Esekiel 19

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

43

44

45

46

47

48

¹Godigo po enabolo walali, te Israel king side homu dene ebo e balia po wao po wali.

²“Nago ida te wiegi yai hasa laion sou mu da. Aga te hasa laion omai dabe tomode bidu, tama agai aga wai dabe negelama, te augwali genuai pedelalio.

³Aga ogwa me deli te wiegi yai ogwa bidi laion pedelali. Idago agabolo te hasa gegebo kolesaga ola mani, tama nosali aga te bidi ela tubo hasa laion pedelalio.

⁴Te tǫ kantri bidi dabe hauwago te hasa laiongo ebo kolesaga po odali. Augwaligo te tǫ dedage dogagaselama, tama laion te tǫ dedageba tulaluali. Augwaligo agai penane dilide te gąų yai nai huk munama, tama aga te tǫ kantri Isipba kekasa palio.”

⁵“Te aga idago aga ma asobo tonaluali sesabi mu yali, tiali goli te wai ma begasa me asisąbaso, aga homu sęgę yali. Tialima, agai gasa ogwa me dąį ilali, tama aga me te wiegi yai boma pai hasa laion tiwai pedelali.

⁶Aga genuai pedelama te aga gasa hasa laion dabe dali uda wali, tama idago agabolo te hasa gegebo kolesaga ola mani, tama nosali aga te bidi ela tubo hasa laion pedelai dao.

⁷Agai augwaligo te bomai be dabe koneama, tama aga pelama, te boi bidi dabego taun dabe dolali. Agai i hae umagia bomonama mu obaso, te tigidali we bidi wi yai dao.

⁸Te tigidali pąde elaluali tǫ kantri pedai bidi dabego te hasa laion dali boi hwįagasali. Augwaligo te ba bono mubo wa munama, aga tola salio.

⁹Augwaligo agai penane dilide te gąų yai huk munama, te aga kekasa pali. Augwaligo aga te halobage me delide kalabus elama, tama augwaligo aga te Babilon kingba odasa pali. Augwaligo aga te bomai kalabusiba muani, te aga te Israel bulu du dabeba wi ma painu ebo usu egobeo. Tama te we bidi dabe augwaligo agai i wabo ma odogobeo.”

¹⁰“Dage si, duga ida aga te wain ni tiwai augwaligo te ąį sesege pąde bulali. Tama te ni genuai pedelama, tama nologo hauwa elama, te nai du hauwa walali.

¹¹Te ni nologo dabe boma pelama, tama augwaligo te nologogo te kingo tolasa bilibo dono nigibaso, usu yaibao. Te ni bobage mu holama, te pąde dagalu diągulainu yali. Tigidali we bidigo suali, aga bobage mu holali, te nologo me yabe hauwa elaluai dao.

¹²Tiali goli, te bidi dabego wado po weyu, aga maga gudulama, te aga tǫba degelai. Te giliga asobo badu te posolai wali aselama, te agai wai dabe tigidali boga pai. Te bidi dabego te ni nologo tigidali tologolama, tama te ni nologo dabe sasia pali te augwaligo isiba ulai dao.

¹³Tama augwaligo te ni te wa pai buluba mu sela pelama, tama augwaligo te ąį meni yai tǫde bulalio.

¹⁴Isi te ni pedelama, te ni nologo tigidali dobadi, te ni wai du dabe me dalio. Tama te bomai nologo me elalusiąwai, te kingo tolasa bilibo dono tiwai pedelabo ni nologo tiwai me pedalubeo. E po da, te homu dene ebo balia po da. Te balia po augwaligo hauwa sogo odu geaibao,” wali.