Text copied!
CopyCompare
Kâte Bible - Binaŋ Qâhâc I

Binaŋ Qâhâc I 17

Help us?
Click on verse(s) to share them!
1Eme Dawidi e ficticnao ŋeŋe juju ehuc porofete Nataŋ ʒiŋuc muhuc âzâcnewec: “Manakic, no jâmâzâc fic ʒira ŋeŋe juju ekopac â Wofuŋte ʒâʒâfic katapazi ine bozeo ŋekac.”
2Iŋuc mume Nataŋzi Dawidi dâŋ ʒiŋuc bâtikiecnewec: “Go rarâ manakic sâc ec. Anutuzi gohec jukac hâcne.”
3Eme ŋafe ira Wofuŋte dâŋ ʒiŋuc Nataŋtao fuawec:
4“Go rarâ kiŋaŋŋic‐nane Dawidi ʒiŋuc âzâcnec: ‘Wofuŋ e ʒiŋuc mukac: Goki ŋeŋe juju epemurâ fic moc mi banarezemec.
5No Israe ŋic Aigita mâreŋkonec jowac‐jopa wefupoonecteaŋ fic mocko ŋeŋe juju mi ehuc bozeoa ŋeŋe juju ewarehuc jupozi jukopac.
6No Israe ŋic jaŋehec mâreŋ ira me ira rac warec epo sâc ŋicfâc‐nane soŋaŋ‐jopaniŋte mumutara ŋic âkendâŋ‐jopapo jaŋeraonec moc dâŋ ʒiŋuc moc âzâcnepo me: “Go wemocte jâmâzâc jâczi fic moc mi banarekomec?” ’
7Irec go kiŋaŋŋic‐nane Dawidi ʒiŋuc âzâcnezemec: ‘Anutu Tâpiri Ɋuŋɋasaŋ Wofuŋ e ʒiŋuc mukac: No lama bâjâpec‐jopahuc kecɋaŋ gieo juhaŋtec Israe ŋicfâc‐nane jaŋere fekicne jucmurâ rocgupo.
8No ira me ira juekic sâc gohec juekopac. Erâ bânie‐garehuc kisâfâcge jopaekopac. Erâ ʒuhuckerâ mâreŋko ŋic ʒâŋe biŋe sâkohec jaŋe iŋucne ʒâŋe biŋe sâkohec jaha bacgupemu.
9Erâ Israe ŋicfâc‐nane jaŋe ŋeŋe hae moc bâfua‐jarepe ira jusanaŋkeniŋmu. Eme ŋeŋe hae jâmbâŋ‐jeŋic bâfua‐jarepe ira juhapie juwicnao ŋic repicne gâcnezi jopa sipiric ejarehuc ʒikare suru jâiŋ ejare jumbieŋ, mâsi wiac iŋucne mocwâc mi fuazejec.
10Erâ juwicnao Israe ŋicfâc‐nane qaŋeŋ‐jopaniŋte mumutara ŋic râec‐jopape juhapie wiac fuawec iŋucne mocwâc mi fuarâ fozejec. No kisâfâcge bawahac‐jopa‐fârepemu. Erâ ʒuhuckerâ ʒiŋuc mutaniŋke‐garekopac: Wofuŋ noni hâcne fic moc bagarepemu.
11Erâ go juju dameŋge tareme apa ŋosafâcge qâtec‐jopahuc fohaŋtec ɋâricfâcge jaŋeraonec ŋokâge moc rowosâepe eki gore tuc qarâ juha no uucmaŋ‐ticne dope hutuŋ ecnepemu.
12Iŋuc ecnehape eki fic moc banarezejec. Eme no uucmaŋ‐ticne dope hutuŋ ecnehape raŋɋa raŋɋa foocmu.
13Erâ no mamac‐ticne ehape eki ŋokâ‐nane erâ juocmu, ehame gore juwicnao juwec e aki anonoc‐nane jâoc ropo irec sâc ecnehuc mi jâoc ropemu.
14No ufuŋ‐naneo â uucmaŋ‐naneo e basanaŋke‐jâmbâŋkepemu, ehuc eri qaraweŋ‐ticne dope hutuŋ ecnehape raŋɋa raŋɋa foocmu.’”
15Eme Nataŋ dâŋ sasawa âzâcne jâutuc ekicne irec sâcko binaŋ bahuc Dawidi âzâcne‐fârewec.
16Eme Dawidi e bozeo raʒirâ Wofuŋ maickehuc waha ŋerâ ʒiŋuc numuwec: “O Wofuŋ Anutu, no ŋic waha qaqacne â garikiŋfâc‐nane jaŋe wâc ʒâŋe biŋe tâmiric, ehame go ine sifu jaha ehâmo‐narekomec.
17O Wofuŋ Anutu, go wiac iŋucnere manatec wawahane eha kiŋaŋŋicgere garikiŋfâc â ŋic gaŋne gaŋne jufeniŋmu irec dâŋ i mâmâc naza nowatuc emeŋ.
18Erâ kiŋaŋŋicge no bafaharecnukicte wemo dâŋ ʒuhuckerâ gazapemu? O Wofuŋ Anutu, go kiŋaŋŋicge nore fuŋne mana tara‐fâreekic.

