Text copied!
CopyCompare
Kâte Bible - Binaŋ Qâhâc I

Binaŋ Qâhâc I 28

Help us?
Click on verse(s) to share them!
1Dawidi e Jerusalem haeo Israe ŋic fekicne sasawa ʒiŋuc hetumaŋ‐jopawec: Israe ŋic gurune gurune jaŋere fekicne â ŋicwofuŋ kiŋaŋ qacnehuc gurune gurune jurambiŋ i jaŋere fekicne â momori tauseŋ gurune gurune â 100 gurune gurune jaŋere micne, erâ ŋicwofuŋ â ŋokâfâcne jaŋere bulimakao wiac irec soŋaŋ â ŋicwofuŋ ficticnere fekicne â ŋic tai tâpiri‐jeŋichec, erâ ŋic qac momori.
2Eme ŋicwofuŋ Dawidi e fahare domahuc muwec: “Qomâfâc‐nane â ŋicfâc‐nane, ŋoŋe manahapie mupe. No Wofuŋte ʒâʒâfic katapare ŋeŋe hae â Anutu‐nâŋecte ââtesiŋ fic fuaocte maŋkehuc juwareekopac. Erâ fic i fuaocte wiac sasawa emoc bâmoc efârepo.
3Eme Anutuzi ʒiŋuc nazawec: ‘Go momori ŋic juhuc soc hoŋkemeŋte ʒâŋe‐nanere fic moc mi bazemec.’
4Erâ sifu Israere Wofuŋ Anutuzi mamac‐nanere garikiŋfâc sasawa jaŋeraonec Israe ŋic ŋoŋere ŋicwofuŋ juraʒihuc jupemurâ rowosâecnuwec. E Juda micne bapa rowosâewec hâcne. Eme Judare kikefuŋko mamac‐nanere garikiŋfâc â mamac‐nanere ŋokâfâc jaŋeraonec ine no hone aŋac enarehuc Israe ŋic sasawa ŋoŋere ŋicwofuŋ jupemurâ âkendâŋnuwec.
5Eme Wofuŋzi ŋokâfâc‐nane bocjaha narewec jaŋeraonec ine ŋokâ‐nane Salomozi Israe ŋic qaŋeŋ‐ŋopahuc Wofuŋte uucmaŋko eri ŋeŋeo ŋeocte rowosâewec.
6Ehuc ʒiŋuc nazawec: ‘Ŋokâge Salomo e ŋokâ‐nane erâ juha noni mamac‐ticne erâ jupemurâ rowosâepore eki hâcne fic â hae ʒoŋa‐nane bazejec.
7E dameŋ ʒiŋuczia jukac irec sâc jaha jufehuc sâcmutâc â mumutâc dâŋnane i aimuŋ jaha soŋaŋkeocmuo ine no uucmaŋ‐ticne dope hutuŋ ecnepemu.’
8Irec ʒi Wofuŋte kikefuŋ, Israe ŋic sasawa jaŋere ʒâŋe faio â Anutu‐nâŋeczi manahame Wofuŋ Anutu‐ŋeŋicte sâcmutâc dâŋ mu gufuc ehuc mana taraniŋte ʒoɋac enʒepieŋ. Iŋuc ehuc mâreŋ biaŋ ʒi rauckerâ jufeku hâmopie ɋâricfâc‐ŋeŋic jaŋe wâc ʒuhuckerâ juraʒihuc junʒepieŋ.
9“Eme ŋokâ‐nane Salomo go ine mamacge nore Anutu e hone mana tarac ecnehuc maŋ â mamanage hâcbuc jaha qikiŋnecnerâ buafec faio kiŋaŋ qacnezemec. Wofuŋ e ŋic maŋ sâc wosaŋeŋ bahuc ŋiczi manasu biric eekac i ʒeŋgoma mana tara‐fâreekac. Go e basacmuo ine eki bâfuacguocmu. Me e râpeckecmuo ine eki wâc go râpecgu sanaŋkeocmu.
10Wofuŋ e furufic‐ticne moc bacmurâ rowosâecguwecte go dâŋ ʒi mana‐jâmbâŋkezemec. Hâbi hâro juhuc bazemec.”
11Dawidi e iŋuc mufârerâ taha ufuŋte hae gâŋgâŋ â ficticne gâcne, erâ ʒeŋaŋfic â ficmaŋne faic â maŋne ʒâʒâŋiŋ, erâ ʒâʒâfic katapa ŋeŋere ficmaŋ birickewec biri i ŋokâ‐ticne Salomo râcnewec.
12Erâ Wofuŋ ufuŋ‐ticnere hae ʒoŋa â rârec rârec fic maŋne maŋne, erâ Anutu ufuŋ‐ticnere ʒeŋaŋfic â wiac bâtirikicne irec ʒeŋaŋfic i manasuwec sâc birickewec.
13Erâ taha bapa â Lewiŋic jaŋere fic maŋne maŋne âke tâcnekicne â Wofuŋte ufuŋko gie bazo irec biri wâc mâmâc râcnewec. Erâ Wofuŋte ufuŋko gie bazo irec râqâc wiac sasawa irec biri wâc mâmâc.
14Erâ gie baniŋmu sâc irec râqâc golzi bakicne gol irec ŋemâc â siliwazi râqâc bakicne siliwa irec ŋemâc i wâc birickewec.
15Erâ gie bambiŋ irec sâc lambe dodoma golzi bakicne, â lambe ŋerawec, â lambe dodomao gol fowec irec ŋemâc i buc buc â lambere ŋemâc i mâmâc birickewec. Erâ lambe dodoma siliwazi bakicne â lambe‐jeŋic ŋerawec i lambe dodoma buc buc gie bambiŋ sâc ŋemâc‐jeŋic birickewec.
16Erâ Wofuŋte maŋfuŋko poroŋ furu mukicne râembiŋ irec tebo ŋerawec ira gol râe rakicne irec ŋemâc i buc buc birickewec, ehuc siliwazi tebo bakicne irec sâc ijaha ewec.
17Erâ sarac â oto â râqâc gol ɋaɋacnezi bakicne, erâ gomba golzi bakicne irec ŋemâc buc buc birickewec. Erâ siliwazi gomba bakicne irec sâc ijaha ewec.
18Eme hosâc âsu ririkere alata gol rike sueŋkekicnezi bakicne irec ŋemâc i mâmâc birickewec. Erâ wâc kerubim jahe keretac golzi bakicne fainao ŋehuc fakec‐jekiczi Wofuŋte ʒâʒâfic katapa sâockewec keretac irec biri i mâmâc râecnewec.

19Ehuc muwec, “Wofuŋ e wiac i sasawa mutaniŋke‐nareme hone mana tarac ehuc birickepo. Irec gie sasawa i birickekicne irec sâcko bazo.”
20Dawidi e iŋuc murâ ŋokâ‐ticne Salomo ʒiŋuc âzâcnewec: “Sanaŋkerâ hâbi hâro juhuc bazemec, hâwicmâc â memeŋ garu tâmiric juzemec. Wofuŋ Anutu e nore Anutuzi gohec jukac. E hone suŋgiŋ me behe qaisoc mi egarehame juku Wofuŋ ufuŋ‐ticnere gie sasawa i tara‐fârezokac.
21Eme taha bapa â Lewiŋic gurune gurune ʒi jaŋe Anuture ufuŋko gie sasawa i baniŋte ʒawierâ juŋgopieŋ. Erâ ŋic micrereŋ â mamana sarichec jaŋe gie irec me irec baficguhuc juniŋmu. Ehame fekicne â ŋic sasawa jaŋe furu jaha gore mumutâcko juniŋmu.”