Text copied!
CopyCompare
Kâte Bible - Binaŋ Qâhâc I

Binaŋ Qâhâc I 11

Help us?
Click on verse(s) to share them!
1Eme Israe ŋic jaŋe Heboroŋ haeo Dawidirao tumaŋne‐fârerâ ʒiŋuc âzâcnembiŋ: “Manakic, nâŋe gore soc â biuc.
2Juwicnao Saulo e ŋicwofuŋ juhame jaha go Israe momori ʒikao bânie‐jarehuc mocwâc bârisiec‐jopameŋ. Ehame Wofuŋ Anutugezi ʒiŋuc gazawec: ‘Go Israe ŋicfâc‐nane soŋaŋ‐jopahuc fekicne‐jeŋic juzemec.’”
3Irec Israe micne sasawa jaŋe Heboroŋ haeo ŋicwofuŋ Dawidirao tumaŋne‐fârembiŋ. Eme Dawidizi ira Wofuŋte maio jaŋehec ʒâʒâfic eme jaŋe Wofuŋzi Samuerao dâŋ muwec irec sâcko wokemaŋ ruacnehuc Israe ŋic jaŋere ŋicwofuŋ âkendâŋnembiŋ.
4Eme Dawidi â Israe ŋic sasawa jaŋe Jerusalem haeo rambiŋ. Ira mâreŋ rune Jebusi ŋic jaŋe jumbiŋte hae irec ʒâŋe wâc Jebusi mujumbieŋ.
5Jebusi hae rune jaŋe ine Dawidi ʒiŋuc âzâcnembiŋ: “Go ʒira mi warezemec.” Iŋuc mupie Dawidi e sifu Zioŋ ficsanaŋ, ʒâhec Dawidire hae qizec mujumbieŋ i rowec.
6Erâ muwec, “Ŋic moczi fuŋkerâ Jebusi ŋic jopaocmu e momori jaŋere micne â fekicne juocmu.” Iŋuc mume Zeruja ŋokâ‐ticne Joabezi fuŋkerâ fewec, irec eki micne ewec.
7Eme Dawidi e ficsanaŋ ira ŋeŋe juju ewec. Irec hae ŋondeŋ i Dawidire hae mujumbieŋ.
8Eme Dawidi e Milo ficsanaŋ irecnec fuŋkerâ hae bahame kikic efârewec. Ehame Joabezi hae ŋondeŋ gâcne sâko bâpiaŋke‐fârewec.
9Erâ Dawidi e Anutu Tâpiri Ɋuŋɋasaŋ Wofuŋzi ehec juwecte ʒâŋe biŋe sâkohec erahuc juwec.
10Ŋic ʒi jaŋe Dawidire ŋicfâc tapiri ɋicwânʒâŋhec jaŋere micne juhuc Wofuŋzi Israe ŋic jaŋere dâŋ muwec irec sâcko ŋicwofuŋ âkendâŋnehuc Israe ŋic jaŋehec mâmâc uucmaŋ‐ticnao hone bafic ecnehuc qaqa sanaŋ embiŋ.
11Dawidire ŋicfâc tâpiri ɋicwânʒâŋhec jumbiŋ jaŋere ʒâŋe biri ine ʒiŋuc: Hakimoni ŋic Jasobeam e ŋic qacmomori jahec â moc jaŋere micne juwec. Eki hâcne sându‐ticnezi ʒoaŋ mocjahao ŋic 300 âke hâmoc‐jopawec.
12Ehame ŋic tâpirihec jahec â moc jaŋere ŋondeŋko ŋic moc Jasobeamtao ʒuhuckerâ juwec ʒâŋene Eleaʒa. E Ahohi ŋic Dodo ere ŋokâ.
13E Dawidihec Pasidamim haeo juha Filisa ŋic jaŋe ira ʒikare tumaŋnembiŋ. Mâreŋ ŋondeŋ ira padi gie sâko moc fowec. Eme Israe ŋic jaŋe Filisa ŋic jaŋere hâwic‐jopame wisembiŋ.
14Iŋuc epie Eleaʒa e ijaha sanaŋkerâ domahuc mâreŋ ŋondeŋ i ŋezickerâ Filisa ŋic jopawec. Iŋuc eme Wofuŋzi ŋezic‐jopaha sanaŋkembiŋ.
15Filisa momori ŋic jaŋe Refaim wâneŋko teuŋ âterâ fohapie ŋic micne 30 jaŋeraonec jahec â moc jaŋe Adulam qânâ hawecko Dawidirao humbiŋ.
16Dawidi e dameŋ ira ficsanaŋko ŋehuc juwec â Filisa momori jaŋe ine Betelehem hae rorâ ŋembiŋ.
17Eme ʒoaŋ mocko wiac mocte aŋacke sâqoreme ʒiŋuc muwec: “E, mozi Betelehem haere motâcko opâ nombâŋ ŋekac irecnec opâ moc nareme nazapo!”
18Iŋuc mume manarâ ŋic tâpiri ɋicwânʒâŋ‐jeŋichec jahec â moc jaŋe faharerâ Filisa ŋic jaŋere teuŋ fotâcnerâ Betelehem haere motâcko opâ nombâŋ ŋewec irecnec opâ fiarâ bara Dawidi râcnembiŋ. Eme e opâ i mi nânâ Wofuŋte biŋe hoŋkehuc

