Text copied!
CopyCompare
Kâte Bible - Binaŋ Qâhâc I

Binaŋ Qâhâc I 16

Help us?
Click on verse(s) to share them!
1Eme jaŋe Anuture katapa bafisirâ Dawidizi irec qoruc boze fârewec irec maŋnao hepie ŋewec. Ehame Anuture maio qowi bâzi â wama bâzi rikembiŋ.
2Eme Dawidi e qowi bâzi â wama bâzi i rikeme tarame Wofuŋte ʒâŋeo ŋic ŋokac jambuŋ‐jopawec.
3Ehuc Israe ŋic â ŋokac buc poroŋ â qowi dâkâne erâ poroŋ waiŋ hândâŋhec bakicne i jarewec.
4Erâ Dawidi e ʒuhuckerâ Lewire guruonec ŋic gâcne jaŋe Wofuŋ Anutu numu wâwâsic â daŋge mumuteŋ ecneniŋte âkendâŋ‐jopawec.
5Asafa e micne juwec; eme ere râpeo ine ŋic ʒiŋuczi jumbiŋ: Ʒekaria, Jeiele, Semiramo, Jehiele, Matitia, Eliaba, Benaja, Obededom â Jeiele. Jaŋe gita kulele qaniŋte râec‐jopawec hâcne. Eme Asafa e telazi goŋgoŋ bakicne i qaocte mucnewec.
6Eme taha bapa Benaja â Jahaʒiele jahe Anuture katapa maŋfuŋnao ʒuʒuhuc jaha qeŋ qahuc junicte mujactewec.
7Eme ʒoaŋ ira Dawidizi fuŋkerâ Asafa â qomâfâcne jaŋe daŋge gae ʒi Wofuŋ hecneniŋte hefua‐jarewec.
8Wofuŋ daŋge âzâcnehuc, ʒâŋe‐ticne mutaniŋkeniŋ; wiac bapa‐ticne ŋicne ŋicne mufua‐jareniŋ.
9Gae hecneniŋ, mumumbiaŋ gae hecneniŋ, mâsi sâko‐ticne muromacke‐fâreniŋ.
10Tiri ʒâŋe‐ticne mu ʒeri ecneniŋ, Wofuŋ wira basac ecneeŋgopieŋzi bubiaŋ mananʒepieŋ.
11Wofuŋ e jahacne â tâpiri‐ticnere fifisacne finʒepieŋ, ehuc ʒâŋe mai‐ticnao ʒuʒuhuc jaha junʒepieŋ.
12E wiac bipinehec ewec ehuc mâsi bawec â mumutara dâŋ muwec irec manasuniŋ.
13Kiŋaŋŋic‐ticne Abraham ɋâricfâcne ŋoŋe, â Jakobore ŋokâfâc bâwosâecfâc‐ticne ŋoŋe iŋuc hâcne eniŋ!
14Wofuŋ e hâcne Anutu‐nâŋec, e mumutara gie‐ticne mâreŋ sâc bahuc juekac.
15Ʒâʒâfic‐ticnere manasu rahuc juzokac, ŋic gaŋne gaŋne 1 tauseŋ dâŋ mupaŋke‐jarewec i raŋɋa raŋɋa maŋkehuc juzokac.
16Ʒâʒâfic i Abrahamhec ewec, erâ Isaka mujomirecnehuc mupaŋkewec.
17Izi Jakobo dâŋsanaŋ râcnehuc basanaŋkewec, ehuc Israehec ʒâʒâfic fofo sanaŋ ewec.
18Ʒiŋuc muhuc: “Go Kanaaŋ mâreŋ garepemu, merâfâcge rauckecmurâ biŋe qagarepo i hâcne.”

