Text copied!
CopyCompare
Kâte Bible - Binaŋ Qâhâc I

Binaŋ Qâhâc I 27

Help us?
Click on verse(s) to share them!
1Israe ŋic garikiŋ gurune gurune jaŋere micne â momori tauseŋ gurune gurune â 100 gurune gurune jaŋere micne, erâ fekicnefâc‐jeŋic jara sâc mosane mosane ââkehocko gie fuŋne fuŋne bahuc ŋicwofuŋ kiŋaŋ qacnembiŋ jaŋere biri ʒi. Erâ wâc momori guru buc buc ʒare‐jeŋic 24 tauseŋ sasawa.
2Eme Ʒabidie ŋokâ‐ticne Jasobeam e fuŋfuŋke mosa ira bâbâni guru jaŋe qizec‐jopawec. Ere guruo ŋic 24 tauseŋzi jumbiŋ.
3E Perezere ɋâriczi fuŋfuŋke mosa ira momori micne sasawa jaŋere micne juwec.
4Eme Ahohi ŋic moc ʒâŋene Dodai e mosa moc wahawec ira momori guru jumbiŋ jaŋe qizec‐jopawec. Ere guruo ŋic 24 tauseŋzi jumbiŋ.
5Ehame mosa moc mocwâc wahawec ira micne moc juwec, e taha bapa Jojadare ŋokâ ʒâŋene Benaja. Ere guruo momori 24 tauseŋzi jumbiŋ.
6Erâ Benaja eki hâcne ŋic 30 jaŋere guruo ŋic tâpiri ɋicwânʒâŋhec juwec, erâ ekizia wâc micne‐jeŋic juwec. Eme ere guru i ŋokâ‐ticne Amiʒabazi qizec‐jopawec.
7Eme mosa moc mocwâc wahame Joabere ɋa Asahelezi guru moc qizec‐jopawec. Ehame ŋokâ‐ticne Ʒebadiazi tucticne qawec. Ere guruo momori 24 tauseŋzi jumbiŋ.
8Ehame mosa moc mocwâc wahame Izara ŋic moc ʒâŋene Samehuti eki guru moc jaŋere micne juwec. Ere guruo momori 24 tauseŋzi jumbiŋ.
9Eme mosa moc mocwâc wahame Tekoi ŋic moc ʒâŋene Ikesi ere ŋokâ Irazi guru moc jaŋere micne juwec. Eme ere guruo momori 24 tauseŋzi jumbiŋ.
10Eme mosa moc mocwâc wahame Eferaimte ɋâricfâc jaŋeraonec Peloni ŋic moc ʒâŋene Helezi eki guru moc qizec‐jopawec. Ere guruo momori 24 tauseŋzi jumbiŋ.
11Eme mosa moc mocwâc wahame Husati haeonec Ʒera ŋic ʒâŋene Sibekai eki qizec‐jopawec. Ere guruo momori 24 tauseŋ jumbiŋ.
12Izi mosa moc mocwâc wahame Anatoti haeonec Benjamiŋ ŋic moc ʒâŋene Abieʒe eki qizec‐jopawec. Eme ere guruo momori 24 tauseŋzi jumbiŋ.
13Eme mosa moc mocwâc wahame Netofa haeonec Ʒera ŋic moc ʒâŋene Maharai eki guru moc qizec‐jopawec. Eme ere guruo momori 24 tauseŋzi jumbiŋ.
14Izi mosa moc mocwâc wahame Piratoŋ haeonec Eferaimte ɋâricfâc jaŋeraonec ŋic moc ʒâŋene Benaja eki guru moc qizec‐jopawec. Eme ere guruo momori 24 tauseŋzi jumbiŋ.
15Izi juku mosa moc mocwâc wahame Netofa haeocnec Otinie ere ɋâric moc ʒâŋene Heledai eki guru moc qizec‐jopawec. Eme ere guruo momori 24 tauseŋzi jumbiŋ.
16Israe guruo Rubeŋ guru jaŋere micne fekicne i Ʒikirire ŋokâ Elieʒezi juwec. Eme Simeoŋ guru jaŋere micne ine Makare ŋokâ Sefatiazi juwec.
17Eme Lewi guru jaŋere micne ine Kemuele ere ŋokâ Hasabiazi juwec, â Aroŋ guru jaŋere micne ine Zadokozi juwec.
18Eme Juda guru jaŋere micne ine Dawidi hahacfâcne jaŋeraonec moc ʒâŋene Elihu eki micne juwec; â Isasa guru jaŋere micne ine Mikaere ŋokâ Omirizi juwec.

