Isikiyel 19

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

43

44

45

46

47

48

¹Wal YAWEI det trubala God bin tok, “Isikiyel, yu garra sing dijan soriwan song blanga det dubala king langa Isreil.”

²Blanga yu mami bin jis laiga laiyan. Imbin lukaftumbat im beibi brabli gudwei, en imbin jidan garram ola dediwan laiyan.

³Imbin growimap im lilwan beibi, en imbin lenimbat im blanga go hanting. En wen imbin growap imbin dagadagat pipul.

⁴En ola pipul brom difrinwan kantri bin irrim stori blanga im, en deibin trepam im langa det bigwan hol. Deibin dregim im garram detlot huk, en deigim im langa Ijip.

⁵Det mamiwan bin trai weidabat blanga im blanga kambek, bat im nomo bin kambek. Det mamiwan bin abum najawan beibi na, en imbin gro brabli jigiwan, det laiyan.

⁶Wen imbin gro bigwan imbin go wokaran garram najalot laiyan. Imbin len blanga go hanting, en imbin oldei dagadagatbat pipul du.

⁷Imbin bitsimap ola strongbala haus en breigimap ola taun. Ebritaim wen imbin jinginat, ola pipul bin oldei bradin nomo lilbit langa im.

⁸Ola pipul bin majurrumap miselp brom ebri kantri blanga fait langa det laiyan. Deibin spredimat olabat net en deibin gajim im.

⁹Deibin oldei taiyimap im, en deibin deigim im langa det king langa Bebalon. Deibin lokimap im deya wulijim dei kaan neba irrim im jinginatbat igin langa det hil kantri langa Isreil.

¹⁰Blanga yu mami bin jidan wulijim det greiptri. Imbin grogrobat wansaid langa riba. Loda woda bin deya, en imbin abum bigismob bushis en frut daga.

¹¹Blanga im wadi bin brabli strongbala, en imbin det wadi blanga det king. Det wadi bin gro brabli longwan en bin gulijap gajimap detlot klaud. Ebribodi bin luk imbin abum loda bushis en imbin brabli longwan.

¹²Bat aibin wail na, en aibin pulumat det greiptri brom im rutpat, en bin tjakidawei im en libum im langa graun. Det win bin kaman brom sanraiswei, en imbin draiyimap im frut daga. Ol im wadi bin ol buldan. Deibin ol draiyap en deibin ol barnbarn langa det faiya.

¹³En imbin jidan langa deset kantri, weya nomo eni woda bin jidan.

¹⁴Det wadipat blanga det tri bin barn langa det faiya, en det faiya bin barnimap im bushis en ola frut daga du. Det wadi kaan neba jidan strongbala igin. Im kaan jidan wadi blanga det king igin. Dijan na det soribala song weya YAWEI bin gibit. En ebribodi bin sing dijan song detmatj.