Text copied!
CopyCompare
Godigo dwagi yai po buku - Esekiel

Esekiel 7

Help us?
Click on verse(s) to share them!
1Genuai Bidigo enabolo te tiwai po wali,
2“Tǫde bidio, ena God Genuai Bidi, eno te tiwai po Israel augwalide elalubao. Te e side da, te tigidali Israelgo bodolu sia sabo side elalubao, te augwaligo tǫ pedai tigidali badu te tama tiaibao.
3Dage Israelgo, odiąo. Te dąį yali bodolu pedelalio. Eno haliga sębę dwai mu elalubo, te megi eno dwai dene dageba pedalubo sę ilaibao. Dagego te tama dwai kolesaga ebaso, tama tialima, megi eno dage po tų ilaibao. Te eno dagego dwai kugumini yai kolesaga dabe te dolo dageba wei ponaibao,” wai dao.
4“Te eno dage bugagia bidimainu me sula tagalogobeo. Te eno dagede olo mu tau sabo wiegi yai kolesaga me egobeo. Menio. Dagego te dwai kolesaga dabe ebaso, tialima te eno dageba dwai dwai dene mabo sę yaibao. Tama dagego te tiwai bugagia konemainu ebao, te ena digi ena Genuai Bidi da waibao,” te po wali.
5God Genuai Bidigo te tiwai po wali, “Te gasa tobage dolobo sę mu dageba pedelaibao. Tama te dolobo sęgo te dage tigidali silabo sę pedelaibao.
6Megi da, te dage dolabo bodolu side te pąba pedelalio. Te sogo pedalubo si da, te pąde mu tama pedelaibao.
7Dage Israel tǫ kantri we bidi dabego odiąo. Te dage dolabo si te sabi badu pąba pedelalio, te dage dolaibao. Te dage te bulu du dabeba sisinama, te wiegi yai pemene eyu lotu wali tiwai ma egobeo. Menio. Te dage megi da sisinama wi umagia naga eyu, wabo pabo bidi tiwai yaibao,” walio.
8“Eno haliga sębę dwai mu dageba ebao, bidigo wę gelebo tiwai yaibao, tama tibaso megi da eno dageba te dwai tigi dene mabo sę te eno haliga sębę ebo usu nama yaibao. Dagego te dwai kolesaga ebaso, te dage eno po tų ilaibao. Eno te dagego dwai kugumini yai kolesaga ebo dolo wei ponaibao.
9Te dage eno gogolama, bugagia bidimainu me sula tagalogobeo. Te eno olo mu tau mabo wiegi yai kolesaga dageba me egobeo. Menio. Dagego te tama dwai kolesaga ebaso, te eno dwai sęgę mabo dene dageba mawaibao. Tama dagego te tiwai bugagia konemai hagede ebao, ena digi ena Genuai Bidi, te eno tama eno te dwai sęgę mabo sę dageba tagala palobo dao,” te po wali.
10Tama Genuai Bidigo po enabolo ma weyu, te tama po wali, “Te dolabo genuai sę pedelabo bodolu pąba yagasalio. Sesemane sogo te Israel dabe augwa abagi dabe dali dwai sę idualio. Tama augwaligo te hagoma ebo kolesaga ebo sę bomo yai dao.
11Tama augwaligo te dwai kolesaga genuai mu pedelai. Tialima, eno te augwali tigidali ela silaibao, te dwai kolesaga yali bage tigidali dolaibao. Te eno augwaligo nogi aiyaba elaluama, tama augwaligo gana pai nai dabe dolama, tama augwaligo te dwai kolesaga dabe ma egobeo,” wali.
12“Te dolabo sogo pąde yagasalio. Te sogo te nai doado bage abelebo bidi dabe augwaligo homu pemene me egio, te nai doado bage maketde mubo bidi dabego me haliga sęgę me elamuo, magi baso menio, eno te sęgę mabo sę te tigidali bageba yaibao.
13Te bidi mego te gasa bidi me deligo agaba te nai me deli abelemainogo yali bidi, aga te sesabi elama, bobobage sogo bidali goli, te tagalao, agai te nai wei ma sainu ebo usu egobeo. Magi baso meni, eno te tiwai po wai dao, eno te tigidali bidi dolaibao, te eno po me hasegelegobeo. Tigidaligo dwai kolesaga ebaso, tialima tigidali te dolaibao.
14Augwaligo te hwįabo sisi ebo biugel bu obaso, te tigidali ami bidi dabe sisi ebo da. Tiali goli, te bidi me deli hwįgi pogobeo, magi baso meni, eno te hani tigidaliba haliga sębę elama, te augwali eno wi dwai mu ilai dao,” te po walio.
15Genuai Bidigo po ma weyu, te tiwai wali, “Boi bidi dabego te Jerusalem bagua salio. Te taun bulu badu bidali we bidi dabe augwali te boi bidi dabego bobobage hwągo ela mueibao. Te taun moni obo tomode bidali we bidi augwali da, te augwali nai menia selama, te haniani gasi selama, te augwali isaibao.
16Te me badu usu yali da, te augwali bulu duba wi pelawaibao. Tama te tigidali wi pali we bidigo te augwa yali dwai kolesagade homu kone palama, te augwa haliga sęgę elama, dwai gela waibao, tama augwaligo gela wabo te odogo bulude bidibo ba dabego gela tiwai pedelaibao.
17Te augwaligo nogo bomo kimi meniama, te augwaligo sągą didibili dogia paibao.
18Tama augwa te homu dene ebo ugwa dabe gudama, te augwali didibili umagi mu yaibao. Tama te tigidali te hale ebaso, te augwa tobolu nisi poala sąwaibao.

