1Tiberius kilpawoldra marapratjana ja mara wora mitaia kapara matja ngamana, Pontius Pilatus najinajibanietja Judaiani, ja Herodes kapakapara Galilaiani, ja Philippus neji nunkani kapakapara Ituraiani ja Trachonitis mitani, ja Lysanias kapakapara Abyleneni,
2Ja Hannas ja Kaiphas Priesta pirna nganana wonti. Jendranguta Johanningu Zachariani ngatamurani Godaia jaura pantjina wonti pitarani.
3Ja nau mitani Jorda kaiarani karakara wokarana wonti ja madlentjandru karitjimalkani multibani jaura kaukaubana wonti madlentji kalingala.
4Worderu Jesaiani Prophetaia jaurani parai, jeruja jatanani: “Karkanietjaia ngaiala pitarani parai: Kaparaia palto nankinganimai ja tidna palto nunkani talku ngankanimai.
5Wipawipa pratjana palparu pantjila nganai, ja mardawonpa ja dako pratjana waka pantjila nganai; ja kuntikunti talku ja palto diladila palara pantjila nganai.
6Ja kana warupotujeli Godaia Kulkampirna najila nganai.”
7Nulu kana wolarani, tana nunkangu dunkana wonti nunkangundru multibanila manila, jatana wonti: “Wiparaia kuparu worajai! Warlenulu jurangu wondrana wonti japa mindrinanto tirini, nau wokarala nganai?
8Madlentjandru karitjinaia tandra talku punkibanau, ja wata wonianau jataterila: “Ngaiana Abraham ngaperi ngaianani ngamalkai;” ngangau ngani jurangu jatai, Goda ngurunguru nganai tanangupini mardandru kupa jiritjibala Abrahamangu.
9Kalara matja pita kaparani parai; pita pratjana, wata tandra ngumu punkibanani wokaribala nganai ja turuni worala nganai.”
10Ja kana wolarali nina jekibana wonti ja jatana wonti: “Mina ngaiani ngankananto?”
11Nulu kalabana wonti ja tanangu jatana wonti: “Warle kati mandru ngamalkai, nulia nunkangu jinkiatimai, nulia wata ngamalkai; ja warle buka ngamalkai, ngankaiatimai bakana jeruja.”
12Ja bakana mardatandrakampanietja wokarana wonti multibanila manila, ja nunkangu jatana wonti: “Ngujangujara jinkinietjajai, mina ngaiani ngankananto?”
13Nau tanangu jatana wonti: “Kampanimai mina jurangu parai kampananto, wata morla!”
14Bakana kalti ja kirraetjali nina jekibana wonti ja jatana wonti: “Ja ngaiani, mina ngaiani ngankananto?” Ja nau tanangu jatana wonti: “Wata kulno jupanau, ja wata kaukau wapanau, ja murlali ngananau kalalani juranani!”
15Kana wolara kalkaterina wonti, ja pratjana ngarali tananali ngundrana wonti Johanningundru, nauja munta Christus nganai kara.
16Johannili kalabana wonti ja jatana wonti pratjanani “Ngato jurana ngapali multibai, ngakangu ngadani kulno wokarala nganai, Nau morla ngurunguru nganai ngakangu; nunkangu ngani wata talku nganai nunkani jinka tidnaputandru dukarala. Nulu jurana multibala nganai Jaolali kulikirieli ja turujeli.
17Marani nunkanani pirra nunkani parai, ja Nulu jiraua nunkani darpala nganai, ja buka tandra nunkani kampani pungaia mapala nganai, ja ngurdi Nulu japila nganai turujeli, nau wata paliai.”
18Ja morla marapu nulu kurukurubana wonti ja ngantjani jaura kana wolarani kaukaubana wonti.
19Herodili kapakaparali, ninapini nulu kurukurubana wonti Herodias nunkanaia nejia noandru, ja madlentji pratjanandru, mina Herodili ngankana wonti,
20Pratjanani bakana jenia ngokana wonti, ja Johannes kanjangari pungani widmana wonti.
21Jendranguta kana pratjanali multibanila manina wonti, ja bakana Jesujeli multibanila manina wonti, ja Nau ngatjinani pariwilpa piririna wonti.
22Ja Jaolali kulikirieli nunkangu ngarina wonti kantji mulapara jeribaka, ja ngaiala kulno pariwilpandru pantjina wonti ja jatana wonti: “Jidni Ngatamura ngantjalu ngankani nganai, jinkangu ngani murlali nganai.”
23Ja Jesus matja kilpawoldra pota parkulu marapratjana nganana, Nulu woninani; ja Nau, worderu kanali ngundrana wonti, Ngatamura nganana wonti Josephani, nau Elini,
24Nau Matthatani, nau Levini, nau Melchini, nau Janaui, nau Josephani.
25Nau Mattathiani, nau Amonani, nau Nahumani, nau Eslini, nau Naggaiani.
26Nau Maathani, nau Mattathiani, nau Semeiani, nau Josephani, nau Judani.
27Nau Joananani, nau Rhesani, nau Zorababelani, nau Salathielani, nau Neriani.
28Nau Melchiani, nau Addiani, nau Kosamani, nau Elmodamani, nau Erani.
29Nau Joseani, nau Elieserani, nau Jorimani, nau Matthatani, nau Levini,
30Nau Simeonani, nau Judani, nau Josephani, nau Jonasani, nau Eliakimani.
31Nau Meleani, nau Menani, nau Mattathani, nau Nathanani; nau Davidani.
32Nau Jesseni, nau Obedani, nau Boasani, nau Salmonani Nahessonani.
33Nau Aminadabani, nau Aramani, nau Esromani, nau Pharesani, nau Judani.
34Nau Jakobani, nau Isaakani, nau Abrahamani, nau Tharani; nau Nachorani.
35Nau Sarungani, nau Raguani, nau Phalekani, nau Eberani, nau Salahani.
36Nau Kainani, nau Arphachsadani, nau Semini, nau Noahni; nau Lamechani.
37Nau Methusalahani, nau Enochani, nau Jaredani, nau Mahaleelani, nau Kainani.
38Nau Enosani, nau Sethani, nau Adamani, nau Godaia.
