San Lucas 1:28-69

²⁸Angeltaj María cachcaskan lugarman yaycuspa nerkan: —¡Saludayqui, Diospaj ajllaskan! Señor kanwan cachcan —nispa.

²⁹Angelpaj niskanta uyarispataj, María mulljacorkan, muspharkantaj, “¿Ima niytataj munan?” nispa.

³⁰Angeltaj payta nerkan: —Ama manchacuychu, María, Dios favorninwan kanta bendicisunqui.

³¹Cunan onkojyanqui: uj churiyoj canqui, sutichanqui Jesusta.

³²Pay athun canka, sinchi athun Diospaj Churin. Señor Dios gobernajta churanka, ñaupaj gobernaj Davidta jina.

³³Israel nacionta wiñaypaj gobernanka; gobiernontaj mana jayc'aj tucucuyniyoj canka.

³⁴María angelta taporkan: —Mana khariwan caspa, ¿imaynatataj wawayoj cayman?

³⁵Angeltaj contestarkan: —Santo Espíritu sinchi athun Diospaj atiyninwan kanman jamonka uj phuyu jina. Chayraycu chay naciska wawapaj sutenka Santo, Diospaj Churin canka.

³⁶Parienteyqui Isabelpas awicha cayninpi wawayoj canka. Mana wawayoj cay atej niskancupas sojta quilla onkojña.

³⁷Diospajka tucuy ima aticun.

³⁸María nerkan: —Diospaj niskan ruwaska cachun niwaskayquiman jina, imaraycuchus noka Señorpaj sirvejnin cani. Angeltaj riporkan.

³⁹Chay p'unchaycuna María uskhayta purerkan uj llajtaman, loma lomayoj Judea provinciaman.

⁴⁰Chayaspataj, Zacariaspaj wasinman yaycuspa Isabelta saludarkan.

⁴¹Mariapaj saludaskanta Isabel uyarejtin, wijsanpi wawa cuyurerkan. Isabeltaj Santo Espirituwan junt'a caporkan.

⁴²Chhicataj alto vozwan parlaspa nerkan: —¡Tucuy warmicunamanta nejtin Diospaj astawan bendiciskan canqui, churiyquipas bendiciska!

⁴³¿Pitaj noka cani, Señorniypaj maman watunawanpaj?

⁴⁴Saludawaskayquita uyarejtiy jina, waway cusicuywan wijsay uqhupi cuyurin.

⁴⁵¡May cusicuyniyoj canqui, Señorpaj niskan junt'acunanta creeskayquiraycu!

⁴⁶Mariataj nerkan: “Almay Señorpaj athun cayninta alaban,

⁴⁷espirituytaj Salvawaj Diosniypi cusicun,

⁴⁸imaraycuchus Dios khawariwan humilde sirvejninta. Cunanmanta tucuy runa cusiska niwankacupuni,

⁴⁹Tucuy Atiyniyoj Dios athun musphaycunata nokapaj ruwaskanraycu. ¡Payka Santo!

⁵⁰Dioska pay respetajcunata qhuyapayallanpuni.

⁵¹Tucuy atiyninwan ruwan, piturparispa pay pay wapu tucojcunapaj ruway munaskancuta.

⁵²Gobernajcunata urmachin, humillacojcunata athunyachin.

⁵³Yarekaskacunaman tucuy imata kon, khapajcunatataj mana imayojta cachapun.

⁵⁴Ajllaska Israel llajtanta yanaparkan, qhuyapayacuywan mana konkanchu.

⁵⁵Ajinata prometicuska ñaupaj abuelonchiscunaman, Abrahamman, paypaj miraynincunamanpiwan.”

⁵⁶María quimsa quillata Isabelwan cachcarkan, chaymanta wasinman cutiporkan.

⁵⁷Isabelpaj onkocunan tiempo junt'acojtin, churiyoj caporkan.

⁵⁸Kayllamasincuna parientencunapas Señor Dios payta qhuyapayaskanta yachaspa, cusicorkancu; chayraycu purerkancu Isabelta felicitaj.

⁵⁹Pusaj p'unchayniyojta wawata aparkancu circuncisión costumbreta ruwanancupaj. Tatanpaj sutin Zacariasta churayta munarkancu.

⁶⁰Mamantaj nerkan: —Mana. Juan sutin canan.

⁶¹Paycunataj nerkancu: —Familiayquipi mana pipas canchu chay sutiyojka.

⁶²Chhicataj wawapaj tatanta señaswan taporkancu yachanancupaj ima sutitachus churay munaskanta.

⁶³Tatantaj escribinanpaj tablata mañaspa, escriberkan: “Sutenka Juan” nispa. Tucuynincutaj musphararkancu.

⁶⁴Chhicapachataj Zacarías wajmanta parlaporkan, Diostataj alabarkan.

⁶⁵Tucuy kayllamasincunataj mulljaricorkancu. Tucuynejpi loma lomayoj Judea provinciapi willanacorkancu chay pasaskanmanta.

⁶⁶Tucuy uyarejcunataj sonkoncupi nerkancu: “¿Imataj canka cay wawari?” nispa, imaraycuchus Señor Dios atiyninta ricucherkan paypaj allinninpaj.

⁶⁷Juanpaj tatan, Zacarías, Santo Espirituwan junt'a cachcaspa, Diospaj sutinpi parlarkan:

⁶⁸“¡Israelpaj Señor Diosnin alabaska cachun, imaraycuchus runancunata salvaj jamun!

⁶⁹Atiyniyoj Salvadorta cachamuwanchis, Dios casucoj sirvejnin Davidpaj mirayninmanta.