Luk 1:28-69

²⁸Na kanto kel Gabriél di ku Méri, manan di kenen, “Flehew ge. Too kando Dwata ge na kenen i magin ge.”

²⁹Bay kaklinge Méri i man i kasaligan, too msamuk i nawan na toon fandam ku dét gumtatek i manan.

³⁰Bay man i kasaligan di kenen, “Méri, nang ge likò du banlé Dwata ge kafye.

³¹Tadè ge maltien, na lagi i ngàam, na yé dagitam dun Dyisas.

³²Too kenen mdatah na tlo kenen Ngà i Too Mdatah Dwata. Na i Amuto Dwata mlé kenen glal magot i kdee salngad di kagot i gutambulan, Harì Dabid.

³³Na neben kel di landè sen i dad bel Dyékob na landè gusen i kagotan.”

³⁴Bay smalek Méri, manan, “Dét i kibògu mngà ani du sawang libun agu fa?”

³⁵Na tnimel i kasaligan kenen, manan, “Salu i Mtiu Tulus di ge du fite Dwata di ge i kgaganan. Na yé duenam man, i ngà ayé, too kenen mtiu du landè salàan na yé katlo kenen Ngà i Dwata.

³⁶Na fandamam i satu flanekam Ilisabét, manla là mngàan na ta tua, bay ta maltien. Ta nam bulen i tienan.

³⁷Du landè ti là gnagan Dwata.”

³⁸Na man Méri, “Fasak agu i Dwata. Mulà moon mkel di do i kdee manam ayé.” Na kafnge ayé, ta tnagak i kasaligan kenen.

³⁹Di là mlo, ftifas Méri klon mdà du sagwê kenen salu di satu lunsud di dad bulul di probinsya Dyudiya.

⁴⁰Na fusuk kenen di gumnè Sakaraya, du stulen ale Ilisabét.

⁴¹Na kanto linge Ilisabét i talù Méri, lamyak i ngà di lam tienan na fnò Ilisabét i Mtiu Tulus.

⁴²Na falbongan i talùan, manan, “Di kdee dad libun, ge i gumlé Dwata too bong kafye. Na lê banlé Dwata kafye i Ngà lantienam.

⁴³Sawe là gtenan ku yé lmauy do yê i Amugu.

⁴⁴Kantogu linge i talùam gine, ta lamyak i ngà di lam tien-gu du mdà di klehewan.

⁴⁵Banlé Dwata ge kafye du fantoom i ta fgadèan di ge.”

⁴⁶Na talù Méri, manan, “Toogu dnayen i Amugu Dwata mdà di nawagu,

⁴⁷na too bong klehewgu mdà di Dwata, i Falwà do,

⁴⁸du balù ku logu fasak na too agu mdanà, bay gafaldaman agu. Na yé duenam man mdà ani, yé man i kdee dad to gablà di do na do i gumlé Dwata too bong kafye

⁴⁹du too bong mgimòan di do. Too maltulus i Dwata na too kenen tluh.

⁵⁰Mdà di kagatbùan kel di gusenan, toon fite i kakdon di dad to mafè kenen.

⁵¹Ta gfiten i bong mgimòan fagu di kaltulusan. Na i dad to fdatah i ktola, ta snamukan i fandamla.

⁵²I dad mdatah to nun glal, fdanàan ale, bay fdatahan i dad to mdanà.

⁵³Ta fabsolan i dad bitil fagu di dad fye blén di dale, bay i dad to bong knun, landè blé Dwata di dale.

⁵⁴Ta tnabengan i dad snaligan, dunan i bel Israél, na là glifetan fite i kakdon di ku Abraham na i belan kel di landè sen, du dnohòan i fakangan di dad gutambulto.”

⁵⁶Na fanak Méri di saféd Ilisabét kel di tlu bulen klon na kafnge ayè, ta mulê kenen.

⁵⁷Na kanto kel i bangan sut ngà Ilisabét, yé ngàan lagi.

⁵⁸I dademen saldan na i dad flanekan, lingela i ta kfite Dwata i bong kakdon di kenen, na magin ale di klehewan.

⁵⁹Di gwalun du mdà di ksut i ngà ayé, stifun i dad to déé du fimòla ilè di lawehan. Na yé fandamla, dnagitla kenen Sakaraya du fasngadénla di màan.

⁶⁰Bay talù i yêan, manan, “Ise, bay yé dagitan Dyan.”

⁶¹Na manla di kenen, “Bay landè dademeyu dnagit salngad ayé.”

⁶²Na kafnge ayé, sminyas ale di màan, dunan Sakaraya, du snalekla ku dét i kayèan dagit dun.

⁶³Yé duenam man, sminyas Sakaraya du fwè gusmulat na smulat kenen, manan, “Yé dagitan Dyan.” Na too ti tikeng i kdee dad to.

⁶⁴Na ta lê gtalù Sakaraya na flesan dnayen i Dwata.

⁶⁵Too likò i dademela saldan. Na mbel i santulen gablà di mgimò ayé di kdee dad bulul di Dyudiya.

⁶⁶Na i kdee dad to lminge gablà di mgimò ayé, too ale faldam, na smalek ale, manla, “Dét kagkah i ngà ani kadang?” Manla ayé du too gadè na yé magin dun i kaltulus Dwata.

⁶⁷Na i mà Dyan, dunan Sakaraya, fnò kenen i Mtiu Tulus, na tulenan i Tnalù Dwata, manan,

⁶⁸“Dnayento i Amuto Dwata, dunan i fnangamfù i bel Israél, du ta kel kenen di dad ton na banlén ato kagalwà.

⁶⁹Ta nun dek Dwata Falwà too maltulus. Na yé gutambulan ku Dabid, i snalig Dwata.