19O Wofuŋ, go kiŋaŋŋicgere erâ, â maŋgezi mukac irec sâcko wiac qeŋ bipinehec ʒi ehuc wiac sasawa i muaŋneekic.
20O Wofuŋ Anutu, go iŋucne moc mi jume manaeŋgopeneŋ, goki sawa jukic hâcne.
21Me Israe ŋicfâcge jaŋe weni jaŋehec sâc hecjopazo? O Anutu, go mâreŋko ŋicguru gâcne weni jaŋe ŋicfâcge bacjopacmurâ kiŋaŋ qaqa gieonec batarac‐jopazo fisimeŋ? Erâ ʒâŋe biŋege saweocte wiac qeŋ bipinehec ehuc ŋicguru weni jaŋe Aigita mâreŋkonec batarac‐joparâ hata‐jeŋic bâʒâwemeŋ, ehuc ŋicguru gâcne jopa jâpec ejaremeŋ?
22Israe ŋic jaŋe hâcne ŋicfâcge erâ juraʒihuc juniŋte dope hutuŋ ejaremeŋ. Ehuc Wofuŋ go gahaczia Anutu‐jeŋic erâ jumeŋ.
23O Wofuŋ Anutu, ʒi ine kiŋaŋŋicge â garikiŋfâcne jaŋere manasuhuc dâŋ mumeŋ i fosanaŋkeocte basanaŋkec, ehuc mumeŋ irec sâc ec.
24Eme ʒâŋege i kecʒiŋuc muhuc basanaŋkerâ muaŋne rahuc junʒepieŋ: ‘Anutu Tâpiri Ɋuŋɋasaŋ Wofuŋ, Israere Anutu, eki hâcne Israere Anutu jukac.’ Ehame kiŋaŋŋicge Dawidi nore garikiŋfâc jaŋe ine gore maio juraʒihuc junʒepieŋ.
25O Anutu‐nane, go gahac kiŋaŋŋicge no fic moc banarecmurâ naza nowatuc emeŋ. Irec kiŋaŋŋicge no hâbihec erâ nunumu ʒi numu‐garekopac.
26O Wofuŋ, go Anutu fârine, goki hâcne wiac biaŋne ʒi kiŋaŋŋicge no mupaŋke‐naremeŋ.
27Irec manatec sâckeme kiŋaŋŋicge nore garikiŋfâc jambuŋ‐jopazemec. Iŋuc ejaretec jaŋe gore maioa juraʒihuc junʒepieŋ. O Wofuŋ, go gahac jambuŋ‐jopameŋ jambuŋ izi jaŋerao fohuc juocmu sanaŋ.”