan yáup náráwa. Nák hára rina tunggafefeya melák wawu wáina álo tunggafeinek,” ingga inán du angelo yá sangga kuk.

³⁹Rám wahára Maria yá sopmuná ingmen tiyawingga it káman Judia ále káin ále yáilá isikikimo átaráng wakáin kuk

⁴⁰ngáyá kung Sekaraia yan it kinan hangga heronge me Elisabet inuk.

⁴¹Wáina inán Elisabet tá Maria yan me wa naruk waháranyon nangge kawin kinan átuk watá háták árángga han du Elisabet wawu Iruk Káungá watá áwáng ep táuk.

⁴²Wáina tán du hahatingga hánám mantáuk, “Táwi yá álo kámá hánám keháng tolingga kuram kák kamuk watá kuram náráwa kámá yámuk wa iháng hátek, me nangge táinelák wawu kuram hányon imuk!

⁴³Enendu nák ku rinaná hálendu Táwina wata maming gá nákkán káin áwek?

⁴⁴Rám ko heronge me nanelák watá kung kárámanna káin háek waháranyon nangge kawinna kinan watá heronge tángga háták árángga háek.

⁴⁵Táwi yá wáina tunggafeinek ingga kanán pálipuk ingga narulák, wata ku kákkán káin kuram bá kuinek!”

⁴⁶Maria yá ing miuk, “Pahánna yá Táwi kutná meng tárut táet,

⁴⁷iná irukna yá ku Ánutu háláng nanamá wata heronge táng mek,

⁴⁸náuta nák ku ále hánám ina enendu yáup náráwaná nák, málámbá neháng toktolik tángngátak. Rám inggálu me máriya átang kuinek kálu ámna náráwa kámuk ká, ‘Ánutu yá kuram álosim wáina táng muk,’ ingga mengguineráng,

⁴⁹náuta Ánutu Ulihálángngá Pálak watá kutná táwi hánám nákka táng namek. Kutná watá káungá hánám átang kuinek.

⁵⁰Watán ukuro watá kung nini wata naráng háting mángga átaráng watyot átnek, ámna náráwa rám nahára átaráng me ámna náráwa máriya tunggafengga áruineráng.

⁵¹Ketná yá yáup tátáwi hánám wa tángga, ámna niyá nák ku árená ingga átnándaráng wa iháng hánghánáng tán káman káman táuráng.

⁵²Watá king tátáwi wa iháng hang tingga ámna kut yáni muná wa ihángngáráng tiuk.

⁵³Ámna niyá háing yámán áturáng wa kutná kutná álosim sing yámán nangga kawin yáni háhátiuk, iná niyá kutná kutná yáni pálak áturáng wawu yásurán hangga hánámá há yáni kuráng.

⁵⁴Ánutu yá táwi ilom náni me rina yánuk wa isutang yáup nángánanggená Israel nán háláng námuk, me pahán káman mená rina miuk wa naráng hátingga Abraham bot ráulaná nán urák náni naruk.” Maria yá me wáina meng háliuk.

⁵⁶Maria málám Elisabet yot yap kaláhu náut wáina átang sangga ku son itná hulá ya kuk.

⁵⁷Kulá Elisabet tá nangge tátáyan rámá yá há áwán du nanggená ámnaná táng tiuk.

⁵⁸Elisabet tán it hulá me sipmá kátu watá Táwi yá pahán ukuro táwi hánám wáina naráng mek ingga pingnga naruráng hára ku kámuk áwáng háláng imángga wata herongená táuráng.

⁵⁹Yáni wu árát kungga rám 8 hálendu kepmá mamaráya áwuráng ngáyá ku áwáng nangge wata kutná wu Sekaraia naning kutná wanyon imánin ingga táuráng,

⁶⁰enendu maming gá ing yánuk, “Muná! Kutná ku Jon mantáinemán.”

⁶¹Wáina men nuknukngá watá inuráng, “Náula yot sándán hun me tombong háranan káman da kut ná kámá wáina muná.”

⁶²Wáina hálendu son naning ga ket tárák táng muráng, nangge wata kutná wa ni ing meinek ingga.

⁶³Kulá naning málám árong náut kámá káman kolem uyiyiyan da yánán táng imát uyiuk ku, “Kutná wu Jon,” ingga uyin kangga hárámutang nangnga yáni háuk.

⁶⁴Waháranyon du son mená me tángga Ánutu kutná meng tárut táuk.

⁶⁵Wáina tán kangga ku itná hulá watá nangnga yáni han pahán yáni kinan pikpiták táuráng, hang waháranyon pingnga watá ále yáilá isikikimo Judia kinan erek kung hálin narángga wáina wáina ingga mengga narángga kuráng.

⁶⁶Kulá ámna náráwa niyá pingnga wa naruráng watá ku hárámutang nanará yáup táwi tángga ku yáni meme táuráng, “Nangge wawu máriya ámna rinaná hánám háleinek?” Táwi yan háláng watá watyot átuk, wata ku wáina miuráng.

⁶⁷Kulá Iruk Káungá watá nangge wata naning Sekaraia hára ep táwi tán du watá profet me ing miuk,

⁶⁸“Táwi Israel yan Ánutu wata kutná meng tárut tánin, náuta watá áwáng ámna náráwaná son há ihinek.

⁶⁹Yáup nanggená Dewit tán tombong hára kungga ku ámna hánghálángngá táwi káman háláng nánámáyan da námuk,