Luk 1:28-69

²⁸A enjel Gabriel ke vano itagna me veleagna, “Na soleana keda mono itamua a Meri. A God ke mono duamu me vatokegho.”

²⁹Meri ke hahi hehegna me hiohirogna puala na ghaghanagna na komi haghore iraani.

³⁰Ma na enjel ke velea, “O saghoi mataghu Meri, eigna a God ke magnahaghinia na vatokeghogna.

³¹Ighoe koda boebote mo koda vahua a dathemu mane mo koda kiloagna na ahagna a Jisas.

³²Imanea keda nagho mi marea kedana kiloagna a Dathegna a God ke thaba haluhadi puala. Ma a Lod God keda vasopoua kori sapei vunaghi vaghagna a hutugna King Deved.

³³Imanea keda vunaghi pungusira hahali mara Israel ma na nigna na vunaghi pungusiragna teo keda govu.”

³⁴A Meri ke haghore tughu vania na enjel, “Ehava gi keda tutuni iaani? Eigna inau ku boi nere mua duagna sa mane?”

³⁵Ma na enjel ke velea, “Na Tarunga ke Tabu keda horu mai itamua ma na mana nigna a God ke thaba haluhadi puala keda ungahigho. Na vunegna iaani na meomeo keda havi mai itamua, na meomeo ke tabu. Imarea kedana kiloagna a Dathegna God.

³⁶Ma a Elisabet, a toghamu ke kaekave ghohi, keda vahua na gari. Na komi tinoni kena velea e teo ghohi keda vahua sa gari, kari ikeagaieni iia ke boebote me ono ghohi na vulagna.

³⁷Teo sa fata ke vahothahaghinia a God na eiagna.”

³⁸Ma Meri ke ania, “Inau na tinoni tango nigna a Lod God. E toke gi keda tutuni na komi fata ko veleu.” Ma na enjel ke taveti sania.

³⁹Boi hau leghugna iangeni, a Meri ke kaikaliti me taveti saisami vano kori sina meleha iso tadia na komi suasupa kori provins i Jiudea.

⁴⁰A Meri ke jufu ngengeni me vano haghe kori vathegna a Sakaria me haghore totogo vania a Elisabet.

⁴¹Kori vido a Elisabet ke rongovia nigna na haghore totogo a Meri, na gari korai kutugna ke bubutu ma Elisabet ke vonungia na Tarunga ke Tabu.

⁴²Me haghore heta vaghagna iaani, “A God ke vatokegho ighoe tuu vano tadia na koi vaivine gougovu, me keda vatokea na gari ighoe koda vahua.

⁴³God ke vatokeu, eigna ighoe, a idogna nigua a Lod, ke mai sighou.

⁴⁴Inau ku adoa ighoe a idogna nigua a Lod, eigna kori vido inau ku rongovia nimua na haghore totogo, na meomeo korai kutugu ke bubutu eigna ke totogo puala.

⁴⁵A God keda vatokegho eigna ko vaututunia na hava ke taluhaghorea vanigho keda pukuni tate mai!”

⁴⁶A Meri ke velea, “Na hehegu gougovu ke kilothaba a Lod God.

⁴⁷Ma na tarungagu ke lealea eigna a God, nigua a Vahavi.

⁴⁸Toke inau ku boi nagho, imanea ke toghau inau, nigna na tinoni tango. Turughugna ikeagaieni me vano, na komi tinoni gougovu kedana velea a God ke vatokeu

⁴⁹eigna ke eia vaniu na komi naghoi fata kori nigna na mana. Na ahagna ke tabu.

⁵⁰Imanea ke rarovira arahai kena ghaghana bohea tagna na komi pagusu gougovu.

⁵¹Kori nigna na mana imanea ke eia na komi naghoi fata ke sethe. Me gigi aura mara kena tautalunagho kori ghaghanadia ghehedia.

⁵²Imanea ke hati aua nidia na mana na komi king, me vathabara arahai kena mono taluleghu.

⁵³Imanea ke hera ghadia arahai kena rofo itagna na komi fata ke toke, me vetulara au vavaha arahai kena padarongo.

⁵⁴God ke hathera mara Israel, nigna na komi tinoni tango, me rarovira Ebraham ma na komi vinahuhugna hahali, vaghagna ke taluhaghorea vanira ara hutuda.

⁵⁶Ma a Meri ke mono duagna Elisabet nabagna e tolu na vula gi e tabiru kori melehagna i Nasaret.

⁵⁷A Elisabet ke jufungia ghohi na vulagna keda vahuhu, gi e vahua a dathegna mane.

⁵⁸Ara vikegna ma arahai kena mono gharania kena rongovia na fata ke toke a Lod ke ei vania, mena totogo duagna.

⁵⁹Kori vido na meomeo ke alu ghohi na danigna, imarea kena haidu mai bali sogivaughithatha na meomeo leghuagna na vetula nidia mara Jiu. Imarea kena magnahaghinia na kiloagna a Sakaria, na ahagna a tamagna.

⁶⁰Kari a idogna ke haghore heta vanira, “Teo! Na ahagna a Jon!”

⁶¹Ma na komi tinoni kena velea, “Teo sikei tinoni tadia ara vikemu kena tughunira na aha iangeni.”

⁶²Mena haghore kori limadia vania a Sakaria, tamagna na gari, bali adoa na aha imanea keda tughunia.

⁶³Ma a Sakaria ke haghore kori limagna eigna kedana hea na fata bali rioriso itagna. Gi e risoa, “Na ahagna na meomeo a Jon.” Ma na mavitu kena vere nidia puala.

⁶⁴Kori vido vamua iangeni, a Sakaria ke tangomana na haohaghore me kilothaba a God.

⁶⁵Na komi tinoni kena haidu ingengeni kena vere nidia puala, ma na rorongogna na komi fata iraani ke jufu tadia na komi tinoni kena mono tadia na komi suasupa kori provins i Jiudea.

⁶⁶Ma na mavitu kena rongovira na komi fata irangeni, imarea kena toatogha puala mena velea, “Na gari iaani sina naghoi tinoni ivughei valiha.” Imarea kena velea iaani eigna kena adoa na mana nigna God ke mono itagna.

⁶⁷A Sakaria tamagna a Jon ke vonungia na Tarunga ke Tabu, me tuturi aua na hava a God ke velea:

⁶⁸“Ighita kati kilothaba a Lod, nida a God ighita mara Israel, eigna imanea ke mai me vamamaluhara nigna na mavitu.

⁶⁹Imanea ke heghita a Vahavi ke heta tagna na vinahuhugna a King Deved, nigna na mane agutu.