Text copied!
CopyCompare
Bible Ni Thothup - 1 Kronicles

1 Kronicles 11

Help us?
Click on verse(s) to share them!
1Gubin e girdi’ nu Israel ni go’ ranod ngak David nga Hebron me lungurad ngak, “Gadad ta’ab dowef nge ta’ab racha’.
2Kakrom nnap’an e ka Saul e pilung rodad, mag gafaliy e girdi’ nu Israel ko mael, me SOMOL ni Got rom e micheg ngom ni bay mu pow’iy e girdi’ rok mag mang tagagiyeg rorad.”
3Ere gubin e pi’in ma yog e thin u Israel marbad nga Hebron ngak David ni Pilung. Me ngongliy ba tha’ nib thothup u thilrad, miyad gapgepnag, me mang pilung nu Israel, nri bod ni micheg SOMOL u daken Samuel.
4Me yan David ni Pilung nge urngin piyu Israel ngar m’aged e mael ko fare binaw nu Jerusalem. Ni re binaw nem e ngiyal’nem e yima yog ni Jebus, ya bay piyu Jebus ni pi’in nri girdi’en fare binaw, ni ka yad be par u rom.
5Piyu Jebus e rogned ngak David nri dabiyag ni thap ngalan fare binaw, machane me kol David yu Zion ni kar yororiyed ni fan ko mael, ma aram ma yigo’ nnang ni “Binaw rok David.”
6Me ga’ar David, “Re mo’on nsom’on nra thang e fan rok reb e piyu Jebus e ra mang ga’ ko re raba’ i salthaw ney!” I Joab ni Zeruyah e chitiningin e ir e gafaliy fare cham me mang ga’ ko salthaw.
7Bochan e yan David i par ngalan fa gin kan yororiy ni fan ko mael, ma aram min tunguy fithingan ni “Binaw rok David”.
8Miki ngongliy fare binaw, ni tabab ko fa gin’en ni kanin’ u ba’ ni ngek ko fare burey, me Joab e ki fulweg e gin kabay ko fare binaw nga rogon.
9David e i gel gelngin i yan, ni bochan SOMOL ni Gubin ma Rayag Rok ni bay rok.
10Ba’aray pi salthaw rok David nib gilbugwarad. Ra pethgad ngak e tin kabay e girdi’ nu Israel, ngar ayuweged David nge mang pilung, ni bod ni micheg SOMOL, miyad tay e gin suwon nib gel lungun.
11En ni som’on e Jashobeam ko fare ke girdi’ rok Hakmon, ni ir e tolang ko “Fare Dalip.” I cham ko sarey rok ngak 300 e pumo’on nge li’rad ni yad gubin ngarmad’ u lan ta’abyay i mael.
12Ma en nib migid u fithik’ fa “Dalip” nib gilbugwarad e Eleazar nib mo’on ni fak Dodo, ni be’ ko fare ke girdi’ rok Ahoh.
13I cham u ba’ rok David nib togopluw ngak piyu Filistia ko fare mael ntay u Pas Dammim. Immoy u lan e flang ko barley nnap’an ni tabab piyu Israel ko mil,
14ma aram e ir nge pi salthaw rok e rduwgilgad u luwrad u lulukngun fa gi flang ngar chamgad ngak e pi Filistia. Me SOMOL e gelnag ko mael.
15Me yan i reb e rran me yan dalip ko fa guyey i salthaw ni yad ba cheag ngranod nga ba war ko gin i par David riy u charen fare yiy nu Adullam, nnap’an ni bay ba ulung i girdi’ nu Filistia ni karbad ra pired ngalan fare Loway ni Refaim.
16Re ngiyal’ i n’em e bay David u daken bochi burey ni kan yororiy ni fan ko mael, ma bay ba ulung i girdi’ nu Filistia ni yad be par u lan yu Bethlehem.
17Mri tawrengnag David tafen me ga’ar, “Ri gu be finey ni mang e yigi fek be’ bu uw i ran ko fare luwed u charen e garog nu Bethlehem nggu unum!”
18Fa dalip i salthaw nib gilbugwarad e rcham niged wo’rad ngar thumurgad nga wuru’ e gin be par e pi Filistia riy, miyad l’ing boch e ran u lan fare luwed, ngar sulweged ngak David. Machane de unum David; ya n’en ni rin’ ngay e pu’og nga but’ nike ognag ngak SOMOL

