Text copied!
CopyCompare
Kâte Bible - Binaŋ Qâhâc I

Binaŋ Qâhâc I 29

Help us?
Click on verse(s) to share them!
1Eme ŋicwofuŋ Dawidizi ŋic tumaŋnembiŋ jaŋe ʒeŋgoma ʒiŋuc jazawec: “Ŋokâ‐nane Salomo e Anutu e jahac rowosâewec. Erâ e motec ɋâri â giere fuŋne mi manakac, gie ine kâcɋene sâko fokac. Erâ ufuŋ i ŋic jaŋere mâcne, i Wofuŋ Anuture eocmu.
2Irec no Anutu‐nanere ufuŋ bazore wiac i tâpiri‐nanere sâc râe bâmoc epo. Ehuc golzi wiac bazore gol bâmockepo â siliwazi wiac bazore siliwa bâmockepo. Erâ aeŋ bâbâroŋzi wiac bazore aeŋ bâbâroŋ bâmockepo â aeŋ omanezi wiac bazore aeŋ omane bâmockepo, â jâczi wiac bazore jâc bâmockepo. Erâ wâc qânâ furi sâko â râe biric eere qânâ gâcne â sesera kiruŋ â qânâ qâreŋnehec, erâ qânâ furi sâko i me i â qânâ fifimârâŋkene, iŋuc ʒuhuckerâ qâzuckepo.
3Erâ tiri ufuŋte wiac râe bâmoc epo ira ʒuhuckerâ ʒeŋaŋfic‐naneo gol â siliwa ʒiŋuc fokac i Anutu‐nanere ufuŋ irec boc enareekacte qikiŋnekopac:
4Gol 3 tauseŋ, gol i Ofiri mâreŋkonec; â siliwa rike sueŋkekicne 7 tauseŋ, erâ i sâpe ɋorockezo irec,
5â gieŋic jaŋe wiac gâcne golzi baniŋmu irec gol â wiac gâcne siliwazi baniŋmu irec siliwa i mâmâc qikiŋnekopac. Irec ŋoŋeraonec moc e wiac focnekac irecnec miŋecgac jaha buafecko Wofuŋ râcnezac?”
6E iŋuc mume garikiŋ sâc irec micne jaŋe buafec jaha taha‐jeŋic râembiŋ. Ehame Israe ŋic gurune gurune jaŋere micne bapa â momori tauseŋ gurune gurune â 100 gurune gurune jaŋere micne, erâ ŋicwofuŋ gie‐ticnere ŋic fekicne wâc iŋuc jaha embiŋ.
7Jaŋe Anutu ufuŋ‐ticnere gie fuaocte gol ŋemâc‐ticne 5 tauseŋ â gol moneŋ 10 tauseŋ, erâ siliwa ŋemâc‐ticne 10 tauseŋ jaha â aeŋ bâbâroŋ ŋemâc‐ticne 18 tauseŋ â aeŋ omane ŋemâc‐ticne 100 tauseŋ iŋuc râembiŋ.
8Â moc e qânâ furi sâko bajuwecko ine Wofuŋ ufuŋ‐ticnere ʒeŋaŋficko râeocte Geresoŋte ɋâric Jehielerao râeme soŋaŋkewec.
9Ehame micne jaŋe buafec jaha qikiŋnembiŋte ŋic ŋokac jaŋe ʒeri embiŋ. Jaŋe maŋhâcbuc jaha buafecko Wofuŋ taha bacnembiŋ hâcne. Eme ŋicwofuŋ Dawidi e wâc iŋuc jaha ʒerie sâqorewec.
10Irec Dawidi e ŋic tumaŋnembiŋ jaŋere ʒâŋe faio Wofuŋ muac baafec ecnehuc ʒiŋuc muwec: “O Wofuŋ, apa‐nâŋec Israere Anutu, go raŋɋa raŋɋa muac baafec egarezo.
11O Wofuŋ, Fekicne Sâko, tâpiri â eri qaraweŋ â aŋac ʒeri â uucmaŋ giriŋ giriŋ i gore biŋe sasawa. Sambâŋko â mâreŋko wiac fofârekac irec micne go hâcne jukomec.
12Eme mafa mâriri â ʒâŋe biŋe i goraonec wareekac, â ŋic ʒeŋgoma qaŋeŋ‐jopafâreekic. Megao tâpiri â ʒoɋac fokac; erâ gokizia ŋic fekicne âkendâŋ‐jopaekic â tâpiri qikiŋne‐jareekic.
13Irec Anutu‐nâŋec, nâŋe daŋge gazahuc ʒâŋege furi sâko i muteŋ bâteŋ ecneŋgopeneŋ.
14“No ŋic waha qaqane â ŋicfâc‐nane jaŋe ʒâŋe biŋe tâmiric. Wiac sasawa bajuŋgopeneŋ i goraonec ware‐fâreekac hâcne. Irec taha bagarehuc go gahacne jaha bârisie‐gareŋgopeneŋ.
15Nâŋe gore maio apa ŋosafâc‐nâŋec jaŋe jumbiŋ irec sâc jaha ŋic furune â jaba jueŋgopeneŋ, mâreŋko nâŋere juju dameŋ i nâkumuc iŋucne, juju sanaŋ moc mi fokac.
16O Wofuŋ Anutu‐nâŋec, tiri ʒâŋegere ufuŋ bagarenaŋte wiac râe bâmoc embeneŋ i gore meonec sasawa, irec go gahacne efâreekac.
17O Anutu‐nane, no manakopac, go maŋ esâicke honec ehuc tiŋne jujure aŋacguekac. No maŋnane fâretiŋ foha wiac sasawa ʒi buafec jaha râepac. Erâ ŋicfâcge ʒi ŋeŋgopieŋ jaŋe honec‐jopahape buafec jaha â ʒeri faio go taha bagarembieŋ.
18O Wofuŋ, apafâc‐nâŋec Abraham, Isaka â Israe jaŋere Anutu, go hata â mamanasu iŋucne ŋicfâcge jaŋerao raŋɋa raŋɋa foocte basanaŋke‐jarezemec. Ehuc maŋjeŋic baafecketec gorao fosanaŋkezejec.

