Text copied!
CopyCompare
Kâte Bible - Binaŋ Qâhâc I

Binaŋ Qâhâc I 21

Help us?
Click on verse(s) to share them!
1Eme Sataŋ e Israe ŋic râsi ejarehuc Dawidizi Israe ŋic wosec‐jopaocte esoc qafeŋ ecnewec.
2Iŋuc eme Dawidizi Joabe â momori jaŋere micne ʒiŋuc jazawec: “Ŋoŋe rarâ Israe ŋic Bere‐Seba haeonec ware raku Daŋ mâreŋko fisikac mâreŋ ŋondeŋ ira ŋic ŋokac juŋgopieŋ jaŋe wosec‐jopaniŋ. Ehuc ware nazapie no ŋic ŋokac wezimuc juŋgopieŋ irec ʒare manazepac.”
3Iŋuc mume Joabezi muwec, “Wofuŋzi ŋic ŋokacfâc‐ticne dameŋ ʒiŋuczia juŋgopieŋ jaŋere sâc jâuruhuc 100 gurune gurune mocwâc ʒuhuc‐jopaocmu. Ŋicwofuŋ‐nane, jaŋe ʒeŋgoma gore rurumaŋko jufâreŋgopieŋ i! Bomboŋ‐nane, go wemocte irec boc egarekac? Go iŋuc ehuc Israe ŋic nâŋâcne faio kiŋ bâfuacmu.”
4Joabe e iŋuc âzâcne‐bipieha sifu ŋicwofuŋ e jahacne dâŋzi sanaŋkeocte ʒoɋac ewec. Eme Joabe e faharerâ rahuc Israe ŋic âtec‐jopa‐fârerâ Jerusalem haeo mowâc risiewec.
5Risierâ ŋic ŋokac wosec‐jopakicne qâqâhâc ʒare‐jeŋic i Dawidi râcnewec. Eme Israe maŋnao ŋic ʒika qaqare sâc jumbiŋ jaŋere ʒare i 1 milioŋ 100 tauseŋ â Juda maŋnao ŋic ʒika qaqare sâc jumbiŋ jaŋere ʒare 470 tauseŋ.
6Erâ Joabe e ŋicwofuŋte mumutâc irec maname mi sâckewecte Lewi guru â Benjamiŋ guru jaŋe mi wosec‐jopawec.
7Eme Anutu e wiac irec maname mi sâckeme Israe ŋic jopawec.
8Iŋuc eme Dawidizi Anutu ʒiŋuc âzâcnewec: “No hehesic sâko bâfuahuc wiac i epo, irec ʒiŋuc numu‐garekopac: Go kiŋaŋŋicge nore kiŋ bahac i bârâriezemec. No wiac mutucne jâmbâŋ epo hâcne.”
9Eme Wofuŋzi Dawidire findaŋdâŋ mumu ŋic Gade ʒiŋuc muhuc âzâcnewec:
10“Go rarâ Dawidi ʒiŋuc âzâcnec: ‘Wofuŋ e ʒiŋuc mukac: No wiac jahec â moc bâmocke‐garekopac. Irec go gahac, moc me moc mutec bafisi garepemu.’”
11Iŋuc muhuc âzâcneme Gade e Dawidirao fisirâ âzâcnehuc muwec, “Wofuŋ e ʒiŋuc mukac: ‘Wemo wiac fua‐gareocte mukomec?
12Jara jahec â moc roroc fuaocte mukic? Me mosa jahec â moc kisâfâcge jaŋe bâqiŋguhuc kikeo kikeo egareniŋte mukic? Me ʒoaŋ gie bapa jahec â moc Wofuŋte ʒika, hucukic mimicne moc hâcne, i mâreŋ ʒira fuame Wofuŋte aŋelozi Israe mâreŋ sâc ima gie baocte mukic?’ Irec sorecnujec erao dâŋ okacne weniŋuc barâ risiepemu i aimuŋ jaha manatâc qâtâc eku mupaŋkec.”
13Iŋuc mume Dawidizi Gade ʒiŋuc âzâcnewec: “No buʒâic ŋemâcnere faio fekopac; irec ŋicmeo mi fehuc Wofuŋ e jahac buuruc‐ticne ɋârâŋnea fokacte sifu ere meo fezepac.”
14Eme irec Wofuŋzi mume Israe ŋic jaŋerao hucukic mimicne fuame Israe ŋic 70 tauseŋzi hâmombiŋ.
15Eme Anutuzi Jerusalem hae bâsiroweocte aŋelo‐ticne sorewec. Eme aŋelo e hae bâsiroweocte ehame Wofuŋzi honeme mi sâckeme wiac hâhâwicne mi fuaocte aka hewec. Ehuc ima gie bahuc juwec aŋelo e ʒiŋuc âzâcnewec: “Sâcne, ima gie bâniniŋkec.” Eme Wofuŋte aŋelo e Jebusi ŋic Oronaŋ ere padi qâqâmârâŋ tomao domawec.
16Eme Dawidizi ʒâŋe firâ aŋelo e ʒika‐ticne barâ Jerusalem haeopec fâretiŋnehuc sambâŋ â mâreŋ ŋoŋondeŋ‐jekicko domaha honewec. Iŋuc honerâ Dawidi â soŋaŋ jaŋe mateŋ qonaŋkerâ ʒâŋe mai‐jeŋic mâreŋko hetutuckembiŋ.
17Iŋuc erâ Dawidizi Anutu ʒiŋuc âzâcnewec: “Noni hâcne ŋic ŋokac wose qâreŋ ejareniŋte mujarepo. Noni hâcne wiac hehesicne jâmbâŋ ʒi epo. Lama guru keci jaŋe ine wiac moc mi embiŋ. Irec Wofuŋ Anutu‐nane, no ʒiŋuc numu‐garekopac: Sifu no nahacne â wiacfâc‐nane nâŋe sawa bâtiŋ‐nâpoc; ŋicfâcge jaŋere faio ine wiac hâhâwicne mi râezemec.”
18Eme Wofuŋte aŋelozi Gade âzâcne mutâc eme Dawidirao rarâ, eki Jebusi ŋic Oronaŋ ere padi qâqâmârâŋ tomao Wofuŋte alata moc baocte âzâcnewec.

