1 Crónicas 11

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

¹Degidgi, bela Israel-dulemar onmaknonimalad, geb Davidʼbo-sunmakegala Hebrón-neggweburse nadmalad. Agi, ega sogdemalad: “Dummad, anmar na ablis-emar-gued, anmar na gwenadmalad.

²Ar Saúl reyga-maiunni, bila-onogedgi bato be Israel-sordamar-idudii daed. Deginbali, David, Bab-Jehová bega ise-sogar sogsabalid: ‘Bee, be an-Israel-dulemar-akwedii be guoye, degi, bee be, an-Israel-dulemar-e-dummadga be gubaloye.’ ”

³Deyobi, bela Israel-e-dummagan, Hebrón-neggweburse nade gusmalad, geb Davidʼbogwa sunmaksa gusmalad. Degine, geb David, Bab-Jehová-wagab we-dulemarbo igar-mesisad. A-sorbali, Israel-dulemar, David-nonogi olivo-gwallu eosmalad. Deyob, reyga David-onug-imaksamalad. Ar igi Bab-Dummad Samuelʼga sogsagusa, deyob sogsadba neg-gunonikid.

⁴A-sorbali, Rey-David, bela Israel-dulemarbogwa Jerusalén-neggweburse nadmalad. A-neggweburde, Jebúsʼye nugbalid. Jebús-dulemar a-neggweburgi bukwamalad.

⁵Jebús-dulemar Davidʼga sogdemalad: “Wegi be gwen dogosulid.” Degi-inigwele, David, Sión-neg-gandikid sunonikid. Sión, David-Neggweburye soglebalid.

⁶David, Siónʼse doged-iduale, weyob sogsa gusad: “Doa-inse Jebús-dule-gwensak-oburgoe, an a-dule sordamar-bila-onomalad-e-idued-bur-dummadga an onug-imakoed.” Degidgi, Sarvia-machi-Joab-inse Jebús-dule-gwensak-oburgwisad. Geb agi, Joab, sordamar-bila-onomalad-e-idued-bur-dummadga gunonisunnad.

⁷Geb David, Sión-neg-gandikidgi-megnonisunnad. Agala, David-Neggweburye onug-imaksamalad.

⁸David, neg-gandikid odummosad. Miloʼye-neg-nugad-akar neg-dummad-nagaba neg-arsanyob-maidse, galu-matusulid sobsad. Joabʼdina, amba neggwebur-yoo-nudaklemalad bela nudaksad.

⁹Ar Bab-Jehová-Bela-Gangued-Nikad Davidʼba nue-naisoggu, David nasgumai gusad, degi, gangumai gusbalid.

¹⁰We-David-sorda-dummagan, sorda-bulegan-e-dummaganad. We-sordamar, David-negsemaidgi nue-David-bendaksa-gusmaladid. Degine, Bab-Jehová-sogsagusadba, we-sordamar, Israel-dulemarbogwa, reyga David-imaksamarbalidid.

¹¹David-sorda-bulegana, wemalad: Hacmoni-machi-Jasobeam, sorda-dulagwen-gakambegwad (30), e-dummadid. Jasobeam ibagwengi-bila-ononaidgi, eswar-suidgi dulataled-ilapaa (300) sordamar-ogilosad.

¹²Jasobeam-yarba, Dodo-machi-Eleazar danikid. Dodoʼde, Ahoh-duled. Eleazar sorda-buledmogad. Eleazar sorda-bulegan-warbaagwad-gwensakmogadid.

¹³Eleazar, Pasdamimʼgi bila-onolenagua, Davidʼbogwa gunai gusad. Deunni, Filistea-sordamar Israel-sordamargi bila-onogega Pasdamimʼgi ambikusmargua, orosgi-dakleged-cebada-nainugi Israel-sordamar, Filistea-sordamar-idu duurmakde gusmalad.

¹⁴A-ibagine, Eleazar, cebada-digar-naid-abargi Filistea-sordamar-abin ganna gwisgus gusad, sikirmaksasulid. Degidba, Eleazar, Davidʼbogwa, Filistea-sordamargi bela-bela nakwismalad, ar Bab-Jehová nakwega imaksad.

¹⁵Ibagwenginbali, David-aminaegala sorda-dulagwen-gakambegwad (30) e-dummagan-warbaagwad-bulegan akwasaila-dummad-siidse nadegusmalad. A-akwasaila-yaa-dummad, Adulamʼye-nugad. Deunni, Filistea-sordamar-ambikued-neg Refaim-nebagi siid.

¹⁶A-ibagine, David, e-neg-gandikidgi-maid. Filistea-dulemardina, Belénʼgi nakulebukmalad.

¹⁷David nue-ukud-itosoggua, weyob sogded: “¡Bitigi dule-gwensak Belén-neggwebur-e-yawagak-dogedgi dia-siid-e-dii anga amisana yeerbana!”

