Esekiɛli 19

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

43

44

45

46

47

48

¹Yinni Gusunɔ u nɛɛ, ɑ ɡɔɔ swĩiyɔ Isirelibɑn sinɑ bibun sɔ̃, ɑ nɛɛ,

²ben mɛro u sɑ̃ɑwɑ nɡe ɡbee sunɔ niu ɡeu ɡe bɑ yɛ̃ ɡbee sinɑnsun suunu sɔɔ. Gɑ rɑ n ɡen binu kpunɛwɑ ɡɑ n nu diisiɑmɔ.

³Mɑ ɡɑ ɡen buu teu seeyɑ ɡɑ kuɑ kpɛmbu. Gɑ ɡu yɑɑ mwɑɑbu sɔ̃ɔsi, mɑ ɡɑ tɔmbu sɛ̃sukum wɔri.

⁴Ye sɔbɑ ɡen ɡɑri nuɑ, mɑ bɑ ɡu yinɑ bɛriɑ. Yerɑ bɑ ɡu mwɑ kɑ kɔkɔru bɑ kɑ dɑ Eɡibitiɔ.

⁵Mɑ ɡen mɛro ɡɑ mɑrɑ ɡu wurɑmɑ. Adɑmɑ ɡɑ tɛmɑnɑbu kpɑnɑ, ɡɑ wɑ n ǹ koorɔ. Yen biruwɑ ɡɑ mɑɑ ɡen buu teu suɑ ɡɑ seeyɑ ɡɑ dɑm kuɑ, ɡɑ kuɑ ɡbee sunɔ kpɛmbu.

⁶Mɑ ɡɑ wɔri ɡbee sinɑnsun wuuru sɔɔ. Gɑ yɑɑ mwɑɑbu mɛɛrɑ. Mɑ ɡɑ tɔmbu sɛ̃sukum wɔri.

⁷Gɑ tem min sinɑ kpɑɑru wɔri ɡɑ surɑ. Mɑ mɛn wusu kuɑ bɑnsu. Mɑ tɔmbu kɑ ye yɑ wɑ̃ɑ tem mɛ sɔɔ kpuro yɑ bɛrum soorɑ ɡen kukiribun sɔ̃.

⁸Mɑ bwesenu nu mɛnnɑ nu kɑ ɡu tɑbu kuɑ. Bwese ni, nu nɑwɑ yɑm kpuron di. Bɑ ɡu suurɑ kuɑ ɡɑ wɔri.

⁹Mɑ bɑ ɡen wɛ̃ru yɑbɑ bɑ tɑɑbu doke bɑ ɡu sɔri diru ɡɑru sɔɔ. Yen biru bɑ kɑ ɡu dɑ Bɑbilonin sinɑ bokon mi. Mɑ bɑ ɡu kɛnusi sere bɑ ǹ mɑɑ ɡen kukiribu nɔɔmɔ Isirelibɑn ɡuunɔ.

¹⁰Yinni Gusunɔ u mɑɑ nɛɛ, ben mɛro u sɑ̃ɑwɑ nɡe resɛm ye bɑ duurɑ dɑɑ torɑn bɔkuɔ. Resɛm ye, yɑ rɑ mɑ. Yɑ mɑɑ kɑ̃ɑsi yibɑ nim mɛ yɑ wɑɑmɔn sɔ̃.

¹¹Yɑ kɑ̃ɑsi dɑmɡii mɔ yi bɑ koo kpĩ bu kɑ sinɑ dɛki ko. Yɑ wɑɑbu wɑ̃, yen ɡunum kɑ yen kɑ̃ɑsi dɑbinun sɔ̃.

¹²Adɑmɑ bɑ ye wukɑ kɑ mɔru bɑ surɑ temɔ. Woo ɡe ɡɑ wee sɔ̃ɔ yɑri yerun di, ɡɑ yen mɑrum ɡberɑsiɑ. Yen kɑ̃ɑsi dɑmɡii yi, yi ɡberɑ yi dɔ̃ɔ mwɑɑrɑ.

¹³Tɛ̃ yɑ ɡire tem ɡbebum sɔɔ mi ɡɑ̃ɑnu ku rɑ kpi.

¹⁴Mɑ dɔ̃ɔ u yɑrɑ sɑɑ yen kɑ̃ɑsin di u yen mɑrum mwɑ. Yɑ ǹ mɑɑ kɑ̃ɑsɑ dɑmɡiɑ mɔ ye yɑ koo ko sinɑ dɛkɑ. Womu ɡeni ɡɑ sɑ̃ɑwɑ ɡɔɔ wuri. Geyɑ bɑ ko n dɑ ko bɑ̀ n ɡɔɔ wuri mɔ̀.