19Go ŋokâ‐nane Salomo e sâcmutâc â mumutaniŋ â dâŋsanaŋge soŋaŋkehuc ʒeŋgona ebac eocte maŋ ɋaɋacne tahackezemec; iŋuc ecnetec wiac râe bâmoc epo izi ufuŋ bazejec.”
20Dawidi e iŋuc murâ ŋic tumaŋnembiŋ jaŋe jazarâ muwec, “Wofuŋ Anutu‐ŋeŋic muac baafec ecneniŋ.” Eme ŋic tumaŋnembiŋ jaŋe apa ŋosafâc‐jeŋic jaŋere Wofuŋ Anutu e muac baafec ecnehuc daperâ Wofuŋ wira wâwâsic ecnehuc ŋicwofuŋ fodapecnembiŋ.
21Erâ Wofuŋ taha bacnembiŋ; izi hae fureme Wofuŋte qowi bâzi bulimakao ŋicne 1 tauseŋ â lama ŋicne 1 tauseŋ â lama motecne 1 tauseŋ, iŋuc rikembiŋ. Erâ waiŋ‐jeŋic taha bahuc Israe ŋic jaŋere erâ taha afecne mi râembiŋ.
22Eme ʒoaŋ ira Wofuŋte maio bubiaŋ sâko manahuc nânâ opâ nâmbiŋ. Ehuc Dawidire ŋokâ Salomo harierâ mocwâc ŋicwofuŋ âkendâŋnembiŋ. Erâ Wofuŋte ŋic fekicne juocte wokemaŋ ruacnembiŋ â Zadoko e ine taha bapa âkendâŋnembiŋ.
23Eme Salomo e ŋicwofuŋ erâ juhuc mamac‐ticnere âkehoc Wofuŋte eri ŋeŋeo ŋewec. Erâ wiac ebac eme sâcke‐fâreme Israe ŋic jaŋe ʒeŋgoma micticne reŋkembiŋ.
24Ŋic tâpirihec jaŋere micne bapafâc, erâ wâc ŋicwofuŋ Dawidire ŋokâfâc sasawa jaŋe ŋicwofuŋ Salomo e araŋ bacnembiŋ.
25Eme Wofuŋzi Israe ŋic sasawa jaŋere ʒâŋe faio Salomo bafickeme ʒâŋe biŋe sâkohec ewec. Erâ uucmaŋ giriŋ giriŋ tahackewec i juwicnao Israe maŋnao ŋicwofuŋ juwefumbiŋ jaŋe siric‐jopawec.
26Isaire ŋokâ Dawidi e iŋuc hâcne ehuc Israe ŋic jaŋere ŋicwofuŋ juwec.
27E Israe ŋic jaŋere ŋicwofuŋ juhame jara 40 tarawec. Heboroŋ haeo jara 7 â Jerusalem haeo ine jara 33 juwec.
28E jara bocjaha bazurâ ŋicqizec jâmbâŋ ehuc mafa sâkohec â uŋ araŋ sâko bacnehapie juku hâmowec. Hâmome ŋokâ‐ticne Salomozi tucticne qarâ ŋicwofuŋ juwec.
29Eme ŋicwofuŋ Dawidizi wiac sasawa ebac ewec i findaŋdâŋ mumu Samue ere Binaŋ Qâhâcko â porofete Nataŋte Binaŋ Qâhâcko â findaŋdâŋ mumu Gade ere Binaŋ Qâhâcko fuŋnaonecteaŋ ninic jaha qâreŋke‐fârekicne.
30Erâ ŋicwofuŋ tâpirihec juwec irec binaŋ mecne, erâ e jahacne â Israe ŋic â mâreŋne mâreŋne ŋicguru ŋicwofuŋ‐jeŋichec jurambiŋ jaŋe wiac fua‐jarewec irec binaŋ i ʒeŋgoma qâreŋke‐fârekicne.