19Dameŋ ira afecne mac jumbiŋ, jahec maczi mâreŋ ira jaba jumbiŋ.
20Ŋicguru mockonec mocko ŋe qatara rambiŋ ŋicwofuŋ mocte uucmaŋkonec ra guru mocko ʒuhuckembiŋ.
21Moczi ro waha âte ejarezacte aka hewec, â jaŋere erâ ŋicwofuŋ bâtiŋ‐jopawec.
22Ehuc muwec, “Wokemaŋ ruacfâc‐nane mi bâuac‐jopazo, porofetefâc‐nane mi bâʒâic‐jopazo!”
23Mâreŋ ŋic sasawa ŋoŋe Wofuŋ gae hecneniŋ, ʒoaŋne ʒoaŋne bâbâpiaŋ‐ticnere binaŋ baniŋ.
24Eri tatamac‐ticne i qâpuc jaŋerao mutaniŋkeniŋ, gie‐ticne wawarecnehec i ŋicne muromacke‐jareniŋ.
25Wofuŋ e kâcɋene, irec e fehuc mumbiaŋkezo, nemu sasawa siric‐jopahuc e araŋ bacnezo.
26Qâpuc nemufâc‐jeŋic jaŋe ɋâŋ qâqâtâc, Wofuŋ e ine sambâŋne sambâŋne bâfuawec.
27Ʒâŋe biŋe â ʒai ʒonʒoŋ‐ticnezi bâniecnekac, tiri ufuŋ‐ticnao tâpiri â aŋac ʒeri fokac.
28Qâpuc ŋicguru ŋoŋe Wofuŋ muɋaɋackeniŋ, Wofuŋte tatamac â tâpiri‐ticne muɋaɋackeniŋ.
29Wofuŋ e ʒâŋe biŋe‐ticnere sâcko sâseniŋ; taha bafisirâ mai‐ticnao fuaniŋ! Tiri eri qonaŋkerâ Wofuŋ dapecneniŋ.
30Mâreŋ sâc mai‐ticnao jâjâwâckeniŋ, jambomac, mâreŋ basanaŋkekicne qiŋ herâ ŋekac.
31Sambâŋ e bubiaŋ manaoc â mâreŋ e ʒeri eoc, ehame ŋic gurune gurune ʒiŋuc jazaniŋ: “Wofuŋ e Fekicne Sâko jukac.”
32Hâwec â irec maŋnao wiac qiriŋ qaeŋgopieŋ jaŋe fânâŋkeniŋ, sopâc â bec qowi jaŋe kiwaeniŋ.
33Erâ kâtere jâc sasawa jaŋe Wofuŋte maio ʒeri gae heniŋ e mâreŋ sâc mumutara gie bazo warekacte iŋuc eniŋ.
34Wofuŋ daŋge âzâcneniŋ, e uruc jauŋ‐ticnehec, â aki anonoc‐ticne fofo sanaŋ foocmu.
35Erâ ʒiŋuc wâc muzo: “O Anutu bâbâpiaŋ‐nâŋec, go bafic‐nâpoc, ehuc qâzuc‐nâporâ ŋic gurune gurune jaŋeraonec henusuc‐nâpoc; eme nâŋe tiri ʒâŋege daŋge âzâcnenʒepeneŋ, â mumbiaŋguhuc mu ʒeri enʒepeneŋ.
36Israere Wofuŋ Anutu e muteŋkezo. Dameŋ tâmiric ewarekicne iŋuc jaha erahuc juzo.” Eme ŋic ŋokac jaŋe “Jâmbomac” muhuc Wofuŋ mumbiaŋkembiŋ.

37Eme Dawidizi Asafa â qomâfâcne jaŋe ʒoaŋne ʒoaŋne Wofuŋte ʒâʒâfic katapare maŋfuŋko juhuc hone maiŋ ecneniŋte râec‐jopawec.
38Ehuc Obededom â qomâfâc‐ticne 68 jaŋe râec‐jopawec wâc. Erâ Jedutuŋ ŋokâ‐ticne Obededom â Hosa jahe ine motâc soŋaŋ junicte râec‐jofawec.
39Erâ taha bapa Zadoko â qomâfâcne taha bapa gâcne jaŋe Gibeoŋ haeo furu mâreŋ fowec ira Wofuŋte tiri bozeo râec‐jopawec.
40Jaŋe ira juhuc Wofuŋzi Israe ŋic jaza mutâc eme sâcmutâcte papia qizecko qâreŋkembiŋ fokac irec sâcko ʒoaŋne ʒoaŋne ŋafe furec alatao gâbâ jaha Wofuŋ qowi bâzi rikecnehuc juniŋte râec‐jopawec hâcne.
41Eme jaŋerao ʒuhuckerâ jumbiŋ ine Hemaŋ â Jedutuŋ, erâ Wofuŋte aki anonoc fofo sanaŋ foekac irec daŋge âzâcneniŋte ʒâŋe‐jeŋic muhuc bâwosâec‐jopakicne jaŋe mâmâc.
42Eme Hemaŋ â Jedutuŋ jahe gaere qeŋ â woŋgâŋ erâ gae tirine irec wiac gâcne bajupic. Eme Jedutuŋte ŋokâfâc jaŋe ine motâc soŋaŋkeniŋte bâwosâec‐jopambiŋ.
43Wiac sasawa i tara‐fâreme ŋic ŋokac jaŋe fic hae‐jeŋic sâc rafârepie Dawidi e wâc iŋuc jaha wiacfâcne mu jambuŋ ejareocte hae‐ticnao risiewec.