Text copied!
CopyCompare
Luda yã takada kũ Bisã yão - Esekiɛli

Esekiɛli 7

Help us?
Click on verse(s) to share them!
1Yinni Gusunɔ u Esekiɛli sɔ̃ɔwɑ u nɛɛ,
2wunɛ tɔnun bii, ɑ swɑɑ dɑkio ɑ nɔ ye nɑ gerumɔ bɛɛ Isirelibɑn sɔ̃. Nɑ nɛɛ, kpeerɑ wee. Tɑ pusi bɛɛn tem goonu nnɛ kpuro sɔɔ.
3Tɛ̃ tɑ koo bɛɛ deemɑ. Kon de nɛn mɔru yu bɛɛ wɔri. Kon bɛɛ siriwɑ nge mɛ bɛɛn sɑnu sɑnusu sɑ̃ɑ. Kpɑ n bɛɛ kɔ̃sɑ ye i kuɑ kpuron ɑre kɔsie.
4Nɑ ǹ bɛɛ mɛɛrimɔ kɑ wɔnwɔndu. Nɑ̀ n bɛɛ sɛɛyɑsiɑmɔ, nɑ ǹ tii nɛnumɔ. Kɔ̃sɑ ye i kuɑ yerɑ kon bɛɛ kɔsiɑ. Kpɑ i giɑ mɑ nɛnɑ nɑ sɑ̃ɑ Yinni Gusunɔ.
5Amɛniwɑ nɛ, Yinni Gusunɔ nɑ geruɑ. Nɑ nɛɛ, kɔ̃sɑ wee, yɑ ǹ mɑɑ kɑ gɑɑ weenɛ.
6Kpeerɑ wee, kpeerɑ wee. Wee tɑ seemɔ tɑ wee bɛɛn mi. Wee tɑ sisi.
7Bɛɛ Isirelibɑ, bɛɛ be i wɑ̃ɑ tem mɛ sɔɔ, sɑɑ yɑ turuku kuɑ. Tɔ̃ɔ te, tɑ turuku kuɑ, tɑ ko n sɑ̃ɑwɑ wɑhɑlɑn tɔ̃ru. Tɔ̃ɔ te sɔɔ, nuku dobun kuuki kun mɑɑ nɔɔrɑmɔ guunu wɔllɔ.
8Tɛ̃ kon de nɛn mɔru yu se. Nɑ ǹ ye yɔ̃rɑsiɑmɔ mɑ n kun mɔ yɑ kɑ tii sɑrɑ. Kon bɛɛ siriwɑ nge mɛ bɛɛn dɑɑ yɑ nɛ.
9Nɑ ǹ bɛɛ mɛɛrimɔ kɑ wɔnwɔndu. Nɑ̀ n bɛɛ sɛɛyɑsiɑmɔ, nɑ ǹ mɑɑ tii nɛnumɔ. Kɔ̃sɑ ye i kuɑ yerɑ kon bɛɛ kɔsie kpɑ i giɑ mɑ nɛ, Yinni Gusunɔwɑ nɑ bɛɛ sɛɛyɑsiɑ.
10Tɔ̃ɔ te wee tɑ tunumɑ, tɑ turuku kuɑ. Bɔbunu kɑ tii suɑbu bu sosimɔ.
11Bɔbunu nu kuɑ nge dɛkɑ ye bɑ rɑ kɑ tɔmbu so. Gɑ̃ɑnu kun mɑɑ bɛɛ tiɑmmɛ. Tɔn dɑbiru tɑ koo gbi. Bɑɑ wɔkinu kun mɑɑ nɔɔrɑmɔ. Goo kun mɑɑ weeweenu mɔ̀ bɛɛn sɔ̃.
12Sɑɑ yɑ turuku mɔ̀. Tɔ̃ɔ te, tɑ wee. Wi u dwemɔ u ku yɛ̃ɛri. Wi u mɑɑ dɔrɑmɔ u ku swĩ. Domi nɛ, Yinni Gusunɔn mɔru sisi tɔn be bɑ wɑ̃ɑ tem mɛ sɔɔ kpuron sɔ̃.
13Wi u dɔrɑ u ǹ mɑɑ ye u dɔrɑ wɑsi u mwɑ bɑɑ ù n wɑ̃ɑ wɑ̃ɑru sɔɔ. Domi gɑri yi bɑ geruɑ tɔn be kpuron sɔ̃, yi koo koorɑ. Goo sɑri wi u koo yɑkiɑrɑ yèn sɔ̃ bɑɑwure u wɑ̃ɑ kom bɛrɛtɛkɛ sɔɔ.
14Wee bɑ kɔbɑ so bɑ sɔɔru kpɑ. Adɑmɑ ben goo kun tɑbu seemɔ, domi nɛ, Yinni Gusunɔn mɔru seewɑ be tɔn dɑbi ten sɔ̃.
15Yinni Gusunɔ u mɑɑ Esekiɛli sɔ̃ɔwɑ u nɛɛ, tɑbu ko n wɑ̃ɑwɑ swɛɛ sɔɔ kpɑ bɑrɑnu kɑ gɔ̃ɔnu nu n wɑ̃ɑ yɛnusɔ. Tɔmbu bɑ koo gbi tɑbu sɔɔ yɑkɑsɔ. Be bɑ mɑɑ wɑ̃ɑ wuu sɔɔ bɑ koo gbiwɑ gɔ̃ɔru kɑ bɑrɑnun sɔ̃.
16Be bɑ mɑɑ kisirɑ bɑ koo kpikiru dɑwɑ guunu wɔllɔ nge kpɑrukonu kpɑ bu weeweenu ko ben torɑnun sɔ̃.
17Ben nɔmɑ ko n sɑ̃ɑre dɑm sɑrirun sɔ̃. Kpɑ ben dũɑ yu diiri.
18Bɑ koo sɑɑki sebewɑ kpɑ bu ben seri kɔni nuku sɑnkirɑnun sɔ̃. Bɑ koo nɑndɑ kpɑ sekuru bu mwɑ.