19Eme Dawidi e Gadezi Wofuŋte ʒâŋeo dâŋ âzâcnewec i reŋkerâ ferawec.
20Oronaŋ e ine padi qâmârâŋkehuc juku forisierâ aŋelo honewec. Eme ŋokâfâcne jahec â jahec mâmâc jumbiŋ jaŋe hâwic‐jopame soŋkembiŋ.
21Ehame Dawidizi Oronaŋtao fisime Oronaŋzi honehuc padi qâqâmârâŋ toma‐ticnaonec erao rarâ dapecnehuc ʒâŋe mai‐ticne mâreŋko hetutuckewec.
22Iŋuc eme Dawidizi Oranaŋ ʒiŋuc âzâcnewec: “Go padi qâqâmârâŋ toma ʒi qikiŋne‐naretec furine bajâmbâŋkerâ ira Wofuŋte alata moc bape ŋic ŋokac jaŋerao wiac hâhâwicne fuarâ fokac i omaezejec.”
23Iŋuc âzâcneme Oronaŋzi Dawidi dâŋ ʒiŋuc bâtikiecnewec: “I sâcne roc; erâ ŋicwofuŋ‐nane, go gahac wiac manakic sâc ezemec. Erâ manac, no bulimakao ʒi taha bâzi ririkere râekopac â padi qâqâmârâŋ ɋaruc forakac ʒi ʒocte biŋe â padi ʒi taha bâzi ririkere biŋe. Wiac sasawa i ʒeŋgoma qikiŋne‐fârekopac.”
24E iŋuc mume ŋicwofuŋ Dawidizi ʒiŋuc âzâcnewec: “Mâcne, no furine bajâmbâŋkepemu. No gore wiac i Wofuŋte biŋe moc mi ropemu, me wiac i me i moc furi tâmiric taha bâzi mi rikepemu.”
25Iŋuc murâ Dawidizi mâreŋ ŋondeŋ irec furine gol ŋemâc‐ticne 600 Oronaŋ râcnewec.
26Ehuc ira Wofuŋte alata moc barâ qowi bâzi â wama bâzi râehuc Wofuŋ numu wâwâsic ecnewec. Eme Wofuŋzi dâŋticne manahuc mume sambâŋkonec ʒoczi qowi bâzire alatao wahawec.
27Iŋuc fuame Wofuŋzi aŋelo mutâcnecneme ʒika‐ticne i mocwâc kânoŋ‐ticnao râeme huwec.
28Eme dameŋ ira Dawidi e Wofuŋzi Jebusi ŋic Oronaŋ ere padi qâqâmârâŋ tomao nunumu‐ticnere okacne bâtikiewec i manarâ ira taha bâzi rikewec.
29Mosezi mâreŋ burocnao Wofuŋte tiri boze bawec i â bâzi ririkere alata jahe dameŋ ira Gibeoŋ haeo furu mâreŋko ŋepic.
30Eme Dawidi e Wofuŋte aŋelozi ʒika gie bawec irec hâwickewecte Anutu mu wioc ecneocte ira razo moc mi afeckewec.