19ʒiŋuc muwec: “No wiac iŋucne Anutu‐nanere maio moc mi ejâmbâŋkepemu. No ŋic ʒi jaŋe juju‐jeŋic qaisockehuc opâ bawarembieŋte sâcne mi nâpemu. No opâ irec manape jaŋere soc tinac ekac.” Iŋuc muhuc qikiŋnewec. Ŋic tâpiri ɋicwânʒâŋ‐jeŋichec jahec â moc jaŋe mâsi iŋuc hâcne ehuc jumbiŋ.
20Ehame Joabere ɋa Abisai e ŋic micne 30 jaŋere femicne juwec. E sându‐ticnezi râsi 300 âke‐hâmoc‐jopahuc micne jahec â moc jaŋerao ʒuhuckerâ ʒâŋe biŋe sâkohec ewec.
21E ŋic 30 jaŋe qâhuc‐jopa‐fârerâ micne‐jeŋic juwec. Ehuc sifu ŋic jahec â moc jaŋere sâc mi bâfuawec.
22Â Jojada ŋokâ‐ticne Benaja e Kabezele haeoneczi ŋic tai tâpirihec juhuc wiac gâcne bocjaha ebac ewec. E Moabi ŋic momori wânʒâŋ jajahec jofawec. Erâ sinou wahahuc fowec dameŋ ira hurâ laioŋ moc nombâŋko hurâ domaha honerâ qâhâmowec.
23Erâ Aigita ŋic ʒoricne ʒora sâcticne 5 kubi e qâhâmowec wâc. Aigita ŋic e sându‐ticne i wâtuŋ neŋgocne iŋucne bajuwec â Benaja e ine tubac sawa barâ rawec. Eme ra Aigita ŋic bâfuarâ sându bajuwec i jâoc rorâ e jahacne sânduzia âke‐hâmowec.
24Jojada ŋokâ‐ticne Benaja e wiac iŋuc ehuc micne jahec â moc jaŋerao ʒuhuckerâ ʒâŋe biŋe sâkohec ewec.
25E ŋic 30 jaŋe qâhuc‐jopa‐fârerâ ʒâŋe rara sâkohec juwec, erâ sifu ŋic jahec â moc jaŋere sâc mi bâfuawec. E iŋuc eme Dawidizi momori fuŋfuŋfâc‐ticne jaŋere micne âkendâŋnewec.
26Momori guru jaŋeraonec ŋic tai tâpiri‐jeŋichec ʒiŋuczi jumbiŋ: Joabere ɋa Asahele â Betelehem haeonec ŋic moc ʒâŋene Dodo ere ŋokâ Elihanaŋ.
27Â Haroda haeonec Samoti â Peloni ŋic Helezi.
28Erâ Tekoa haeonec ŋic moc ʒâŋene Ikesi ere ŋokâ Ira â Anatoti haeonec Abieʒe.
29Â Husati ŋic Sibekai â Ahoki ŋic Ilai.
30Erâ Netofa haeonec Maharai â Netofa haeonec jaha ŋic moc ʒâŋene Bana ere ŋokâ Heleda.
31Erâ Benjamiŋ guru jaŋere hae Gibea irecnec ŋic moc ʒâŋene Ribai ere ŋokâ Itai â Piratoŋ haeonec Benaja.
32Erâ Gasi opâ forakac mâreŋ irecnec Hurai â Arobati ŋic Abiele.
33Â Baharum haeonec Aʒamaweta â Salaboŋ haeonec Eliaba.
34Erâ Giʒoni ŋic Hasem â Harari ŋic moc ʒâŋene Sage ere ŋokâ Jonataŋ.
35Â Harari ŋic jaha moc ʒâŋene Sakari ere ŋokâ Ahiam â Urure ŋokâ Elifali.
36Â Mekerati ŋic Hefere â Peloni ŋic Ahia.

37Erâ Karamele haeonec Hezero â Ezibaire ŋokâ Narai.
38Â Nataŋte ɋa Joele â Hagirire ŋokâ Mibehara.
39Â Amoŋŋic Zeleke â Beroti haeonec Naharai, e Zeruja ŋokâ‐ticne Joabere maro babaju juwec.
40Erâ Itiri ŋic Ira â Itiri ŋic jaha Garebe.
41Erâ Hitiŋic Uria â Alaire ŋokâ Ʒabadi.
42Erâ Rubeŋte ɋâric Siʒa ere ŋokâ Adina, e Rubeŋ guru jaŋere micne bapa juwec. Ehame ŋic tai tâpiri‐jeŋichec 30 jaŋe ehec jumbiŋ.
43Erâ Makare ŋokâ Hanaŋ â Mitini ŋic Josafata.
44Erâ Sama â Aroe ŋic moc ʒâŋene Hotam ere ŋokâ Jeiele.
45Erâ Simirire ŋokâ Jediae â ɋaticne Tiziŋic Joha.
46Erâ Mahawi ŋic Eliele â Jeribai â Josawai ŋic, i jaŋe hâcne Elenaŋte ŋokâfâc. Erâ Moabi ŋic Itama.
47Erâ Eliele â Obede â Mezobai ŋic Jasiele.