¹⁸Degine, geb sordamar-bulegan-warbaagwad, dii-amiegala, Filistea-sordamar-bukwadgi dogsamalad. Geb, Belén-neggwebur-yawagak-dogedgi-dii-siid susmalad, geb Davidʼga sesmalad. Davidʼdina budar gobe gualid, bur Bab-Jehováʼga eosad. Weyob sogded:

¹⁹“¡Bab-Dummad! Bipisaale we-dii gwen an gobosulid. Ar we-dulemar, boni-dummad-abargi anga dii-amidii gusmalad. Degisoggu, an we-dii gobosulid. We-dulemar-e-ablis-gobsayob negguo-itole.” Agala, David, dii gobsasulid. Weyob sorda-gandikmalad-warbaagwad ibmar-dummagan-imaksamalad:

²⁰Joab-e-ia-Abisai, sorda-bulegan-warbaagwad-e-dummadid. Ibagwengi, Abisai, bila-ononaidgi e-eswargi bela-sordamar dulataled-ilapaa-bukwad (300) ogilosad. A-ular, sordamar-warbaagwad-abargi e-nug dummarba-gunonimogad.

²¹Abisai, sordamar-warbaagwadba bur bule-nug-dumma megisad, e-sordamar-warbaagwad-e-iduedga gunonikid. Degi-inigwele, Abisai, we-sordamar-warbaagwad e-sordasulid.

²²Joiada-machi-Benaía dule-buledid. Bemaíaʼde Cabseelʼgined. We-dulede, bukidar ibmar-dummagan imaksad. Benaía, Moab-sorda-bur-gandikmalad-warbogwad oburgwisgusad. Ibagwengi, Benaía, boo-dummad-batenaigua, yaa-dummad-yaba aidesgusad, geb agi achumigur-nono-wawaad oburgwisgusad.

²³Benaía, Egipto-dule-masdummad-daligwen-bisgise-sugued oburgwis gusbalid. Deunni, we-Egipto-dule, eswar-dummad-sedanigua, Benaíaʼdi, unnir suar-bipigwadbi abin sedanigusad. Degite, Benaía, Egipto-dule-annik eswar-dummad gandikidgi susad. Geb a-eswargi Egipto-dule-masdummad-oburgwisad.

²⁴Joiada-machi-Benaía, weyob ibmarmar-dummagan imaksad. A-ular, sordamar-warbaagwad-abargi e-nug dummarba-gunonimogad.

²⁵Benaía, sordamar-dulagwen-gakambegwadba (30) bur e-nug-dummarbagusad. Degi-inigwele, we-sordamar-warbaagwad-e-ibmar-imaksadgi obichasulid. Degidba, David, e-dikarba-sorda-nakulemalad-e-dummadga-guega Benaía-onug-imaksad.

²⁶David-e-sordamar-bulegan, wemalad: Asael, Joab-e-urbad. Elhanán, Dodo-e-machi, Belénʼgined.

²⁷Samot, Harodita-duled. Heles, Peloni-duled.

²⁸Ira, Iques-e-machi, Tecoa-duled. Abiezer, Anatot-duled.

²⁹Sibecai, Husa-duled. Ilai, Ahoh-duled.

³⁰Maharai, Netofa-duled. Heled, Baana-e-machi, Netofa-duled.

³¹Itai, Ribai-e-machi, Gabaaʼgined, Benjamín-wagwad. Benaía, Piratón-duled.

³²Hurai, Gaas-diwargined. Abiel, Arba-duled.

³³Azmavet, Barhum-duled. Eliaba, Saalbón-dule.

³⁴Gizón-dule-Hasem-e-masmala, Jonatán, Arar-dule-Sage-e-machi.

³⁵Ahíam, Sacar-e-machi, Arar-dule. Elifal, Ur-e-machi.

³⁶Hefer, Mequerat-dule. Ahías, Peloni-dule.

³⁷Hezro, Carmel-dule. Naarai, Ezbai-e-machi.

³⁸Joel, Natán-e-urba. Mibhar, Hagrai-e-machi.

³⁹Selec, Amón-dule. Naharai, Beerot-dule. Naharaiʼde, Joabʼga sigu-abgaed-seedga gudiid. Joab, Sarvia-e-machi.

⁴⁰Ira, Itri-dule. Gareb, Itri-dule.

⁴¹Urías, Het-dule. Zabad, Ahlai-e-machi.

⁴²Adina, Siza-e-machi, Rubén-wagwa, Adina, Rubén-dulemar-e-dummad, degi, sordamar dulagwen-gakambe (30) eba naid.

⁴³Hanán, Maaca-e-machi. Josafat, Mitni-dule.

⁴⁴Uzías, Astarot-dule. Sama, degi, Jehiel, Hotam-e-masmala, Aroer-dulemar.

⁴⁵Jediael, Simri-e-machi, degi, e-urba-Joha, Tizi-dule.

⁴⁶Eliel, Mahavim-dule. Jerebai, degi, Josavía, Elnaam-e-masmala. Itma, Moab-dule.

⁴⁷Eliel, Obed, degi, Jaasiel Mesoba-dule.