Text copied!
CopyCompare
Is Lalag te Megbevayà - Ezekiel

Ezekiel 7

Help us?
Click on verse(s) to share them!
1Migkaǥi is Nengazen kayi te kedì te,
2“Sikew is etew, iyan a is Nengazen he MEGBEVAYÀ migkaǥi ziyà te nasyun he Israel te, ‘Iyan en heini ketepusan te tivuuk he tanà te Israel.
3Ketepusan niw en, su ibpeǥezaman ku en keniyu is pauk ku. Edhukuman ku sikiyu te sungkad te menge vaal niw. Ebelesan ku sikiyu te langun he utew memezaat he menge ulaula niw.
4Kenè ku sikiyu egkehizuwan. Edsilutan ku sikiyu tenged te menge vaal niw wey te utew mahawag he menge ulaula niw, su wey niw metueni he iyan a Nengazen.’
5“Iyan a, is Nengazen he MEGBEVAYÀ, migkaǥi te: Ebpekeuma is ebpekedtutundug he kezeetan.
6Ne iyan en heini ketepusan! Egketapus kew en,
7sikiyu is menge meǥinged diyà te tanà te Israel. Iyan en heini andew te kezeetan niw. Hapit en is timpu he egkengeteranta kew. Nepasad en is melipayen he menge andew niw ziyà te menge vuntud.
8Kenè en egkeuǥet ne ibpeǥezaman ku en keniyu is utew ku kegkepauk. Edhukuman ku sikiyu sumalà te vineelan niw. Ebelesan ku sikiyu tenged te utew mezaat he menge vaal niw.
9Kenè ku sikiyu egkehizuwan. Edsilutan ku sikiyu sumalà te vineelan niw wey te utew mezaat he menge ulaula niw. Ne zutun egketuenan niw he iyan a, is Nengazen midsilut keniyu.
10“Guntaan hapit en is andew te kegkezeeti niw! Utew en subra is kezaat niw wey kebpelavew te menge etew.
11Is utew zan kegkemesipala edlikù diyà te kandan he silut tenged te kelelalung dan. Wazà egkesamà kandan, ne egkahanew is langun he ketiǥeyunan dan.
12Uya, hapit en is timpu te kedsilut. Kenè en ereg he egkelipey is ebpememasa tenged te nekahangyù dan, wey kenè en ereg he egkeseeng is ebpemelegyà tenged te neǥansi sikandan, su is pauk ku egkeǥezaman te langun.
13Emun duen pa menge nigusyanti he egkesamà, kenè en sikandan ebpekelikù te nigusyu zan, su is nekaǥi ku he egkehitavù diyà te langun he menge etew te Israel egkehitavù iyan. Is minsan hentei he ebaal te mezaat kenà egkelibri is untung din.
14Minsan ibpezaǥing dan pa is trumpita su wey mekepengandam is langun te kebpekidtebek, ne wazà eduma ziyà te edtebekan, su is langun ebpekesaǥad te pauk ku.
15“Is menge etew ziyà te ǥawas te inged, ebpatey te tebek. Ne is kenà ed-awà diyà te inged ebpatey te zaru wey vitil.
16Ne emun duen ebpekelingkawas te kemetayen he ebpekepelaǥuy ziyà te menge vuvungan, ebpekezag-es iring te merepatik, tenged te menge salè dan.
17Edluyahan is menge velad dan wey menge vuel zan.
18Ebivisti sikandan te saku wey egkiskisan dan is menge ulu zan te kebpaahà te kegkeseeng dan. Ne utew sikandan egkahandek wey egkeeled.

19Ibpenimbag dan is menge pelata zan wey menge vulawan dan diyà te menge zalan he henduen be te meremerik he menge vutang. Kenà heini ebpekelibri kandan dutun te andew he ibpeehè ku is kegkepauk ku. Kenà heini ebpekahantey kandan su iyan heini hinungdan te kebaal zan te salà.
20Impegalbu zan is mekempet he menge elahas dan, ne migamit dan heini wey zan mekavaal te ledawan te utew mezaat he menge ed-ezapen dan. Umbe edhimuwen ku is menge ketiǥeyunan dan he iring te meremerik he menge vutang para kandan.
21Ibpaaǥew ku heini te lalung he menge etew he ziyà te zuma he lugar, ne edremerikan dan heini.
22Ebpesegdanen ku en sikandan dutun te kedremeriki zan wey kebpenevana zan te menge azen dutun te lugar he utew ku mibmahal.
23“Ibpevihag ku is menge etew ku su grabi is hinimetayà wey kesamuk diyà te nasyun dan.
24Ibpaaǥew ku is menge valey zan te utew lalung he menge etew he ebpuun diyà te zuma he menge nasyun. Edtepusen ku is kebpegalbu te lavew he menge etew ziyà te kandan, ne ebpesegdanen ku en he remeriki is menge simbahan dan.
25Egkeseǥazan dan is utew kegkahandek ne ebpen-ehè dan te kelinew piru kenè dan heini egketuredu.
26Egkeumahan sikandan te ebpekedtutundug he kezeetan wey mezaat he menge tudtul. Ebpepenudtul zan pezem te menge ebpeneuven piru kenà sikandan egketudtulan. Kenè en ibpenurù te menge memumuhat is mehitenged te kesuǥuan, ne wazè en daan penurù he ebpuun diyà te menge pengulu.
27Edlalew is hadì wey egkaawà is perateng din, ne egkerkeren is menge etew tenged te kegkahandek. Edsilutan ku sikandan sumalà te vineelan dan, ne ebeelan ku ziyà te kandan is mibeelan dan diyà te zuma. Ne egketuenan dan dutun he iyan a Nengazen.”