Text copied!
CopyCompare
Buka Helaga - 1 SIVARAI

1 SIVARAI 11

Help us?
Click on verse(s) to share them!
1Vadaeni Israela taudia ibounai be Davida dekenai idia lao, Heberona dekenai, idia gwau, “Ai be oiemu turiana bona oiemu rarana taudia.
2Guna neganai, Saulo ese ai dekenai ia king neganai, oi ese ai Israela taudia tuari dekenai ai oi gunalaia. Bona Lohiabada ese oi dekenai ia gwauhamata, ia gwau, ‘Oi ese lauegu bese Israela do oi gunalaia, bona edia king do oi lao.’ ”
3Unai dainai, Israela gunalaia taudia ibounai be king Davida dekenai idia lao, Heberona dekenai. Bona king Davida ese idia danu ia gwauhamata, Heberona dekenai, Lohiabada ena vairanai. Vadaeni idia ese Davida ena kwarana dekenai olive dehoro idia bubua, bona Israela ena king idia halaoa. Inai be Lohiabada ena gwauhamata hegeregerena, Samuela ena uduna dekena amo.
4King Davida, mai iena Israela tuari taudia danu be Ierusalema dekenai idia lao, unai hanua dekenai noho taudia do idia tuari henia totona.
5Iebusu taudia ese Davida idia hamaoroa, idia gwau, “Oi be inai hanua do oi vareai diba lasi.” To Davida ese Siona ena kohoro ia halusia, bona ia abia. Bona unai murinai Siona kohoro ena ladana idia atoa, “Davida Ena Hanua.”
6Davida ia gwau, “Edena tauna ese Iebusu tauna ta do ia alaia guna, ia be lohia bona tuari biaguna do lau halaoa.” Vadaeni Ioaba Seruia ese unai kara ia karaia guna. Unai dainai ia be tuari biaguna dagi ia abia.
7Vadaeni Davida be unai kohoro dekenai ia noho. Unai dainai Siona Kohoro ena ladana idia atoa, “Davida Ena Hanua.”
8Davida ese unai Siona gabu dekena amo hanua ma ia haginia hagegea. Ia haginia hamatamaia gabuna be tano ia daekau gabuna, ladana Milo. To Ioaba ese hanua orena ia haginia lou.
9Vadaeni Davida be ia bada herea lao, badina Lohiabada, Siahu Ibounai Dirava, be ia danu ia noho.
10Davida ena goada taudia edia lohia taudia edia ladana be inai: Idia ese, bona Israela taudia ibounai ese Davida idia durua, king siahu do ia abia totona, Lohiabada ese ia gwauhamata hegeregerena. Davida ena basileia idia hagoadaia noho taudia be inai:
11Iasobeama, Hakamoni iduhu tauna. Ia be orea ta ladana, “Tuari Lohia Taudia Toi” edia gunalaia tauna. Nega ta dekenai, Iasobeama ese ia sibona ena io dekena amo tuari taudia 300 ia alaia mase.
12Unai toiosi edia huanai, Iasobeama ena murinai be Eleasara. Ia be Dodo, Ahohi iduhu tauna, ena natuna.
13Pilistia taudia be tuari totona Pasadamimi dekenai idia haboua neganai Eleasara be Davida danu ia noho unai gabu dekenai. Bali uma gabuna ta be unuseni, bona Israela taudia be Pilistia taudia edia vairanai idia heau hamatamaia.
14To Eleasara be uma gabuna lalonai ia gini, ia gimaia, vadaeni ia bona iena tuari taudia ese Pilistia taudia idia alaia mase. Lohiabada ese Eleasara dekenai kwalimu bada ia henia.
15Davida ena tuari taudia edia orea ta, ena ladana idia gwauraia be “Tuari Taudia Goadadia 30.” Inai tau 30 edia huanai dekena amo tuari taudia toi be nadi badana ta, Adulama Kohua kahirakahira, idia lao, badina unuseni Davida ia noho. Unai neganai danu Pilistia tuari orea ta be Repaima Koura dekenai idia kamepa noho.
16Unai neganai Davida be unai gabu aukana ena hunia gabunai ia noho, to Pilistia tuari taudia be Betelehema hanua dekenai idia noho.
17Vadaeni Davida ese Betelehema ena ranu namo herea ia laloa, bona ia gwau, “Lau madi o, bema tau ta ese Betelehema ena magu iduara ena badibadinai ia noho guri dekena amo ranu sisina lau dekenai do ia henia, lau be do lau inua.”
18Inai goada herea taudia toi ese inai hereva idia kamonai, bona idia ese Pilistia taudia idia tuari henia, bona edia kamepa lalonai idia raka hanaia, unai guri dekena amo ranu idia abia, Davida dekenai idia mailaia. To Davida ia ura lasi unai ranu do ia inua. Ia inua lasi, to ia ese unai ranu ia bubua ore, Lohiabada dekenai ia henia, boubou gauna totona.