19Eme Sebuloŋ guru jaŋere micne ine Obadiare ŋokâ Isimajazi Juwec; â Naftali guru jaŋere micne ine Aʒariele ere ŋokâ Jeremotizi juwec.
20Eme Eferaimte guru jaŋere micne ine Aʒaʒiare ŋokâ Hoseazi juwec; â Manase guru dâkâne jaŋere micne ine Pedajare ŋokâ Joelezi juwec.
21Eme Manase guru dâkâne moc Gileade mâreŋko jumbiŋ jaŋere micne ine Ʒekariare ŋokâ Idozi juwec; â Benjamiŋ guru jaŋere micne ine Abenere ŋokâ Jasielezi juwec.
22Ŋic i jaŋe hâcne Israe ŋicguru jaŋere micne bapa jumbiŋ.
23Wofuŋzi sambâŋko bâpiŋ ŋeraŋgopieŋ irec sâc Israe ŋic bâfuac‐jopaocte mupaŋkewec, irec Dawidi e jara‐jenic 20 mi bazumbiŋ jaŋe mi wosec‐jopawec.
24Zerujare ŋokâ Joabezi fuŋkerâ wosec‐jopawec, erâ mi wosec‐jopa‐fârewec. Dawidizi wose qâreŋ ejarewec irec erâ Wofuŋtaonec kimbeŋzi Israe ŋic jaŋere faio fewec. Eme irec ʒare‐jeŋic i ŋicwofuŋ Dawidire Binaŋ Qâhâcko mi râekicne.
25Eme ŋicwofuŋte ʒeŋaŋ irec soŋaŋ i Adiele ere ŋokâ Aʒamawetazi juwec. Â hae sâkoo â hae piticko erâ ficsanaŋko ʒeŋaŋ ŋerawec irec soŋaŋ ine Uʒiare ŋokâ Jonataŋzi juwec.
26Eme gieo mâreŋ he qanʒaŋ embiŋ jaŋere soŋaŋ ine Kelubure ŋokâ Eʒarizi juwec.
27Eme waiŋ gie forawec irec soŋaŋ ine Ramati ŋic Simeizi juwec; â waiŋ opâne rowaŋficko râembiŋ irec soŋaŋ ine Sifimi ŋic Ʒabidizi juwec.
28Eme Oliwa â fâricjâc wiac Sefela mâreŋko doma rawec irec soŋaŋ ine Gederi ŋic Baali‐Hanaŋzi juwec; â wokemaŋ râe guruc embiŋ irec soŋaŋ ine Joasizi juwec.
29Eme lama bulimakao Saroŋ mâreŋko jumbiŋ irec soŋaŋ Saroŋ ŋic Sitiraizi juwec; â wâneŋko jumbiŋ irec soŋaŋ ine Adelaire ŋokâ Safatizi juwec.
30Eme kamele soŋaŋ ine Isimae ŋic Obilizi juwec; â doŋgi ŋokacne irec soŋaŋ ine Meronoti ŋic Jedejazi juwec.
31Ŋic i jaŋe hâcne ŋicwofuŋ Dawidire wiac sasawa forawec irec soŋaŋ jumbiŋ.
32Dawidire mamac pitic Jonataŋ e ŋic mamana tarahec â qâqâreŋ ŋic juwecte dâŋko bafickehuc juwec. Eme e â Hakimonire ŋokâ Jehiele jahe ŋicwofuŋte ŋokâfâc hone maiŋ ejarepic.
33Eme Ahitofe e iŋuc jaha ŋicwofuŋ dâŋko bafickehuc juwec â Areki ŋic Husai eki ine ŋicwofuŋte âgo mefâro juwec.
34Eme Benajare ŋokâ Jojada â Abiata jahe Ahitofere tuc qapic. Eme Joabezi ŋicwofuŋte momori guru irec micne juwec.