19me ga’ar, “Rdariy e n’en nra rin’ mu gu unum e pi ran ney! Ya ri bod ni kug unum racha’en e pi pumo’on ney ni rdowgad ko pogofan rorad!” Aram me siyeg ni dabi unum. Irera’ e pi ngongol ko falu’ nge muthan’ ni i rin’ fa dalip i salthaw nib gilbugwarad.
20I Abishai nib mo’on ni walagen Joab e ir e ba tolang ko “Fare Guyey i Gilbugwan.” I cham ko sarey rok ngak 300 i pumo’on nge li’rad ngarm’ad, me par nib gilbugwan u fithik’ “Fa Guyey.”
21I ir e th’abi gilbugwan u fithik’ “Fa Guyey” me par ni ir e tolang rorad, machane de gilbugwan ni bod “Fa Dalip.”
22Me Benayah nib mo’on ni fak Jehoyada nu Kabzeel e ba gilbugwan; bo’or e pi ngongol ko falu’ nge muthan’ ni i rin’, nib mu’un l’agruw i salthaw nu Moab ngay ni yow ba gel ni thang e fan rorow. Ma ku bay bayay ni yan ngalan ba low nib to’ar u reb e rran ni be aw e ayis nge li’ ba layon nge yim’.
23Miki thang e fan rok ba pumo’on nu Egypt, ni be’ nib ga’ ya medlip nge balay e fit n’umngin, ma bay ba sarey rok nrib ga’. Me cham Benayah ngak nga balay i lek’, me leag fare sarey u pa’ facha’ nu Egypt, nge li’ ngay nge yim’.
24Ireram e pi ngongol ko falu’ nge muthan’ ni rin’ Benayah, ni ir reb “Fa Guyey.”
25I ir e th’abi cheag u fithik’ “Fa Guyey,” machane de gilbugwan ni bod “Fa Dalip.” Me tay David ni ir e ba ga’ ko pi matnag rok.
26Ku ba’aray boch e salthaw ni yad ba cheag: Asahel, nib mo’on ni walagen Joab Elhanan nib mo’on ni fak Dodo nu Bethlehem Shammoth nu Harod Helez nu Pelet Ira nib mo’on ni fak Ikkesh nu Tekoa Abiezer nu Anathoth Sibbekai nu Hushah Ilai nu Ahoh Maharai nu Netofah Heled nib mo’on ni fak Baanah nu Netofah Ithai nib mo’on ni fak Ribai nu Gibeah u lan yu Benjamin Benayah nu Pirathon Hurai nu lan fapi loway nu charen yu Gaash Abiel nu Arbah Azmaveth nu Bahurum Eliahba nu Shaalbon Hashem nu Gizon Jonathan nib mo’on ni fak Shagee nu Harar Ahiam nib mo’on ni fak Sakar nu Harar Elifal nib mo’on ni fak Ur Hefer nu Mekerah Ahijah nu Pelon Hezro nu Karmel Naarai nib mo’on ni fak Ezbai Joel nib mo’on ni walagen Nathan Mibhar nib mo’on ni fak Hagri Zelek nu Ammon Naharai, en ntafek e talin e cham rok Joab nu Beeroth Ira nge Gareb nu Jattir Uriah nu Hit Zabad nib mo’on ni fak Ahlai Adina nib mo’on ni fak Shiza (reb e tayugang’ ko fare ganong rok Ruben, ni yad fa guyey i salthaw ni fa raba’ i girdi’ rok) Hanan nib mo’on ni fak Maakah Joshafat nu Mithan Uzzia nu Ashterah Shamma nge Jeyel, l’agruw i mo’on ni fak Hotham nu Aroer Jediael nge Joha, gali mo’on ney e fak Shimri nu Tiz Eliel nu Mahavah Jeribai nge Joshaviah, gali mo’on ney e fak Elnaam Ithmah nu Moab Eliel, Obed, nge Jaasiel nu Zobah