19Bona Davida ia hereva, ia gwau, “Lohiabada e, lau ese inai ranu lau inua diba lasi. Bema lau inua, unai be unai tau goadadia edia rarana do lau inua bamona, badina be unai ranu abia totona, edia mauri idia negea bamona.” Vadaeni Davida ese unai ranu ia inua lasi momokani. Inai kara be goada herea taudia toiosi ese idia karaia.
20Abisai Seruia, Ioaba ena tadina, ese unai “Tuari Taudia Goadadia 30” ia gunalaia noho. Ia ese nega ta tau ibounai 300 be ia sibona ena io dekena amo ia alaia mase. Abisai ena sivarai be ia bada, unai “Tuari Taudia Goadadia 30” edia huanai.
21Unai “30” edia huanai, Abisai ena sivarai be hereadae, bona ia be edia gunalaia tauna. To ia be unai “Tuari Lohia Toiosi” danu ia hegeregere lasi.
22Benaia Iehoiada be boga auka tauna ta. Ia be Kabesela hanua dekena amo. Ia ese kara badadia momo ia karaia. Ia ese Moaba taudia edia tuari taudia goadadia rua, tauanina bada taudia, ia alaia mase. Dina ta, sinou ia diho neganai Benaia ese guri lalonai laiona ta ia alaia mase.
23Benaia ese danu, Aigupito tauna, tauanina bada tauna, bona iena lata be mita rua ia hanaia, ia alaia mase. Unai Aigupito tauna ena imana dekenai be io ia noho, to Benaia ese au ta sibona ia abia, Aigupito tauna dekenai ia lao, io be iena imana dekena amo ia kokia, bona sibona ena io dekenai ia gwadaia mase.
24Inai karadia be Benaia Iehoiada ese ia karaia, bona ia be unai “Tuari Taudia Goadadia 30” edia orea tauna ta.
25Benaia be unai “30” edia huanai tau badana ta, to iena sivarai be unai “Tuari Lohia Toiosi” edia sivarai hegeregerena lasi. Vadaeni Davida ese iena gimaia orea ena biaguna, Benaia ia halaoa.
26Goada herea taudia ma haida tuari orea edia huanai edia ladana be inai: Asahele, Ioaba ena tadina. Elehanana Dodo, Betelehema tauna.
27Samota, Haroda tauna. Helese, Pelono tauna.
28Ira Ikese, Tekoa tauna. Abiesere, Anatoto tauna.
29Sibekai, Husaka tauna. Ilai, Ahohi tauna.
30Maharai, Netopa tauna. Helede Banaha, Netopa tauna.
31Itai Ribai, Gibea tauna, Beniamina iduhu tauna. Benaia, Piratono tauna.
32Hurai, Gasa Sinavai kahana dekena amo. Abiele, Arabaha tauna.
33Asamavete, Baharumu tauna. Eliaba, Salabona tauna.
34Haseme, Gisono tauna. Ionatana Sage, Harara tauna.
35Ahiama Sakara, Harara tauna. Elipala Uru.
36Hepere, Mekerata tauna. Ahaisa, Pelono tauna.

37Hesero, Karamele tauna. Narai Esebai.
38Ioela, Natana ena tadina. Mibihara Hagiri.
39Seleke, Amono tauna. Naharai, Beroto tauna, (ia be Ioaba Seruia ena kesi huaia tauna).
40Ira, Itiri tauna. Gareba, Itiri tauna.
41Uria, Hiti tauna. Sabada Ahalai.
42Adina Sisa, Rubena iduhu tauna, Rubena taudia edia lohia ta, bona tau ibounai 30 ia danu.
43Hanana Maka. Iosapata, Mitini tauna.
44Usaia, Asataroto tauna. Sama bona Ieiele, Hotama tauna Aroere, ena natuna tau ruaosi.
45Iediaele Simiri, bona iena tadina Ioha, Tisi taudia.
46Eliele, Mahava tauna. Ieribai bona Iosavaia, Elinama ena natuna tau ruaosi. Itima, Moaba tauna.
47Eliele, Obeda, bona Iasiele, Mesoba taudia.