19Bɑ koo gobi kɔ̃ swɛɛ sɔɔ, kpɑ bu ben wurɑbɑ gɑrisi nge kubɑnu, domi sii geesu ǹ kun mɛ wurɑ yen gɑɑ kun kpɛ̃ yu bu fɑɑbɑ ko Gusunɔn mɔrun tɔ̃ru sɔɔ. Bɑ ǹ gɑ̃ɑnu wɑsi ye yɑ koo bu debu, ǹ kun mɛ ye yɑ koo ben binɛ kpunɑsiɑ, domi sii geesu kɑ wurɑ yerɑ yɑ derɑ bɑ torɑ.
20Bɑ tii suɑ ben wurɑn sɔ̃. Mɑ bɑ kɑ ye bwɑ̃ɑroku bɑkɑnu kuɑ ni nu nɑnum mɔ. Yen sɔ̃nɑ nɛ, Yinni Gusunɔ kon de bu ye tusi.
21Kon de tɔn tukobu bu ben dukiɑ ye gurɑ, kpɑ be bɑ ǹ Gusunɔn bɛɛrɛ yɛ̃ bu ye tubi di bu ye kpuro disi doke.
22Nɑ ǹ kɑ bɛɛ yinɑmɔ sɑnɑm mɛ gbɛnɔbu bɑ koo nɛn sɑ̃ɑ yerun dukiɑ disi doke bu gurɑ.
23A yɔni sɔɔru koowo domi tem mɛ, mu tɔn gowobu yibɑwɑ. Mɛyɑ bɛɛn wuu ge, gɑ tɔmbu yibɑ be bɑ dɑɑ bɔɔbɔyɑ mɔ.
24Kon bwesenu sokumɑ ni nu nuku kɔ̃suru bo, kpɑ nu bɛɛn yɛnusu mwɛɛri. Kon bɛɛn dɑmgibun tii suɑbu kpeesiɑ. Kpɑ n de bu bɛɛn sɑ̃ɑ yenu disi doke.
25Kɑm kobu wee. I ko i fɑɑbɑ kɑsu, ɑdɑmɑ i ǹ wɑsi.
26Kɔ̃sɑ yɑ koo sosi kɔ̃sɑ sɔɔ. Mɛyɑ lɑbɑɑri kɔ̃si yi ko yi n nɔɔrɑmɔ yi n dɔɔ. I ko i Gusunɔn sɔmɔbu bikiɑ bu kɑ̃siru kɑsu kpɑ bu bɛɛ sɔ̃ ye yɑ koo nɑ. Adɑmɑ yɑ̃ku kowobu bɑ ǹ ko n Yinni Gusunɔn woodɑ yɛ̃. Bɛɛn guro gurobu bɑ ǹ mɑɑ bwisi gɛɛ mɔ bu tɔnu kɛ̃.
27Bɛɛn sinɑ boko u koo gɔɔ sinɑ kpɑ sinɑ bibu bɑ n wurure. Tɔmbu kpuro bɑ ko n diirimɔ. Kon bu kuɑwɑ nge mɛ ben kookoosu nɛ. Sɑɑ ye sɔɔrɑ bɑ koo giɑ mɑ nɛnɑ nɑ sɑ̃ɑ Yinni Gusunɔ.