1Eme Filisa ŋic jaŋe Israe ŋic jaŋehec qaqac eku Israe ŋic jaŋe wisepie Giliboa tikio qâhâmoc‐jopambiŋ.
2Erâ Filisa ŋic jaŋe Saulo â ŋokâfâcne jâpec‐jopahuc kikeo kikeo ejarembiŋ. Ehuc Saulore ŋokâfâc Jonataŋ, Abinada â Malikisua qâhâmoc‐jopambiŋ.
3Eme râsi jaŋe Saulo bâqiŋkehuc kikeo kikeo ecnehapie tepeŋic gâcne jaŋe bâfuarâ ʒâpâ murumbiŋ.
4Murupie Saulozi maro babaju‐ticne ʒiŋuc âzâcnewec: “Sahac tofa‐jeŋic mi hezukicne ʒi jaŋe fisirâ mu ruruc enarenʒipiŋte go sânduge rorâ izi âke‐hâmocnuc.” Eme maro babaju‐ticne e hâwicke sâqoreme wiac iŋucne eocte mi afeckewec. Irec Saulo e jahacne sându rorâ âkendâŋnehuc micnao hewâcnewec.
5Eme maro babaju‐ticne e Saulozi hâmome honerâ iŋuc jaha sându‐ticne rorâ âkendâŋnehuc micnao hewâcneme mâmâc jaha hâmopic.
6Iŋuc ehuc Saulo e jahacne â ŋokâfâcne jahec â moc erâ wiacfâc‐ticne mâmâc jaha hâmombiŋ.
7Ehame Israe ŋic wâneŋko jumbiŋ jaŋe momorifâc‐jeŋic wisembiŋ i honec‐jopambiŋ, ehuc Saulo â ŋokâfâcne hâmombiŋ irec biŋe manarâ hae‐jeŋic behe‐fârerâ wisembiŋ. Wisepie Filisa ŋic jaŋe fisirâ ira ŋeŋe juju embiŋ.
8Hae fureme Filisa ŋic jaŋe qâŋɋâŋ jaŋere ŋaqi qoruc wiac hetara‐jareniŋte fisirâ Saulo â ŋokâfâcne Giliboa tikio hâmocne fohapie honec‐jopambiŋ.
9Honec‐joparâ Saulo e qizec‐ticne qâtâcnehuc maruku‐ticne hetaracnembiŋ. Iŋuc erâ kiŋaŋ sorec‐jopapie Filisa mâreŋ sâckerâ rahuc nemufâc‐jeŋic â ŋic ŋokac sâko jaŋerao biŋe biaŋ barambiŋ.
10Eme Filisa ŋic jaŋe Saulore maruku i nemufâc‐jeŋic jaŋere ufuŋko râembiŋ â qizec‐ticne ine Dagoŋ nemure ufuŋko ɋetickepie domawec.
11Ehame Jabesi‐Gileade hae rune jaŋe Filisia ŋiczi Saulo wiac ecnembiŋ irec biŋe manambiŋ.
12Manarâ ŋic tâpirihec jaŋe faharerâ Saulo â ŋokâfâcne jaŋere ɋâŋɋâŋ i rorâ Jabesi haeo bafisimbiŋ. Ehuc siec‐jeŋic i hae ira boriŋfuŋko duckembiŋ. Iŋuc erâ ʒoaŋ gie bapa 7 nânâ sowa jumbiŋ.
13Saulo e Wofuŋte dâŋ qâsuahuc sâcmutâc‐ticne mi reŋkewec â hâmockicne jaŋe guriŋ bacneniŋte wira wâwâsic ejarewec irec erâ iŋuc hâcne hâmowec.
14E Wofuŋzi guriŋ bacneocte wira basac mi ewec. Irec Wofuŋzi e qâhâmorâ uucmaŋ i Isai ŋokâ‐ticne Dawidirao râewec.