19Tama augwa te gol me silva dabe te olo nai pobele bage tiwai te sunumiba sąsąwaibao, magi baso meni, te Genuai Bidigo haliga sębę augwaliba pedalubo sogo te gol me silvago augwali tau sogobe homu yaibao. Augwaligo te gol me silva tuabo usu egobeo, tama me te gol me silvago te magi sę me delide augwali tau me sogobe homu yai. Augwaligo te gol me silva gedugo suali godolo ebaso, te kolesagade augwali kekebaso, te augwaligo dwai sę yali dao.
20Polobadu augwaligo te gol me silvago nigali au dobage elalu, tama augwa te naide gana pai mu bidaluai dao. Tama augwaligo te gol me silva selama, tama te haniani tibo god dabe piksa noma nigali. Te kolesaga eno godolo homu mu meni baso, tama tialima megi da, eno te gol me silva dabe te augwa gedude dwai nai tiwai mu pedalumainu yai dao,” wali.
21Te Genuai Bidigo po te tiwai ma wali, “Eno te bidi dwai dabe mu hodolama, te augwaligo augwa tǫ kantri pedai tagalama asu, te Israel dabego nai doado bage wi saibao. Te augwaligo sela pelama, tede augwa dwai sę haniani yaibao.
22Te augwali eno te wiegi yai genuai be tomoba pomainogo sula tagalama, tama eno gedude te be dwai meda pedalubo sę ilaibao. Te augwali eno me paligobeo. Mu menio,” wali.
23“Te Israel we bidi augwaligo subigila sę yali. Te augwa tǫ kantri tigidali pedai badu augwaligo te gasa we bidi dabeba dwai sę eyu, te hauwa we bidi ela muani. Tama tialima, te augwali kęnabo sen dabe nigibo sogo da po wai dao.
24Tama tialima, eno Genuai Bidigo po odisąbo hani bidi dabe sesaibao, augwali te bidi dwai mu dabe, tama augwali te Israel tǫ kantriba aselama, te Israel dabe augwa be dabede sela sąnama, te be dabe saibao. Tama augwaligo te Israel dabego lotu wabo pesage dabe dolaibao. Te Israel bomai bidi dabe augwali te wi naga elama, te augwaligo hagoma me ma egobeo.
25Te dwai sogo mu te Israel augwaliba asaibao. Te augwa haliga nagame elama bidabo homu godolo yaibao, tiali goli augwaligo te tiwai ebaso usu egobeo. Mu meni yaibao.
26Te dolobo sę haniani augwaliba pedaludu geaibao, tama augwaliba te dwai nai dabe hauwa pedelabo po odu geaibao. Tialima, augwali wi ebaso, augwali te geme nosali pedelabo sę po pusubo bidi profet dabeba pelama, tama augwaliba hanalu te eno homude ebo yabo sę po hanilabo po koneai hagede yaibao, tiali goli te eno po augwaliba me magobeo. Te pris dabego augwali ola mabo po meni yaibao, te tobolu bidi dabe augwaligo te wiegi yai homu kolesaga augwaliba maiabo meni yaibao.
27Tama augwa king da, te haliga sęgę elama, te aga homu kolesaga da te tigidali dolaibao. Tama te we bidi augwali da wi elama, noma saibao. Eno augwaligo ebo dwai kolesaga tigidalide homu kone palama, te eno augwaliba dwai sęgę mabo dene mawaibao. Te augwaligo gasa we bidi dabe po tų ilali kolesaga tiwaigo te eno augwali po tų ilaibao. Te tiwai augwaligo bugagia konemai hagede yaibao, ena digi ena Genuai Bidigo te sę yai dao,” te po obao.