Binaŋ Qâhâc I 18

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

¹Eme irec faicnao Dawisizi Filisa ŋic joparâ bawahac‐jopahuc Gati hae jowac rowec.

²Erâ Moabi ŋic jaŋe wâc bawahac‐jopame Dawidi kiŋaŋ qacnehuc sahac taha wiac râcnehuc jumbiŋ.

³Erâ Zoba ŋicwofuŋ Hadadeze e Eufrata opâo ŋicwofuŋ tâpiri‐ticnere fuŋne bataniŋkeocte rahame Dawidizi Hamati haeopec qâhâmowec.

⁴Erâ Dawidi e iŋuc ehuc eraonec keretac 1 tauseŋ â becâsicko rara ŋic 7 tauseŋ erâ momori kikezi rara 20 tauseŋ iŋuc jâoc rowec. E iŋuc ehuc keretac fâfâre becâsic jaŋere rua hetâcnewec, erâ keretac 100 jaŋere sâc sawa akic‐jopawec.

⁵Eme Siria ŋic jaŋe Zoba ŋicwofuŋ Hadadeze bafickeniŋte Damasko haeonec fisipie Dawidizi Siria ŋic 22 tauseŋ qâhâmoc‐jopawec.

⁶Iŋuc erâ Siria mâreŋko Damasko haeo momori râec‐jopawec. Ehame Siria ŋic jaŋe Dawidire rurumaŋko juhuc sahac taha wiac râcnehuc jumbiŋ. Eme Dawidi e ira me ira rawec sâc Wofuŋzi bafickehuc dopecke‐jâmbâŋkewec.

⁷Erâ Dawidi e Hadadezere kiŋaŋ qaqafâcne jaŋe maro wiac golzi bakicne barâ jujumbieŋ i rorâ bara Jerusalem haeo râewec.

⁸Erâ Dawidi e Hadadezere hae jajahec Tibihati â Kuŋ irecnec aeŋ bâbâroŋ bocjaha jâmbâŋ rowec. Eme Salomo e aeŋ bâbâroŋ izi hâcne râqâc sâko â wâtuŋ â râqâc wiac gâcne bawec.

⁹Eme Hamati ŋicwofuŋ Tou e Dawidizi Zoba ŋicwofuŋ Hadadeze â momori gurufâc‐ticne jaŋe ʒeŋgoma bawahac‐jopawec irec biŋe manawec.

¹⁰Manarâ Dawidi bubiaŋ dâŋ wiac azâcneocte ŋokâ‐ticne Hadoram soreme ŋicwofuŋ Dawidirao rawec. Hadadeze e dameŋ sâc Touhec ʒika qahuc juwec hâcne. Eme Tou e siliwa â gol â wiac gâcne erâ aeŋ bâbâroŋzi wiac bakicne i râeme rawec.

¹¹Eme Dawidi e ŋicguru gâcne, Edom â Moabi â Amoŋ â Filisa â Amaleke ŋic bawahac‐jopahuc jaŋeraonec siliwa â gol gâcne rorâ Wofuŋte biŋe qahuc râe jujec iŋuc jaha wiac i Wofuŋte biŋe qahuc râewec.

¹²Eme Zeruja ŋokâ‐ticne Abisai e Edomŋic 18 tauseŋ Hâwec Wâneŋko jopawec.

¹³Erâ Edom mâreŋko momori râec‐jopa rawec. Ehame Edomŋic jaŋe Dawidire rurumaŋko jumbiŋ. Eme Dawidi e ira me ira rawec sâc Wofuŋzi kime dopec ecnewec.

¹⁴Dawidi e Israe ŋic ʒeŋgoma jaŋere ŋicwofuŋ juwec. Erâ ŋicfâcne sasawa wiac sâckoa ejarehuc mutiŋ bâtiŋ ejare jujec.

¹⁵Ehame Zerujare ŋokâ Joabe e momori jaŋere micne juwec. Â Ahiludu ŋokâ‐ticne Josafata eki ine dâŋ mumufua juwec.

¹⁶Ehame Ahitubu ŋokâ‐ticne Zadoko â Abiata ŋokâ‐ticne Abimelec jahe ine taha bapa jupic. Â Sawasazi ine qâqâreŋ ŋic juwec.

¹⁷Ehame Jojada ŋokâ‐ticne Benaja eki ine Kereti ŋic â Peleti ŋic qaŋeŋ‐jopawec. Â Dawidi ŋokâfâc‐ticne jaŋe ŋicwofuŋte kiŋaŋŋic fekicne jumbiŋ.