Text copied!
CopyCompare
Kâte Bible - Binaŋ Qâhâc I

Binaŋ Qâhâc I 15

Help us?
Click on verse(s) to share them!
1Juku Dawidi e hae qizec‐ticnao e jahacne fic bafârerâ Anuture qorac tapa katapa irec hae heʒâwewec. Ehuc irec boze moc bawec.
2Erâ muwec, “Lewiŋic jaŋe sawa Anuture katapa reŋkenʒepieŋ. Wofuŋ e jaŋe hâcne Wofuŋte katapa reŋkehuc raŋɋa raŋɋa e kiŋaŋ qacneniŋte rowosâec‐jopawec.”
3Erâ Dawidi e mâreŋ heʒâwewec ira Wofuŋte katapa bafisiniŋte Israe ŋic ʒeŋgoma Jerusalem haeo hetumaŋ‐jopawec.
4Ehuc Aroŋte ŋokâfâc â Lewiŋic ʒiŋuc hetumaŋ‐jopawec:
5Kohatire ŋokâfâc jaŋeraonec micne Uriele erâ qomâfâc‐ticne 120.
6Merarire ŋokâfâc jaŋeraonec ine micne Asaja erâ qomâfâc‐ticne 220.
7Geresomte ŋokâfâc jaŋeraonec micne Joele erâ qomâfâc‐ticne 130.
8Elisafaŋte ŋokâfâc jaŋeraonec micne Semaja erâ qomâfâc‐ticne 200.
9Heboroŋte ŋokâfâc jaŋeraonec ine micne Eliele erâ qomâfâc‐ticne 80.
10Uʒielere ŋokâfâc jaŋeraonec micne Aminada erâ qomâfâc‐ticne 112.
11Dawidi e iŋuc ehuc taha bapa Zadoko â Abiata erâ Lewire ɋâric Uriele, Asaja, Joele, Semaja, Eliele â Aminada jaŋe hetumaŋ‐jopawec wâc.
12Ehuc ʒiŋuc jazawec: “Ŋoŋe Lewi guruo apa ŋosafâc‐ŋeŋic jaŋere kikefuŋko micne eŋgopieŋ. Irec ŋaŋacne â qomâfâc‐ŋeŋic ŋoŋe pectâc juhuc eemasaŋ gie barâ Israere Wofuŋ Anutu ere katapa bawarerâ ŋeŋe‐ticne heʒâwepo ira râepie ŋezejec.
13Ŋoŋe qanaŋ jaha mi reŋkembiŋte â mutâcne‐nârekicne irec sâcko mu wioc mi ecnembeŋte Wofuŋ Anutu‐nâŋeczi nâŋâcnao kimbeŋ‐ticnere fuŋne bataniŋkewec.”
14Iŋuc jazame taha bapa â Lewire ɋaric jaŋe Israere Wofuŋ Anutu ere katapa bafisiniŋte eemasaŋ gie bambiŋ.
15Eme Lewiŋic jaŋe Wofuŋte dâŋ Mosezi mutâcnewec irec sâcko Anuture katapa i pepeŋko reŋkembiŋ.
16Erâ Dawidi e Lewi guruonec micne jaŋe qomâfâc‐jeŋic bâwosâec‐jopapie gae hehuc gita, kulele â kaŋkuc wiac qapie fânâŋkehuc fome ʒeri fânâŋ wâc faharehuc foocte jazawec.
17Irec Lewire ɋâricfâc jaŋe Joele ŋokâ‐ticne Hemaŋ bâwosâembiŋ. Erâ qomâfâc‐ticne jaŋeraonec ine Berekiare ŋokâ Asafa bâwosâembiŋ. Erâ qomâfâc‐jekic jaŋeraonec ine Kusajare ŋokâ Etaŋ bâwosâembiŋ.
18Eme jaŋerao ʒuhuckerâ jaŋere juwicnao birio ʒiŋuc bâwosâec‐jopambiŋ: Ʒekaria, Jaʒiele, Semiramo, Jehiele, Uni, Eliaba, Benaja, Maseja, Matitia, Elifelehu â Mikineja, erâ motâc soŋaŋ jajahec ine Obededom â Jeiele.

19Eme gae hehe ŋic Hemaŋ, Asafa â Etaŋ jaŋe aeŋ bâbâroŋzi tela bakicne i qapie dâŋeocte mujarekicne.
20Ehame Ʒekaria, Aʒiele, Semiramo, Jehiele, Uni, Eliaba, Maseja â Benaja jaŋe naru ŋokac jaŋere maracte sâcko kâriŋɋaŋ qaniŋte mujarekicne.
21Ehame Matitia, Elifelehu, Mikineja, Obededom, Jeiele â Aʒaʒia jaŋe ine ŋic jaŋere maracte sâcko kaŋkuc qaniŋte mujarekicne.
22Eme Lewi guruonec Kenania e gaere micne bapazi gae siric‐ticne mana tarawecte erâ gaeo micne bajareocte mucnekicne.
23Eme Berekia â Elikana jahe Anuture katapa motâc soŋaŋkenicte mujactekicne.
24Ehame taha bapa Sebania, Josafata, Netanele, Amasai, Ʒekaria, Benaja â Elieʒe jaŋe Anuture katapa bâniecnehuc qeŋ qaniŋte mujarekicne. Eme Obededom â Jehia jahe wâc Anuture katapa motâc soŋaŋkenicte mujactekicne.
25Eme Dawidi â Israe soŋaŋ erâ momori tauseŋ gurune gurune jaŋere micne jaŋe Wofuŋte ʒâʒâfic katapa Obededomte fickonec bawareniŋte kiwac qawac ehuc rambiŋ.
26Eme Anutuzi Lewire ɋâricfâc Wofuŋte ʒâʒâfic katapa reŋkembiŋ jaŋe bafic‐jopawecte jaŋe bulimakao ŋicne 7 â lama ŋicne 7 jaha bâzi rikecnembiŋ.
27Dawidi e ŋaqi qaŋqaŋ rojuwec, erâ Lewire ɋâricfâc katapa reŋkembiŋ jaŋe wâc iŋuc jaha ŋaqi qaŋqaŋ sasawa hembiŋ. Erâ gae hehe ŋic jaŋere micne Kenania e wâc iŋuc jaha ŋaqi qaŋqaŋ jaha rojuwec. Eme Dawidi e qoruc qaŋqaŋzi taha bapa ŋaqi bakicne i heme huwec wâc.
28Eme Israe ŋic jaŋe Wofuŋte ʒâʒâfic katapa bafisihuc aŋara herâ kaŋkuc, gita, kulele, qeŋ â woŋgâŋ qapie fânâŋkehuc fowec.
29Eme Wofuŋte ʒâʒâfic katapazi Dawidire hae qizecko fisime Saulore otâ Mikali e qâqâtâc kataŋko firâ ŋicwofuŋ Dawidizi gae wohuc ʒeri bari eme honerâ maŋzi qaisockewec.