Luke 1:28-69

²⁸Djin-djin-kwabba koorl Mary kidji waangki, “Nakal noonak! Boolanga-Yira nyiny noonookyel kidji baal moorditj yanga-kwabba noonak!”

²⁹Mary wayarn-djil, djin-djin-kwabba dwankiny, kidji baal waangki-djinang moodlooka baalang kaat-bwora.

³⁰Djin-djin-kwabba waangki baal, “Mary! Yoowart wayarn! Boolanga-Yira yanga-kwabba noonany.

³¹Noonook boorda boodjari-biny kidji yidja nop, kidji noonook boorda-kolitj baalany ‘Jesus.’

³²Baal boorda moorditj. Baal boorda kolitj-yan ‘Boolanga-Yirakang Nop’. Boolanga-Yira waangki nidja. Baal boorda yira-yaaka Djelyib, baalang maam-inram David-mokiny.

³³Kidji baal boorda nyiny Djelyib djoowakang Jacob-ang kalyakool. Baalang Boodjer boorda-yaaka kalyakool!”

³⁴Mary waangki djin-djin-kwabba, “Ngany koolamata. Yarn nidja boorda edjena?”

³⁵Djin-djin-kwabba waangki, “Kangya-Kooranyi boorda-koorl noonak kidji Boolanga-Yirakang moorditj boorda yira-malitji noonook. Nidja kooranyi koorlang boorda kolitj-yan ‘Boolanga-Yirakang Nop’.

³⁶Noonook barrang-dwangka Elizabeth, noonang ngoonoolong? Moorta waangki nidja baal yoowart koorlang-yidja, yalga yeyi, baal boodjari maar-keny mikara - kidji baal kabarli.

³⁷Yoowart noolonga nyiny naatj Boolanga-Yira yoowart kayar don.”

³⁸“Ngany Boolanga-Yirakang yakin,” Mary waangki. “Nidja edjena-oola nganyak, moodlooka noonook waangki.” Djin-djin-kwabba wort-koorl baalany.

³⁹Ngolanga, Mary kakatar kidji baal wort-koorl karlamaya kardakal Judea-kang.

⁴⁰Mary bwora-koorl Zechariah-ang maya-maya, kidji baal waangki-kwabba Elizabeth.

⁴¹Elizabeth dwangka Mary-ang maaya, kidji yilak-yilak, baalang maawit marridja baalang doomboo-bwora.

⁴²Kangya-Kooranyi moorartitj Elizabeth, kidji baal woola, “Boolanga-Yira boola-djil yanga-kwabba noonook, kardakor mandang yokaman, kidji baal yanga-kwabba koorlang, keny noonook boorda yidja!

⁴³“Naadjil nidja moorditj noolong edjena nganyak, yeyi nganyang Birdiyarang ngaangk yoowal-koorl, yoowal-koorl djinangak nganyany?

⁴⁴Narla nginda noonook waangki-kwabba nganyany, ngany dwangka noonook, kidji nganyang koorlang ngany-bwora djoorabiny bardang.

⁴⁵Noonook djarnyak djoorab-djoorab, kaaditjiny Boolanga-Yirakang warrinya noonak boorda-edjena!”

⁴⁶Mary waangki: “Nganyang koort yanganan Boolanga-Yira.

⁴⁷Nganyang koortoomitj djoorab narla Boolanga-Yira barrang nganyang ngandabat,

⁴⁸narla baal barrang-dwangka nganyany, baalang wirt yakin! Yeyi moortaman, baalap boorda-waangki ngany djoorab,

⁴⁹narla Boolanga-Yira baal kwadja-don moorditj noolonga nganyang. Baalang kol kooranyi.

⁵⁰Baal ngorna-kwabba moortakak ngiyan woonya baalany kidji yaka baalang, moorta djoowakang koora wer djoowakang yeyi.

⁵¹Baal kwadja-yiraman baalang mardayin maar, kidji baalil yoorang-yoorang warma moorta, moortaman wambadin kaaditjiny.

⁵²Baal ngarda-barrang moorditj djelyiba yirap nyinyiny, kidji baal barrang-yira wirt moorta.

⁵³Baal kwadja-moorartitj koboorl-wirt moorta, baalapany yanginy kwabba noolonga, yalga moorta boola boya-kadak, baalil waangki-wort-koorl baalapany, baalapang maara bilyar.

⁵⁴Baal barrang-yalgawa baalang warrinya, moodlooka baal warranga ngalang maam-inrama, kidji baal yoowal-koorl kidji baalil maar-yanga baalang moorta Israel-ang.

⁵⁵Baal kwadja-barrang-dwangka ngalany, baal ngorna-kwabba Abraham-ak kidji baalang mandang djoowaka kalyakool!”

⁵⁶Mary naan-yaaka mo mila Elizabeth-al, kidji ngolonga, baal wort-koorl baalang karlamaya.

⁵⁷Yeyi kedela koorl Elizabeth-ang maawitang. Baal yidja nop.

⁵⁸Elizabeth-ang ngoonoolonga wer baalang babina, baalap dwangka nidja warda. Boolanga-Yira moorditj yanga-kwabba Elizabeth, kidji baalap mandang djoorab-abiny Elizabeth-ang.

⁵⁹Ngolanga maar-koodjal kedela, moorta koorl maawitang kardjatinyang, alimarn Warriny waangki. Baalap koordook kolitjo baalany ‘Zechariah’, baalang maaman-mokiny.

⁶⁰Yalga baalang ngaangk waangki, “Yoowart! Baalang kol ‘John’.”

⁶¹Ngarl baalap waangki baalany, “Yoowart noonookang ngoonoolonga kolitj-yan ‘John!”

⁶²Karro baalap maar-waangki baalang maamanak. Baalap waangki-djinang baalany naatj kol baal koordook yango baalang nop.

⁶³Zechariah ngakaka mili-mili kidji baal boordak, “Baalang kol ‘John’.” “Kai!” baalap mira.

⁶⁴Winidjinbar, Zechariah kayar waangki karro, kidji baal malyak Boolanga-Yirany yangananiny.

⁶⁵Moortaman wayarn-abiny, kidji nidja warda koorl mandang kardak boodjerang Judea-ang.

⁶⁶Nginda moortaman dwangka nidja warda, baalap malyak kaaditjiiny kidji waangki-djinanginy, “Naatj nidja koorlang boorda-don?” Moortaman, baalap djinang Boolanga-Yirang mardayin nyiny koorlangal.

⁶⁷Kangya-Kooranyi yoowal-koorl Zechariah, John-ang maaman, kidji Kangya-Kooranyi moorartitj baalany. Zechariah waangki Boolanga-Yirakang Warda-Kwabba:

⁶⁸“Ngala boorda yanganan Birdiyar! Baal Israel-ang Boolanga-Yira! Baal kwadja-koorl baalang moortakak, baalapany maar-yanginy kidji baalapany yalkaraniny.

⁶⁹Boolanga-Yira kwadja-yanga ngalany baalang mardayin Nop. Baal boorda barrang-ngandabat ngalany. Baal David-ang djoowak, baalang yakin.